Bipangujo bya Batangi

I bika byomfwaninwe kulonga shi ndi na kipangujo pa kintu kyonatanga mu Bible nansha kitatyi kyosakilwa madingi pa mwanda kampanda untala?

Nkindi 2:1-5 witusoñanya batwe bonso ‘twendelele kukimba’ kwimvwanija ne kusansanya pamo bwa batwe bakimba “bilēme bifibwe.” Kino kilombola’mba tufwaninwe kwielela’ko kukimba malondololo a ku bipangujo bya mu Bible ne kutana mwa kupwijija myanda yotutana. Muswelo’ka?

Dibuku Mwena Byabuyabuya mu Masomo a Mwingilo wa Kiteokratike, paje 33 kutūla ku 38, dishintulula “Mwa Kulongela Bukimbi” na kwingidija bingidilwa bilupwilwe na “umpika wa binebine, udi na manwa.” (Mat. 24:45) Paje 36 ushintulula mwa kwingidijija Index de publications de la société Watch tower, mwabanibwe mu nondelo ya mitwe ya myanda ne ya bisonekwa. Kino kilengeja tupēlelwe kusokola bishima bikatampe nansha mavese a mu Bible, mwine motukatana mulongo wa mabuku kwa kunyemena. Tūkija mutyima pokimba malondololo mu mwanda kampanda nansha bwendeji bosaka. Vuluka’mba, ukimbanga “bilēme bifibwe,” bintu bilomba kitatyi ne bukomo.

Shako, kudi myanda imo mikatampe ne bisonekwa bimo kebinenenwepo patōkelela mu mabuku etu. Kadi ne myanda imo yotushintulwile pa kisonekwa kampanda kya mu Bible, padi keitengelepo mwanda mwine odi nao mu mutyima. Kadi, nsekununi imo ya mu Bible iletanga bipangujo mwanda kishima ne kishima kekitelelwepo mu Bisonekwa. Po pa mwanda, ketubwanyapo kutana kala kilondololwa ku kipangujo kyonso kilupukile. Shi bidi uno muswelo, tufwaninwe kwepuka kwela kyaba pa myanda keidipo na malondololo, mfulo mfulō ke twipotomeja pa bintu “bikolomona ne lupata, ne kwendela mu bwine-Leza bwa mu kwitabija mpika.” (1 Tem. 1:4; 2 Tem. 2:23; Tet. 3:9) Nansha ke bilo ya musambo ne kité kya ntanda yonso kebibwanyapo kubandaula ne kulondolola bipangujo byonso bya mu myanda keisambilwepo mu mabuku etu. Tukasangala pa kuyuka’mba Bible witulombolanga myanda mitufwaninwe ya kwituludika mu būmi ne kuleka kutela kanda ne kanda mwanda wa tutamije lwitabijo lukomo mudi Mwine ulembeje’ye.—Tala dibuku Approchez-vous de Jéhovah pa paje 185 kutūla ku 187.

Le bikekala namani shi ubalonga bukomo bonso bwa kukimba myanda itala būmi bobe ino kutana bwendeji ne kilondololwa kyosakilwa mpika? Udi na bwanapabo bwa kufwena banabetu batame ku mushipiditu, padi mukulumpe umo wa penu. Badi na buyuki kampanda bwa mu Bible ne myanda yobemwenine mu būmi bwa Bwine Kidishitu. Milangwe yabo mifwaninwe ikakukwasha pokimba madingi mu myanda ne mu butyibi bukutala, ke-pantu badi pabwipi nobe, bakuyukile, kadi bayukile ne ngikadilo yodi’mo. Kokelwa nansha dimo kulomba Yehova pa myanda ikutala ne kumulomba aludike milangwe yobe kupityila ku mushipiditu sandu wandi, “mwanda Yehova upananga ñeni . . . ne kwivwanija.”—Nk. 2:6; Luka 11:13.