Ciũria Kuuma Kũrĩ Athomi

◼ Njagĩrĩirũo nĩ gwĩka atĩa ingĩkorũo na kĩũria kĩgiĩ ũndũ mũna thomete Bibilia-inĩ kana rĩrĩa ndabatara ũtaaro wĩgiĩ ũndũ mũna ũrathumbũra?

Thimo 2:1-5 ĩkĩraga o mũndũ o mũndũ ngoro ‘acaragie’ ũũgĩ na ũtaũku ta arĩ “managĩ marĩa mahitharu” aracaria. Ũguo nĩ kuuga atĩ nĩ twagĩrĩirũo kwĩrutanĩria gũcaria macokio ma ciũria iria tũngĩkorũo nacio ciĩgiĩ Bibilia na gũcaria ũrĩa tũngĩka rĩrĩa tũrĩ na mathĩna. Tũngĩka ũguo atĩa?

Thĩinĩ wa Faidika na Elimu ya Shule ya Huduma ya Kitheokrasi, karatathi-inĩ ka 33-38, nĩ harĩ ũtaaro wĩgiĩ “Jinsi ya Kufanya Utafiti” ũkĩhũthĩra indo iria ihaarĩirio nĩ “ngombo ĩrĩa ĩĩhokekete na njũgĩ.” (Mat. 24:45) Karatathi ka 36 nĩ gataarĩirie ũrĩa ũngĩhũthĩra Fahirisi, ĩrĩa ĩkoragwo ĩgayanĩtio maita merĩ, kũrĩa ũngĩona ũhoro makĩria wĩgiĩ maũndũ matiganĩte na kũrĩa ũngĩona ũhoro makĩria wĩgiĩ maandĩko matiganĩte. Ũndũ ũcio ũteithagia mũndũ gũcaria ciugo kana mĩhari ya Bibilia, akona mabuku maingĩ marĩa angĩthoma. Korũo na ũkirĩrĩria ũgĩcaria macokio kana ũtaaro ũrĩa ũrabatara. Ririkana, ũracaria “managĩ marĩa mahitharu,” kwoguo nĩ ũbataraga mahinda na kĩyo.

Ma nĩ atĩ, ti maũndũ kana maandĩko mothe makoragwo marĩrĩirio thĩinĩ wa mabuku maitũ. Ningĩ o na harĩa twarĩrĩirie rĩandĩko rĩna rĩa Bibilia-rĩ, no tũkorũo tũtaarĩrĩirie kĩũria kĩrĩa ũrĩ nakĩo meciria-inĩ. Ningĩ, nĩ harĩ maũndũ mamwe thĩinĩ wa Bibilia mangĩtũma mũndũ eyũrie ciũria tondũ ti ũhoro wothe ũtaarĩirio Maandĩko-inĩ. Kwoguo to mũhaka tuone macokio ma kĩũria o gĩothe kĩrĩa ũngĩgĩa nakĩo. Maũndũ-inĩ ta macio, tũtiagĩrĩirũo kwĩgereria macokio, tondũ no matũme tũingĩre ngarari-inĩ “iria itũmaga andũ magĩe na njiriri [nganja] na matirũmie maũndũ marĩa Ngai atabarĩire ma gwĩkĩra andũ hinya, o marĩa makonainie na wĩtĩkio.” (1 Tim. 1:4; 2 Tim. 2:23; Tit. 3:9) Wabici ya rũhonge o na kana wabici ĩrĩa nene ya thĩ yothe ya Aira a Jehova itingĩhota gũthuthuria na gũcokia ciũria ta icio iria itarĩ ndaarĩrie mabuku-inĩ maitũ. Twagĩrĩirũo nĩ kũiganĩra atĩ Bibilia ĩtũheaga ũtaaro mũiganu wa gũtũtongoria ũtũũro-inĩ, ĩndĩ ndĩtwĩraga maũndũ mothe, tũbataraga gũkorũo na wĩtĩkio mũrũmu harĩ Mũtungi wayo.—Rora karatathi ka 185-187 ka ibuku rĩa Mkaribie Yehova.

Ĩ angĩkorũo nĩ wĩkĩte o ũrĩa wothe ũngĩhota gũthuthuria ũhoro wĩgiĩ ũndũ mũna ũragũthumbũra, no ndũrĩ ũrona ũtaaro ũrĩa ũrabatara? Ndũgetigĩre kũũria ũmwe wa Akristiano arĩa agimaru kĩĩroho, kana ũmwe wa athuri a kĩũngano. Tondũ marĩ na ũũgĩ mũingĩ wa Bibilia o hamwe na ũtaũku wĩgiĩ ũtũũro wa Gĩkristiano. Ũteithio wao no ũkwagĩrĩre na makĩria angĩkorũo ũrabatara ũtaaro wĩgiĩ thĩna kana itua rĩna, tondũ nĩ makũũĩ wega na nĩ moĩ maũndũ marĩa ũragerera. Ningĩ ndũkanariganĩrũo kũhoya Jehova igũrũ rĩgiĩ ũndũ ũrĩa ũragũthumbũra na ũmũũrie atongorie mwĩcirĩrie waku kũgerera roho wake mũtheru, ‘amu Jehova nĩwe ũheanaga ũũgĩ-ũrĩa-wa-ma . . . gwata ũtaũku.’—Thim. 2:6; Luk. 11:13.