Fluwa’n nun kannganfuɛ’m be kosan mun

?Sɛ n kanngan Biblu’n nun ndɛ kun naan n wunmɛn i wlɛ annzɛ min su sa wie ti n su kunndɛ afɔtuɛ’n, ngue yɛ ɔ fata kɛ n yo ɔ?

Nyanndra Mun 2:1-5 wla e tinuntinun e fanngan kɛ e ‘tu e klun kunndɛ’ akunndan’n nin ngwlɛlɛ’n kɛ be fa kunndɛ “anyanbeun’n” sa. Ndɛ sɔ’n kle kɛ, sɛ y’a wunman Biblu’n nun ndɛ wie i wlɛ’n, ɔ fata kɛ e wla e wun ase e kunndɛ i bo kpa. Sɛ e su sa wie ti e kunndɛ afɔtuɛ’n, maan e yo i sɔ wie. ?Wafa sɛ yɛ e kwla yo i sɔ ɔ?

Wafa nga e kwla fa ninnge nga “sran kpa nanwlɛfuɛ b’ɔ si ngwlɛlɛ’n” man e’n e kunndɛ ndɛ’m be bo Biblu’n ɔ nin Biblu’n i akua’m be nun’n, be yiyili nun fluwa Tirez profit de l’École du ministère théocratique * nun. Fluwa sɔ’n i nun ndɛ ng’ɔ o i bue 33 m’ɔ́ fá jú 38 nun’n, i nun yɛ be kle e ajalɛ sɔ’n niɔn. Be flɛ ndɛ sɔ’n kɛ “Comment effectuer des recherches.” (Mat. 24:45) Fluwa’n i bue 36 nun’n, be kle e wafa nga e kwla fa Index des publications Watch Tower e kunndɛ Biblu’n i akua’m be nun like’n. Be buli fluwa Index nun akpasua nɲɔn. Akpasua kun su’n, be bo ndɛ kun su kpɛkun Biblu’n i akua nga be tuli i bo nun’n be kle e. I akpasua uflɛ su’n, be bo Biblu’n nun ndɛ mma kun su kpɛkun be bobo Biblu’n i akua nga be nun’n, be tutuli i bo’n. I sɔ’n yo maan e kwla nian i bue nga Biblu’n nun ndɛ mma’m be o nun’n annzɛ i bue kunfuɛ’n nun. Afin i bue nɲɔn’n nun’n, be kle e Biblu’n i akua wie mɔ e kwla kanngan nun ɔn. Asa ekun’n, e kwla nian afuɛ kwlaa nun Desamblu anglo nun’n Sasafuɛ Tranwlɛ’n i nun. I bue kun su’n, be boboli ndɛ nga be fiteli Sasafuɛ Tranwlɛ’n nun afuɛ nuan kun sɔ nun’n be nun wie’m be su. Kusu kɛ é kúnndɛ kosan kun i su tɛlɛ annzɛ afɔtuɛ wie’n, maan e tra e awlɛn nán e kpli. Nán maan e wla fi su kɛ e su kunndɛ ‘anyanbeun.’ Kusu aɲanbeun kunndɛlɛ’n fa blɛ kpanngban. Yɛ sran ng’ɔ klo kɛ ɔ́ ɲɛ́n i’n, ɔ fata kɛ ɔ miɛn i ɲin.

Ɔ ti su kɛ ndɛ wie annzɛ Biblu’n nun ndɛ mma wie’m be o lɛ’n, b’a yiyiman be nun e Biblu’n i akua’m be nun. Wie liɛ kusu kannzɛ be boli Biblu’n nun ndɛ mma kun su’n, sanngɛ i nun yiyilɛ’n tɛman kosan ng’ɔ o e klun’n i su. Asa kusu’n, Biblu’n nun ndɛ wie’m be kpɛ kosan wie’m be ba, afin Biblu’n nun’n b’a kanman ndɛ’n tɛkɛtɛkɛ kwlaa. Ɔ maan nán kosan ngba yɛ e kwla ka lɛ e wun be su tɛlɛ’n niɔn. Sɛ ɔ yo sɔ’n, nán maan e kpɛ e ti nun e tɛ kosan nga b’a tɛman su’n be su. Ɔ timɛn i ti’n, é tɔ́ akplowa silɛ “b’ɔ kpɛ saɛ’n” i nun. “Sa sɔ’m be uka-man sran kɛ ɔ lafi Nyanmiɛn su ɔ yo sa ng’ɔ ti i klun sa’n.” (1 Tim. 1:4; 2 Tim. 2:23; Tit 3:9) Maan ɔ yo Betɛli lɔfuɛ mun o, annzɛ be nga be o kan anuannzɛ’n i bo bia’n o lɔ’n nin o, nán be yɛ ɔ fata kɛ be tɛ kosan sɔ mɔ b’a tɛman be su e Biblu’n i akua’m be nun’n be su be man e ɔ. Kannzɛ Biblu’n w’a yiyiman ndɛ’n tɛkɛtɛkɛ’n kwlaa nun’n, sanngɛ like ng’ɔ kle e’n ɔ kwla uka e naan y’a si nanti. Kɛ ɔ ko yo naan y’a lafi Ɲanmiɛn m’ɔ fali Biblu’n mannin e’n i su kpa’n, i ti yɛ be yoli i sɔ ɔ. Ɔ fata kɛ e klun jɔ i kwlaa sɔ’n su.​—An nian fluwa Approchez-vous de Jéhovah * i bue 185 m’ɔ́ fá jú 187 nun.

?Yɛ sɛ e miannin e ɲin e kunndɛli afɔtuɛ wie naan y’a wunman like fi’n nin? Sɛ ɔ yo sɔ’n, maan e usa e wiengu Klistfuɛ kun m’ɔ si Ɲanmiɛn Ndɛ’n kpa’n i ngwlɛlɛ afɛ. Ɔ kwla yo e asɔnun kpɛnngbɛn kun. Be liɛ’n be si Biblu’n nun like kpa, kpɛkun kɛ mɔ be ti Klistfuɛ w’a cɛ’n ti’n, be si sa kpanngban. Sɛ sa wie yɛ ɔ o e bɔbɔ e su, annzɛ ajalɛ wie yɛ ɔ fata kɛ e fa’n, be kwla uka e ngwlɛlɛ su. Afin be si e, yɛ be si sa ng’ɔ o e su’n wie. Asa kusu’n, nán e wla fi Zoova i srɛlɛ le. Maan e kan sa trele ng’ɔ o e su’n i ndɛ kle i, yɛ e srɛ i naan ɔ fɛ i wawɛ’n tinngɛ e akunndan’n. Afin Zoova “yɛ ɔ man akunndan [...] nin ngwlɛlɛ’n” niɔn.​—Nya. 2:6; Lik 11:13.

[Ja ngua lɛ ndɛ mun]