Aka revista liytʼirinakan jisktʼäwinakapa

Biblia liytʼasin jukʼampi yatxatañ munañäni jan ukax jan walinakar atipañatakis jiwasatakjam iwxanak jikxatañ munañäni ukhaxa, ¿kunsa lurañasa?

Yatiñkankañsa ukat chʼikhi chuymanïñsa wali jila alani yänakarjam thaqham sasaw Proverbios 2:1-5 qillqatax sistu. Ukhamax Biblia liyisin kuns jisktʼasiñäni ukhax yatxatañataki chʼamachasiñasawa, ukat jiwasatakjam suma iwxanak jikxatañatakis chʼamachasiñasarakiwa. Ukampis ¿kawkins jikxatsna?

Amuyasiri Chiqapa Uywatax apayankistu uka qillqatanakan thaqhañasawa (Mat. 24:45). Ukat kunjamsa jiwasatakjam yatichäwinak jikxatsna ukxa wali sumwa Benefíciese de la Escuela del Ministerio Teocrático siski uka librox 33-38 jananakan yatichistu “La investigación eficaz” satawa. Ukat 36 jananxa, Indice de las Publicaciones Watch Tower siski uka libro apnaqañ yatichistu. Uka Índice libronxa yatichäwinakax kast kasta jalanuqtʼatawa ukat Biblian jiskʼa tʼaqanakapat parlir yatichäwinak katuñas janiw chʼamäkarakiti. Ukhamax kuna tuqit yatxatañ munasas ukarjamaw thaqtaraksna. Ukampis janiw jankʼaki jikxatañar tirañasäkiti, kuntï yatiñ munktan uk jikxatañatakis jan ukax suma iwxanak katuñatakis llampʼu chuymanïñasawa. Amtañäni, wali jila alani yänakarjam thaqañasawa, mä arunxa tiempow munasini ukat chʼamachasiñasarakiwa.

Ukampis awisax janiw qillqatanakansa kuntï yatiñ munktan ukax utjkiti. Ukat inas mä libronsa jan ukax yaqha qillqatanakasa Biblian mä jiskʼa tʼaqapat sum qhanañchaskchi, ukampis yatiñ munktan ukxa janiw qhanañchapkiti. Ukat qhanañchki ukhasa janiw phuqat parlkiti. Ukhamasti, kun yatiñ munasas suytʼañasawa, janiw jankʼakix jikxatksnati. Ukatxa, janirakiw amuyusarjamakis “ukhamäpachaw” jan ukax “akhamäpachaw” sasax tantiyañasäkiti. “Akanakax inamaya chʼaxwañanakarukiw api, ukatsti Diosax kuna iwxanaktix iyawsäwi layku phuqhañasataki churkistu ukarux janiw yanapkistuti.” (1 Tim. 1:4; 2 Tim. 2:23; Tito 3:9.) Ukat ak amtañasarakiwa, uraqpachan yatiyasiñapataki pʼiqtʼapki uka jilatanakas janiw taqi kunpun yatipkiti. Ukhamax janirakiw jupanakas qhanañchapkistaspati qillqatanakan jan utjkchi ukhaxa. Ukampis kunjamtï yatktanxa, kunanak yatiñasas wakiski ukax Biblian suma qhanañchatawa. Ukat jukʼamp yatiñ munasax suyañasawa, ukhamatwa Diosan arunakapar atinisitas uñachtʼaytanxa (Acerquémonos a Jehová siski uka libro 185 janat 187 janakam uñxattʼäta).

Ukampis ¿wali wakiskirinak tuqit yatxatañ munañäni, ukat jan kawkinsa uka tuqit parlkani ukhax kamachsnasa? Yatxattʼat mä cristian masisar jisktʼasiñasawa jan ukax irpir chuymaninakar jakʼachasiñasawa. Jupanakax Bibliat yatxattʼatäpxiwa ukat walja maranakaw Diosar luqtapxi. Ukhamax jupanakaw mä amtar puriñsa jan ukax jan walinakar atipañsa sumpach yanaptʼapxiristamxa. Ukatsti, Diosar mayisiñ jan armasimti, kunjamas jikxatasta taqi ukanak yatiyañamawa, ukat qullan ajayum tuqi yatiñkankañ churita sasin taqi chuym mayisiñamawa. Ukat ukarjamaw Jehová Diosax yatiñkankañsa chʼikhi chuymanïñsa churätamxa (Pro. 2:6; Luc. 11:13).