Karemdbã sogsgo . . .

M sã n wa rat n wʋm bũmb m sẽn karem Biiblã pʋgẽ võore, wall m wa tar zu-loɛɛg n dat saglga, bõe la m segd n maane?

Yelbũn 2:1-5 wã sagend-d lame tɩ d ‘baood’ bãngr ne yam wa ned sẽn baood “arzɛgse.” Woto rat n yeelame tɩ d sã n dat n wʋm bũmb d sẽn karem Biiblã pʋgẽ võore, wall d sã n wa rat sagls n welg d zu-loeese, d segd n modg n vaeesa Biiblã d toore. Wãn to la d tõe n maan dẽ?

Sõsg ning gom-zug sẽn yaa: “ Comment effectuer des recherches ” n be Tirez profit de l’École du ministère théocratique sebrã neng 33 n tãag 38 wã wilgda d sẽn tõe n tall tʋʋm-teed nins “tʋm-tʋmd sẽn tũud sɩd la sẽn tar yamã” sẽn kõt-dã, n maan vaeesg to-to. (Mat. 24:45) A seb-neng 36 soabã wilgda d sẽn tõe n tʋm ne Index des Publications Watch Tower sebrã to-to wã. Index rãmbã zĩig a ye la b sõdg gom-zut toor-toor n wilg sɛb nins sẽn gomd b yellã, t’a zĩig a to, b sõdg vɛrse rãmba. Woto kɩtame tɩ y tõe n tik gom-bil wall vɛrse n bãng y sẽn tõe n bao sɛb nins n karmã. Y sã n wa baood y sokr leoor wall y zu-loɛɛg tɩɩm, y segd n talla sũ-mare. Tẽeg-y tɩ yaa wa y sẽn baood “arzɛgse.” Arzɛk baoob yaool n dɩkda sẽka, la baood modgr me.

La gom-zut kẽer ne vɛrse rãmb kẽer yell la tõnd sɛbã pa gom vẽeneg ye. Baa b sã n goma vɛrse ning yell me, d tõe n mi n yãame tɩ b pa vẽneg bũmb ning tõnd sẽn dat n wʋmã takɩ ye. Sẽn paase, d sã n wa karemd Biiblã kibay kẽere, d tõeeme n wa pa wʋmd yɛl sãnda võore, bala, b pa wilg b sẽn yɩ to-to wã ball-ball ye. Woto kɩtame tɩ d pa tõe n paam d sokr fãa leoor zĩig pʋgẽ ye. Sã n wa yaa woto, d pa segd n baood n na n wilg yɛlã võor d toor ye. Bala rẽ wata ne ‘no-koɛɛma, n yɩɩd b sẽn sõngd neb tɩ Wẽnnaam tʋʋmd kẽng taoor tẽeb pʋgẽ wã.’ (1 Tɩm. 1:4; 2 Tɩm. 2:23; Tɩt 3:9) Filiyall wall biru ning sẽn get d tʋʋmdã yell dũniyã gill zugã pa tõe n leok sogsg a woto buudã fãa ye. D sũur segd n yɩɩ noogo, Biiblã sẽn kõt-d sagls wʋsg sẽn sek d na bãng n vɩɩmde, la a bas yɛl kẽer n pa wilg tɩ kɩt tɩ d segd n mao n tall tẽeb ne Wẽnnaam sẽn yaa Biiblã soabã.—Ges-y Approchez-vous de Jéhovah sebrã neng 185 la 186.

La y sã n wa tar zu-loɛɛga, n vaees wa y sẽn tõe fãa n baas n pa paam sor-wilgr wall yellã tɩɩm, y maanda wãna? Sã n yaa rẽ, y tõe n tɩ kosa y tẽed-n-taag sẽn tar minim sõngre. Wala makre, y tigingã kãsem soaba. Kãsem dãmbã mii Biiblã sõma, la b mi yɛl toor-toor kiris-nebã sẽn segd me. Y sã n wa segd n dɩk sard wall y welg zu-loɛɛga, sõngr ning b sẽn na n kõ-yã na n zemsa ne-yã. Bala b mi-y-la sõma, n mi y yɛlã sẽn yaa to-to wã. Sẽn paase, y bee ne taaba. Ra tol-y n yĩm-y me tɩ y pa segd n bas a Zeova pʋʋsg ye. Sẽn yɩɩd fãa, wilg-y-yã y yellã, la y kos-a a vʋʋsem sõngã tɩ sõng-y tɩ y tõog n tags tɩrga, bala ‘a Zeova kõta yam la bãngre.’—Yel. 2:6; Luk 11:13.