Bema lau be mai egu Baibel henanadai ta, o hekwakwanai ta dainai heduru lau tahua, dahaka do lau karaia?

Aonega Herevadia 2:​1-5 ese ita ia hagoadaia, laloparara bona laloa kehoa be ‘siliva bona idia hunia kohu’ bamona do ita “tahua.” Unai dainai, bema ita be mai eda Baibel henanadai, namona be ita hekwarahi haere ita tahua, bona ita hekwarahi hekwakwanai hamaoromaoroa dalana ita tahua totona. To, edena dala ai unai ita karaia diba?

Tiokratik Haroro Sikuli amo Heduru Oi Abia buka ena rau 33 ia lao 38 ai inai hereva kwarana “Tahua Karana Karaia Dalana” ia noho. Unai kahana ese ia hahedinaraia edena bamona “igui hesiai tauna mai ena kamonai” ese idia halasia buka bona magasin amo iseda henanadai edia haere ita tahua diba. (Mat. 24:45) Watch Tower Publications Index gaukaralaia dalana be rau 36 ai ia herevalaia. Ia be mai ena kahana rua, hereva edia indeks bona Baibel siri edia indeks. Bema oi ura hereva ta o siri ta ena anina oi diba, Index lalonai unai oi tahua, bena do ia hahedinaraia edena buka o magasin amo emu haere oi davaria diba. Tahua gaukarana oi karaia neganai, namona be oi hesiku haraga lasi. Laloatao, ia be hegeregere idia hunia dava bada kohu ta oi tahua bamona.

Momokani, iseda buka bona magasin ese hereva bona siri haida idia herevalaia lasi. Bona nega haida oi tahua sirina ta idia herevalaia, to reana unai ese emu henanadai ia haerelaia lasi. Danu, Baibel ai ita duahia sivarai haida be idia vara gaudia ibounai ia herevalaia lasi, unai dainai reana do ita ura gau ma haida ita diba. To, henanadai haida edia haere be maoromaoro do ita davaria lasi. Bema buka o magasin lalonai eda haere ita davaria lasi, namo lasi sibona eda lalohadai ita atoa kau. Unai ese ita do ia durua lasi to “henanadai sibona idia havaraia.” (1 Tim. 1:4; 2 Tim. 2:23; Tito 3:⁠9) Bema iseda buka o magasin lalonai oi tahua herevana idia halasia lasi, vadaeni Iehova ena Witnes taudia edia hedikwota eiava brens opesi be haere ta do idia henia diba lasi. To, ita diba Baibel ena hereva ese ita ia hakaua diba. Bona ena be gau haida dekenai ita do daradara noho, namona be Dirava bona Baibel ita abidadama henia.​—⁠Iehova Kahirakahira Oi Lao bukana, rau 185 ia lao 187 itaia.

Bema oi laloa bada gauna ta dekenai tahua karana oi karaia to haere oi do davaria lasi, dahaka do oi karaia? Lo Keristani tauna ta eiava emu kongrigeisen elda ta oi hereva henia diba, badina idia be Baibel idia diba namonamo bona lagani momo lalonai Iehova idia hesiai henia. Emu hekwakwanai oi ura hamaoromaoroa, o abia hidi ta oi ura karaia, oi idia durua diba badina umui be kongrigeisen tamona taudia, oi bona emu hekwakwanai idia diba namonamo danu. Bona laloaboio lasi, guriguri amo oi lalohekwarahilaia gauna be Iehova dekenai oi gwauraia. Ia oi noia ena lauma helaga amo oi do ia durua lalohadai maorona oi abia totona, bona ia ese oi dekenai aonega bona laloa kehoa do ia henia.​—⁠Aon. 2:6; Luka 11:13.