‘Ngan Fal’eg Laniyan’ Urngin e Girdi’ ni Ke Kireban’rad’

“Somol e ke turguyeg . . . ni nggu fal’eg laniyan’ urngin e girdi’ ni ke kireban’rad.”​—ISA. 61:1, 2, BT.

1. Mang e rin’ Jesus ni fan ngak e piin ni ke kireban’rad, ma mang fan?

 I GAAR Jesus Kristus: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu maruweliy.” (John 4:34) Nap’an ni i rin’ e maruwel ni ke pi’ Got ngak ma i m’ug fel’ngin rok. Reb ko pi fel’ngin ney e aram e t’ufeg rok Jehovah ngak e girdi’. (1 John 4:7-10) I weliy apostal Paul reb e kanawo’ ni ma dag Jehovah e re t’ufeg nem riy u nap’an ni yog ni ir “fare Got ni ma fal’eg lanin’uy.” (2 Kor. 1:3, NW) I m’ug e re t’ufeg ney rok Jesus u nap’an ni rin’ e n’en ni ke yiiynag Isaiah. (Mu beeg e Isaiah 61:1, 2.) I beeg Jesus e re yiiy nem u lan tafen e muulung u Nazareth, me rin’ e n’en ni bay riy. (Luke 4:16-21) N’umngin nap’an ni i machib Jesus, ma i fal’eg laniyan’ e piin ni ke kireban’rad, ma be pi’ e athamgil nge gapas nga lanin’rad.

2, 3. Mang fan nib t’uf ni nge folwok pi gachalpen Kristus rok ngaur fal’eged laniyan’ e girdi’?

² Gubin pi gachalpen Jesus e ba t’uf ni ngar folwokgad rok ngaur fal’eged laniyan’ e piin ni ke kireban’rad. (1 Kor. 11:1) I gaar Paul: “Nge bigimed mi i pi’ e athamgil nga laniyan’ bigimed, me bigimed mi i ayuweg bigimed.” (1 Thess. 5:11) Rib t’uf ni ngan fal’eg laniyan’ e girdi’ e ngiyal’ ney ni bochan e gad bay u ba ngiyal’ ni kari “mo’maw’” e par. (2 Tim. 3:1) Piin ni yad ba fel’ u ga’ngin yang e fayleng e yad be par u fithik’ e girdi’ ni yad ma yog ma yad ma rin’ boch ban’en ni ma kirebnag ma ma amithnag laniyan’ e girdi’.

³ Rogon ni kan yiiynag u Bible e ra taw ko  ngiyal’ ney ko tin tomuren e rran ma “bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay urogned e thin nib kireb ngak e girdi’, ma bay dab kur folgad rok e gallibthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf; ma bayi t’uf e fafel rorad me tomur Got u wan’rad.” Mit ney e ngongol e ke elmerin e chiney, ya ‘girdi’ nib kireb nge piin ni yad be dake girdien Kristus e ke gel farad kireb.’​—2 Tim. 3:2-4, 13.

4. Mang e be buch u fayleng e ngiyal’ ney?

⁴ Susun ndab da gingad ko pi n’ey, ya be tamilangnag e Thin rok Got ni “tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Be bannag Satan e girdi’ ko re fayleng ney u daken e pi am, nge pi yurba’ i teliw, nge siyobay, nge ku boch ban’en. Dariy e maruwar riy ni Satan ni Moonyan’ e ir e “en ni be gagiyegnag e girdi’ nu roy u fayleng” ma ir “fare kan nib kireb nu roy u fayleng.” (John 14:30; 2 Kor. 4:4) Gubin ban’en u fayleng ni be gel e kireb riy ni bochan e kari damumuw Satan, ya manang nda ki n’uw nap’an ni nge par. (Rev. 12:12) Kari fel’ lanin’dad ni kad nanged ndab ki pag Got Satan nge par nib n’uw nap’an ma bayi pithig fare magawon ni ke sum u murung’agen mat’awun ko gagiyeg.​—Gen., guruy ni 3; Job, guruy ni 2. 

Yibe Machibnag Fare Thin nib Fel’ u Fayleng i Yan

5. Uw rogon ni be lebug fare yiiy u murung’agen fare maruwel ko machib ni yibe tay e ngiyal’ ney ko tin tomuren e rran?

⁵ I yiiynag Jesus ni gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matt. 24:14) Be machibnag e girdi’ rok Jehovah fare thin nib fel’ u murung’agen Gil’ilungun Got u ga’ngin yang e fayleng ni bod rogon ni yog Jesus. Ngiyal’ ney e ba pag 7,500,000 e Pi Mich Rok Jehovah u boor ko 107,000 e ulung u ga’ngin yang e fayleng ni yad be rin’ e re maruwel ney, ni aram kenggin e machib ni i tay Jesus. (Matt. 4:17) Bochan e re maruwel ney ko machib ni yibe tay e ngiyal’ ney, ma aram fan ni be yog ni ngan fal’eg laniyan’ e piin ni ke kireban’rad. Fa gal duw ni ke yan e 570,601 e girdi’ ni kan taufenagrad kar manged boch e Mich Rok Jehovah!

6. Uw rogon u wan’um e mon’og ni be tay e maruwel rodad ko machib?

⁶ Pi Mich Rok Jehovah e yad be pilyeg boch e babyor ni bay e thin nu Bible riy u boor ko 500 mit e thin, ma yad be wereg ko girdi’. Dariy reb e maruwel ni kaan rin’ ni aray rogon ba ngiyal’! Yugu aram rogon ni be par e girdi’ rok Jehovah  u ba fayleng ni Satan e be gagiyegnag, machane yad ba pasig ni yad be rin’ e re maruwel ney, maku yad be yoor i yan. Dabiyog ni ngan rin’ e re maruwel ney ni faanra dariy gelngin Got nib thothup ni be ayuwegdad, ma be pow’iydad. Bochan ni yibe machibnag fare thin nib fel’ u ga’ngin yang e fayleng, ma boor e girdi’ ni be fel’ lanin’rad ko re thin ney ni bod e pi tapigpig rok Jehovah.

Ngad Fal’eged Laniyan’ Pi Walagdad

7. (a) Mang fan ndabiyog ni ngad lemnaged ni nge chuweg Jehovah gubin ban’en ni ma k’aring e kireban’ ngodad e chiney? (b) Uw rogon ni kad nanged nrayog ni ngad athamgilgad u fithik’ e togopuluw nge gafgow?

⁷ Bochan ni gad be par u ba fayleng ni ke sug ko kireb, ma aram fan nra ud mada’naged boch ban’en ni ma k’aring e kireban’. Dabiyog ni ngad lemnaged nra chuweg Got urngin ban’en ni be k’aring e kireban’ ngodad e chiney, nge mada’ ko ngiyal’ ni ke thang e re m’ag ney. Nap’an ni gad be sonnag e re ngiyal’ i n’em, ma pi gafgow nra ud mada’naged e ra m’ug riy ko gad ba yul’yul’ ngak Jehovah ma gad be micheg ni ir e bay mat’awun ni nge gagiyeg fa danga’. (2 Tim. 3:12) Machane, bochan ni ma ayuwegdad e Chitamangidad nu tharmiy ma ma fal’eg lanin’dad, ma rayog ni ngad boded e pi Kristiano nu Thessalonika kakrom ni kan dugliyrad ni ur pared ni kar k’adedan’rad mab gel e michan’ rorad u fithik’ e togopuluw nge gafgow ni i yib ngorad.​—Mu beeg e 2 Thessalonika 1:3-5.

8. Mang e mich riy u Bible ni ma fal’eg Jehovah laniyan’ e pi tapigpig rok?

⁸ Dariy e maruwar riy ni ma fal’eg Jehovah laniyan’ e pi tapigpig rok. Bod nnap’an ni guy Jezebel rogon ni nge li’ Elijah ni profet, ma aram me rus nge mil, miki yog ni baadag ni nge yim’. Yugu aram rogon ma de puwan’ Jehovah ngak Elijah, ya ke fal’eg laniyan’ me ayuweg ni dab ki rus ni nge rin’ e maruwel rok. (1 Ki. 19:1-21) Ku reb e mich riy ni ma fal’eg Jehovah laniyan’ e girdi’ rok e m’ug ko n’en ni buch u lan e ulung ni Kristiano ko bin som’on e chibog. Be yog e Bible ni immoy ba ngiyal’ ni pirieg girdien e ulung nu Judea ni ga’ngin, nge Galile, ngu Samaria e gapas. Miki ayuwegrad gelngin Got nib thothup nge “yib gelngirad ma yad be yoor i yan.” (Acts 9:31) Ku er rogodad ni gad be felfelan’ ya ke fel’ lanin’dad u daken gelngin Got nib thothup!

9. Mang fan ni gad ra fil murung’agen Jesus ma ra fel’ lanin’dad?

⁹ Gadad e Kristiano e ke fel’ lanin’dad ni bochan e kad filed murung’agen Jesus Kristus ma gad be lek luwan ay. I gaar Jesus: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:28-30) Faan gad ra fil murung’agen Jesus nge rogon ni i gol ngak e girdi’ ma be t’ufegrad, ma gad guy rogon ni ngad folwokgad rok, ma aram e rayog ni nge warnag e mochuch ni ma yib ngodad.

10, 11. Mini’ e rayog ni nge fal’eg laniyan’ e girdi’ u lan e ulung?

¹⁰ Ku rayog ni nge fal’eg pi walagdad ni Kristiano lanin’dad. Am lemnag rogon ni ma ayuweg e piin piilal boch e walag u lan e ulung ni ke kireban’rad. I yoloy James nreb i gachalpen Jesus ni gaar: “Ba’ be’ u fithik’med nib m’ar? Faanra ba’ ma nge pining e piin ni yad piilal ko galesiya ngar bad ngak, ngar yibiliyed ngak Got.” Ma mang angin nra yib riy? “Re meybil ney ni yira tay u fithik’ e michan’ ngak Got e ra golnag fare m’ar; i Somol e ra chuweg e m’ar rok, ma pi denen ni ke ngongliy e ra n’ag Got fan.” (Jas. 5:14, 15) Ku rayog ni nge pi’ boch e walag u lan e ulung e ayuw.

¹¹ Piin nib pin e ba ga’ nib mom ngorad ni ngar weliyed e magawon rorad ngak yugu boch e ppin. Ba ga’ ni pi walag nib pin ni kar piilalgad e rayog ni ngar pied e fonow nib fel’ ngak e pi walag nib pin ni yad bbitir ngorad. Pi walag nib pin ney ni kar piilalgad e sana ka i yib boch e magawon ngorad ni aray rogon. Bochan ni yad ma runguy e girdi’ ma yad manang rarogon e ppin ma aram fan nrayog ni ngar pied e ayuw. (Mu beeg e Titus 2:3-5.) Ku rayog ma susun ni ngki pi’ e piin  piilal nge ku boch e girdi’ u lan e ulung e “athamgil” nga laniyan’ e piin ni ke kireban’rad. (1 Thess. 5:14, 15) Ma kub fel’ ndab da paged talin ni Got e ma “ayuwegdad u urngin e gafgow nge kireban’ ni ma yib ngodad, ni fan e nge yog nda ayuweged e piin ni ke yib urngin mit e gafgow nge kireban’ ngorad.”​—2 Kor. 1:4.

12. Mang nib ga’ fan ni ngaud uned ko muulung?

¹² Reb e kanawo’ nrayog ni nge fel’ lanin’dad riy e aram e ngaud uned ko muulung, ya aram e gin ni yima beeg boch e thin nu Bible riy ni ma pi’ e athamgil nga lanin’uy. Be yog e Bible ni Judas nge Silas e “ba n’uw nap’an nra welthingow ngak e pi cha’nem ni ku yad boch e walag ni girdien Kristus, ni yow be pi’ e athamgil nga lanin’rad ma yow be pi’ gelngirad.” (Acts 15:32) Sabethin ni yima tay u m’on ngu tomuren e muulung e ma pi’ e athamgil nga laniyan’ e girdi’ u lan e ulung. Ere mus ni faanra ke kireban’dad ni bochan e magawon rodad, ma dab da talgad ko muulung, ya faan gad ra rin’ ni aram rogon ma dabi puf e magawon rodad. (Prov. 18:1) Ba fel’ ni ngad folgad ko fonow ni pi’ apostal Paul ni gaar: “Nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.”​—Heb. 10:24, 25.

Thin rok Got e Ma Fal’eg Lanin’uy

13, 14. Mu weliy rogon nrayog ni nge fal’eg e thin nu Bible lanin’dad.

¹³ Demtrug ko gur reb e Kristiano ni kam un ko taufe fa gur be’ ni fin ga be fil murung’agen Got nge tin nib m’agan’ ngay, ma rayog ni nge fal’eg e Thin rok Got lanin’um. I yoloy Paul ni gaar: “Urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” (Rom. 15:4) Thin ni bay u lan e Babyor nib Thothup e rayog ni nge fal’eg lanin’dad me ayuwegdad ngad pared ni ‘ke bung rogodad nrayog ni ngad rin’ed urngin mit e ngongol nib fel’.’ (2 Tim. 3:16, 17) Gad ra nang e tin riyul’ u murung’agen e tin nib m’agan’ Got ngay ma gad athapeg e pi n’en ni bay nga m’on, ma rra fel’ lanin’dad. Ere ngaud beeged e Bible nge boch e babyor ni yibe ngongliy ni bay e thin nu Bible riy, ya rayog ni nge fal’eg lanin’dad me yib angin ngodad u boor e kanawo’.

¹⁴ Ke dag Jesus e kanawo’ nib fel’ ni ngad folwokgad riy ni aram e i fanay e thin ni bay u lan e babyor nib thothup ni nga i skulnag e girdi’ ma be fal’eg lanin’rad. Tomuren ni ke fas ko yam’, me m’ug ngak l’agruw i gachalpen me weliy “fan fapi thin nu babyor nib thothup” ngorow. Nap’an ni be non ngorow mi ri fel’ lanin’row. (Luke 24:32) Ki folwok apostal Paul rok Jesus nga i “welthin ngak e girdi’ u lan e  babyor nib thothup.” Nap’an ni immoy u Berea ma piin ni ur motoyilgad ngak e ur ‘motoyilgad ko thin rok Got ni kar uthumed telrad ngay, ma gubin e rran ni ur gayed u lan e babyor nib thothup.’ (Acts 17:2, 10, 11) Ere rib ga’ fan ni ngaud beeged e Bible ni gubin e rran, ma ka gad be beeg e pi babyor ni kan ngongliy ni bay e thin nu Bible riy ma gad pag nge ayuwegdad, ya re n’ey e ra fal’eg lanin’dad me pi’ e athap ngodad ko ngiyal’ ney ni ke yoor e magawon!

Ku Boch e Kanawo’ Nrayog ni Ngad Fal’eged Laniyan’ Boch e Girdi’ Riy

15, 16. Mang boch ban’en nrayog ni ngad rin’ed ni ngad ayuweged ma gad fal’eg laniyan’ pi walagdad ni Kristiano?

¹⁵ Boor e kanawo’ nrayog ni ngad ayuweged ma gad fal’eg laniyan’ pi walagdad riy. Bod nrayog ni ngad ayuweged pi walagdad ni kar pilibthirgad ara kar m’argad nga darod da feked e chuway’ rorad. Ku rayog ni ngad ayuweged boch e walag u boch e maruwel ni nge m’ug ni gad be lemnagrad. (Fil. 2:4) Ku rayog ni nga dogned ngak pi walagdad ni gad baadag pi fel’ngirad ni bod e t’ufeg, nge michan’, nge feni darur rusgad.

¹⁶ Ku rayog ni nga u darod da guyed e piin ni kar pilibthirgad ngaud motoyilgad ngorad ngaur weliyed boch ban’en ni ur rin’ed kafram nge rogon ni ke tow’athnagrad Jehovah, ya nge yog nda fal’eged lanin’rad. Bin riyul’ riy e re n’ey e rayog ni ngki pi’ e athamgil nga lanin’dad me fal’eg lanin’dad! Rayog ni ngad beeged e Bible ara boch e babyor ni bay e thin nu Bible riy ngak e pi walag ni gad ma yan da guyed. Ku rayog ni ngad filed u taabang reb e article ko Wulyang ko Damit ni yira fil u reb e wik ara pi n’en ni yira fil u nap’an e Fol Bible ko Ulung u reb e wik. Ku rayog ni ngad yaliyed reb e kachido ko ulung u taabang. Maku rayog ni ngad beeged ara da weliyed boch ban’en ni ke buch rok boch e walag ni bay murung’agen u lan e pi babyor rodad nra pi’ e athamgil nga lanin’uy.

17, 18. Mang fan nrayog ni nge pagan’dad nra ayuweg Jehovah ma ra fal’eg laniyan’ e pi tapigpig rok ni yad ba yul’yul’?

¹⁷ Faanra kad nanged ni bay reb e tapigpig rok Jehovah nib t’uf ni nge fel’ laniyan’, ma rayog ni ngad uneged facha’ u lan e meybil rodad. (Rom. 15:30; Kol. 4:12) Nap’an ni gad be gafgow ni bochan e magawon ni ke yib ngodad, ngu nap’an ni gad be guy rogon ni ngad fal’eged laniyan’ boch e girdi’, ma rayog ni nge taareb gelngin e michan’ rodad ko michan’ rok David ni faani gaar: “Mu pi’ e gilab rom ngak Somol, ma bayi n’ufegem; dariy e ngiyal’ nra pag e piin yul’yul’ ngar meewargad.” (Ps. 55:22, BT) Gubin ngiyal’ ni bay Jehovah nrayog ni nga i fal’eg lanin’dad ma be ayuwegdad ya gad e pi tapigpig rok ni gad ba yul’yul’.

¹⁸ I yog Jehovah ngak e pi tapigpig rok kakrom ni gaar: “I gag e cha’ ni gu pi’ gelngimed.” (Isa. 51:12, BT) Ku aram e n’en nra rin’ Jehovah ngodad ma ra tow’athnagdad ni gad be guy rogon ni ngad fal’eged laniyan’ e piin ni ke kireban’rad. Demtrug ko gad be athapeg e yan nga tharmiy fa ngad pared u fayleng, ma gad gubin nrayog ni nge fal’eg lanin’dad fapi thin ni yog Paul ngak e pi Kristiano ni kan dugliyrad nga gelngin Got ni thothup ni gaar: “Somol rodad i Jesus Kristus nge Got ni ir e Chitamangidad, ni gadad ba t’uf rok e ir e ke runguydad ke ayuwegdad, ya ke pi’ e pagan’ ngodad nge reb e l’agan’ nib mudugil ni bay i par ndariy n’umngin nap’an, me ir e nge suguy lanin’med ko athamgil me gelnagmed nguum rin’ed ma gimed be yog urngin e tin nib fel’.”​—2 Thess. 2:16, 17.

Ka Ga Manang?

• Uw e ke taw e maruwel rodad ni machib ngay?

• Mang boch ban’en nrayog ni ngad rin’ed ni ngad fal’eged laniyan’ boch e girdi’?

• Mang e mich riy u Bible ni ma fal’eg Jehovah laniyan’ e girdi’ rok?

[Study Questions]

[Picture on page 29]

Ga ma un i fal’eg laniyan’ e piin ni ke kireban’rad, fa?

[Picture on page 31]

Demtrug yangaren be’, ma rayog ni nge pi’ e athamgil nga laniyan’ be’