Mme Mbụme Oro Mme Andikot Ẹbụpde

Nso ke n̄kpanam ke ini nnyenede mbụme mban̄a se n̄kotde ke Bible m̀mê ke ini nyomde item mban̄a ọkpọkpọ mfịna?

Mme N̄ke 2:1-5 ọdọhọ owo nnyịn kiet kiet ete ‘ika iso iyom’ asian ye mbufiọk nte n̄kpọ eke iyomde “n̄kpọuto eke edịbede.” Emi ọwọrọ ke ana isịn idem inam ndụn̄ọde iyom ibọrọ mbụme Bible nnyịn inyụn̄ ikọk ọkpọkpọ mfịna nnyịn. Didie ke ikeme ndinam emi?

Bọ Ufọn to Ukpepn̄kpọ Ufọkn̄wed Utom Ukara Abasi, page 33 esịm 38, eneme “Nte Akpanamde Ndụn̄ọde,” ke ndida mme n̄kpọ unam ndụn̄ọde oro “ofụn emi anamde akpanikọ onyụn̄ enyenede ọniọn̄” ọnọde nnam. (Matt. 24:45) Page 36 etịn̄ nte ẹkpedade Watch Tower Publications Index, emi ẹbaharede nsiondi kiet kiet ẹdọn̄ ke index ibuotikọ ye index itie N̄wed Abasi, ẹnam ndụn̄ọde. Imekeme n̄ko ndida Index Ibuotikọ nsiondi Enyọn̄-Ukpeme December 15 eke isua ke isua. Emi anam ẹkeme ndida mme ọkpọikọ m̀mê mme ufan̄ikọ Bible nnam ndụn̄ọde emi ediwụtde fi ediwak n̄wed ndụn̄ọde emi ekemede ndika n̄kokụt se oyomde. Nyene ime ke ini oyomde akpan ibọrọ m̀mê ndausụn̄. Ti ete ke oyom “n̄kpọuto eke edịbede,” ndien emi esida ini ye ukeme.

Edi akpanikọ ke odu ndusụk ibuotikọ ye mme itie N̄wed Abasi emi mme n̄wed nnyịn mînemeke nnennen nnennen. Ndien idem ke mme ufan̄ikọ Bible emi inemede, ekeme ndidi nnyịn ikọbọrọke akpan mbụme emi afo enyenede. N̄ko, ndusụk mbụk Bible ẹnam owo enyene mbụme sia owo mîtịn̄ke kpukpru n̄kpọ in̄wan̄-in̄wan̄ ke N̄wed Abasi. Ntem nnyịn ikemeke ndisọsọp nnyene ibọrọ kpukpru mbụme oro inyenede. Ke mme utọ idaha oro, ikpenyene ndifep ndinọ ekikere idem nnyịn mban̄a se owo mîkemeke ndibọrọ mbak idisịn idem ke “mme mbụme ndida nnam ndụn̄ọde utu ke ndinọ n̄kpọ ekededi oro otode Abasi emi aban̄ade mbuọtidem.” (1 Tim. 1:4; 2 Tim. 2:23; Titus 3:9) N̄kọk itieutom m̀mê ibuot itieutom ofụri ererimbot ikemeke nditie ndụn̄ọde nnyụn̄ mbọrọ kpukpru utọ mbụme oro owo mînemeke ke mme n̄wed nnyịn. Imekeme ndikop uyụhọ ke Bible ọnọ nnyịn ntọt oro ekemde ndida nnyịn usụn̄ ke uwem onyụn̄ ọkpọn̄ mme n̄kpọ eken man anam nnyịn inyene akwa mbuọtidem ke Abasi emi enyenede enye.​—Se page 185 esịm 187 ke n̄wed San̄a Kpere Jehovah.

Nso ke akpanam edieke anamde kpukpru se ekemede man oyom n̄kpọ emi afịnade fi ọkpọkpọ edi ukwe ndausụn̄ m̀mê ibọrọ ndomokiet? Emekeme ndika n̄kenyene nneme ye ekemmọ andinịm ke akpanikọ emi ọkọride esịm ọyọhọ idaha, ekeme ndidi ebiowo. Mmọ ẹnen̄ede ẹnyene ifiọk Bible ye ifiọk udu uwem nte mme Christian. Edieke afo oyomde item aban̄a ọkpọkpọ mfịna m̀mê ubiere oro akpanamde, eti un̄wam oro mmọ ẹdinọde eyenen̄ede odot sia mmọ ẹtịmde ẹdiọn̄ọ fi ye nte n̄kpọ etiede ye afo. Kûnyụn̄ ufre ndibọn̄ akam san̄asan̄a nnọ Jehovah mban̄a se itịmerede fi esịt ndọhọ enye ada edisana spirit esie an̄wam fi, “koro Jehovah ọnọde ọniọn̄ . . . ye mbufiọk.”​—N̄ke 2:6; Luke 11:13.