Omapulo Alingwa Novatangi . . .

Oityi ndyina okulinga tyina ndyina epulo konthele yatyimwe natanga mo Mbimbiliya ine tyina nesukisa onondonga konthele yotyitateka tyimwe ndyina?

Provérbios 2:1-5 ilunda kese umwe ‘okutualako okuovolola’ enoñgonoko nokupunga nawa ngatyina tukahi nokuovola “omalumono aholekwa.” Otyo tyilekesa okuti tuesukisa okuenda vali kohi okuovolola omakumbululo omapulo Ombimbiliya nokuvasa omakumbululo ovitateka vietu. Oñgeni matutyilingi?

Omukanda Beneficie-se da Escola do Ministério Teocrático, pomafo 33 alo 38, upopia “Oñgeni Tuna Okuovola” mokuundapesa omikanda tupewa “nomupika wekolelo nokualunguka.” (Mateus 24:45) Pefo 36 uhangununa oñgeni matuundapesa o Índice das Publicações da Torre de Vigia, okutala ononthele mbukahimo mbayapaulwa o índice yonosapi no índice yo notestu. Otyo matyitukuatesako okuovolola onondaka ine onoversikulu mbo Mbimbiliya, mambukuvatela okuvasa omutete apa moovola etyi uhanda. Pwa elundo liokuovolola ekumbululo ine onondonga wesukisa. Hinangela okuti ukahi nokuovola “olumono luaholekwa,” iya otyo tyesukisa omuvo nokulinga ononkhono.

Tyotyili, kuna onosapi mbumwe no notestu mbumwe nkhele mbuhenepopiwe momikanda vietu. Iya namphila pamwe otestu imwe Yombimbiliya yahangununwa, onthwe hamwe katunepopie konthele yepulo ove una. Tupu, omahipululo amwe Ombimbiliya akatula omapulo, mokonda pamwe Onotestu kambahangununine atyiho mbupopia. Ngotyo, katupondola okuvasa liwa-liwa omakumbululo a kese epulo lilingwa. Tuesukisa okulityilika okufanyeka ovipuka vihevilwa okukumbululwa, opo tuhelipake ‘monondaka mbesukisa okukaovololwa, vihakuatesako okulinga ehando lia Huku twii mokonda yekolelo.’ (1 Timóteo 1:4; 2 Timóteo 2:23; Tito 3:9.) Tyilinge ombetele ine onombala mbo Nombangi mba Jeova ouye auho kavapondola okunoñgonoka nokukumbulula omapulo aeho ehenepopiwe momikanda vietu. Tupondola okuhambukwa mokonda Ombimbiliya ituavela onondonga mbutuuka pala okutuhongolela. Mahi kaihangununa atyiho opo tukale nekolelo liapama mu Huku Hekulu Yombimbiliya. Tala momukanda Achegue-se a Jeová, pomafo 185 alo 187.

Oityi molingi inkha waovololale atyiho konthele yotyipuka tyimwe uhanda, mahi nkhele kunevase ehongolelo wesukisa? Upondola okukapopia nomukuatate walongoka nawa hamwe omukulu weuaneno lienyi. Ovakulu ovo vena enoñgonoko enyingi Liombimbiliya nokuna onongeleka onongwa momuenyo wo Vakristau. Inkha wesukisa elondolo konthele yotyitateka tyimwe ine etokolo uhanda okulinga, ombatelo yavo yapola pokati maikukuatesako mokonda vekwi, tupu vekahi popepi yove, nokwi nawa onkhalelo yove. Iya uhalimbueko nalumwe okulikuambela ku Jeova haunene konthele yomasukalalo ove, nokumuita ahongolele omalusoke ove menyina liospilitu sandu, “mokonda Jeova wava ounongo . . . nounongo wokupunga.”—Provérbios 2:6; Lucas 11:13.