Kestyon lekter

Ki mon devret fer si mon annan en kestyon lo en keksoz ki mon’n lir dan Labib ouswa kan mon bezwen konsey lo en problenm personnel?

Proverb 2:1-5 i ankouraz nou pour “kontinyen rod” konprenezon ek disernman konmsi nou ti pe rod “bann trezor kasyet.” Sa i vedir ki nou bezwen fer zefor pour rod larepons bann kestyon ki nou annan lo Labib ek solisyon pour bann problenm personnel. Ki mannyer nou kapab fer sa?

Dan liv Benefisye atraver Ledikasyon Lekol Minister Teokratik, lo paz 33 a 38 i montre “Konman fer Resers” ler ou pe servi bann diferan zouti ki “lesklav fidel e pridan” in fourni. (Mat. 24:45, NW) Lo paz 36, i montre nou ki mannyer pour servi Watch Tower Publications Index. Sa liv i ganny divize an de, enn i lalis bann diferan topik e lot i lalis bann verse. Ou kapab fer resers dapre lalis sa bann mo enportan ouswa dapre verse Labib e sa liv pou donn ou bann referans ki ou kapab lir lo sa size ki ou pe fer resers lo la. Fodre ou pran letan pour rod larepons spesifik ouswa gidans ki ou bezwen. Pa bliye ki ou pe rod “bann trezor kasyet,” e sa i demann letan ek zefor.

Byensir, i annan serten size ek verse ki nou bann piblikasyon pa’n koz lo la spesifikman. Menm ler en serten verse Labib in ganny eksplike, i kapab arive ki sa pa reponn sa kestyon ki ou ti annan antet. Deplis, parfwa nou kapab annan serten kestyon lo en resi dan Labib akoz pa tou detay ki’n ganny donnen dan Labib. Pour sa rezon, nou kapab pa pe ganny larepons sa kestyon toudswit. Si i le ka, nou pa devret esey donn nou prop larepons zis akoz nou pa kapab trouv li, oubyen menm fer bann deba ek “diskisyon, [akoz] i pa realiz plan Bondye dan lafwa.” (1 Tim. 1:4; 2 Tim. 2:23; Tit 3:9) I ti pou difisil pour bann biro brans ek biro prensipal Temwen Zeova pour analiz e reponn tou kestyon ki nou bann piblikasyon pa’n koz lo la ziska prezan. Nou devret kontan ki Labib i donn sa gidans ki nou bezwen dan lavi, me osi ki i pa’n donn tou detay pour ki nou kapab montre ki nou annan lafwa solid dan son Loter.​—Vwar paz 185 a 187 dan liv Apros avek Zeova.

Ki ou pou fer si ou’n fer en bon pe resers lo en size ki enportan pour ou me ki ou pa’n vwar sa gidans ouswa larepons ki ou ti pe rode? Akoz ou pa koz avek en lot Kretyen matir, petet en ansyen dan kongregasyon? Zot annan en bon pe konnesans lo Labib e osi leksperyans lo lafason ki en Kretyen i devret viv. Zot pwennvi balanse pou vreman ed nou si nou bezwen en konsey lo en desizyon ouswa problenm personnel akoz zot konn nou, nou sityasyon e zot pros avek nou. Pa zanmen oubliye pour priy Zeova spesifikman lo ou konsern e demann li pour gid ou atraver son lespri sen, akoz “Zeova i donn lasazes . . . ek disernman.”​—Prov. 2:6; Lik 11:13.