Dipotšišo tše Tšwago go Babadi

Ke swanetše go dira’ng ge e ba ke na le potšišo ka taba yeo ke e badilego ka Beibeleng goba ge e ba ke nyaka keletšo ka bothata bjo bo ntshwenyago?

Diema 2:1-5 e kgothaletša yo mongwe le yo mongwe wa rena gore a ‘tsome’ kwešišo le temogo bjalo ka ge eka o tsoma “matlotlo a utilwego.” Se se bolela gore re swanetše go katanela go nyakišiša dikarabo tša dipotšišo tša rena tša Beibele le go hwetša ditharollo tša mathata a rena. Re ka dira se bjang?

Puku ya Holwa ke Thuto ya Sekolo sa Bodiredi sa Pušo ya Modimo, matlakala 33 go ya go 38, e ahlaahla sehlogo se se rego: “Kamoo o ka Dirago Nyakišišo ka Gona”; sehlogo seo se bontšha kamoo o ka dirago nyakišišo o diriša ditlabakelo tšeo re di neilwego ke “mohlanka yo a botegago le wa temogo.” (Mat. 24:45) Letlakala 36 le hlalosa kamoo re ka dirišago Watch Tower Publications Index, yeo kgatišo e nngwe le e nngwe ya yona e arogantšwego ka tlhatlamano ya dihlogo le ya mangwalo. Se se dira gore o kgone go nyakišiša o diriša mantšu a motheo goba ditemana tša Beibele gomme o tla hwetša lelokelelo la ditšhupetšo tšeo o tla yago go tšona. O se ke wa fela pelo ge o dutše o nyakišiša karabo ya maleba goba tlhahlo yeo o e nyakago. Gopola gore o tsoma “matlotlo a utilwego,” ao a nyakago nako le boiteko.

Ke therešo gore go na le ditaba tše dingwe le mangwalo a mangwe ao dikgatišo tša rena di sego tša bolela ka ona ka go lebanya. Le gona, le ge re ka ba re hlalositše temana e itšego ya Beibele, re ka ba re sa araba potšišo yeo o ipotšišago yona. Godimo ga moo, dipego tše dingwe tša Beibele di rotoša dipotšišo ka gobane Mangwalo ga se a bolela ditaba ka botlalo. Ka gona, re ka se hwetše dikarabo tša kapejana tša dipotšišo ka moka tšeo re nago le tšona. Boemong bjo bjalo, re swanetše go phema go akanyetša dilo tšeo ge e le gabotse di ka se arabjego gomme ra feleletša re tšere karolo dingangišanong tša “dipotšišo tše di sa rego selo go e na le go nea selo le ge e le sefe se se tšwago go Modimo sa mabapi le tumelo.” (1 Tim. 1:4; 2 Tim. 2:23; Tito 3:9) Ofisi ya lekala le ntlokgolo ya rena ya lefase ka bophara di ka se kgone go hlahloba le go araba dipotšišo ka moka tše bjalo tšeo di sego tša ahlaahlwa ka dikgatišong tša rena. Re ka kgotsofatšwa ke gore Beibele e re nea tsebišo e lekanego yeo e re hlahlago bophelong eupša ga e hlalose ditaba tše dingwe ka botlalo, e lego seo se nyakago gore re be le tumelo e matla go Mongwadi wa yona yo a phagamego.—Bona matlakala 185 go ya go 187 ka pukung ya Batamela Kgaufsi le Jehofa.

Go thwe’ng ge e ba o dirile sohle seo o ka se kgonago go nyakišiša taba yeo e go kgomago eupša o se wa hwetša tlhahlo goba tharollo yeo o e nyakago? Ikwe o lokologile go botšiša modumedigotee le wena yo a godilego ka tsebo, mohlomongwe yo mongwe wa bagolo ba phuthegong ya geno. Ba na le tsebo e tseneletšego ka Beibele le phihlelo ya bophelo bja Bokriste. Ba ka kgona go go thuša ka tsela e lekalekanego ge e ba o nyaka keletšo ka bothata bjo itšego goba o nyaka go dira phetho e itšego, ka gobane ba a go tseba e bile ba kgauswi le wena le go kwešiša boemo bja gago. Le gona o se ke wa lebala go botša Jehofa ka go lebanya ka thapelo ka dilo tšeo di go tshwenyago gomme o mo kgopele gore a go hlahle ka moya wa gagwe o mokgethwa, “[ka gobane] Jehofa o nea bohlale . . . le temogo.”—Die. 2:6; Luka 11:13.