Au Uianga a te Aronga Tatau

Eaa taku ka rave me e uianga taku no runga i tetai mea taku i tatau ana i roto i te Pipiria me kore me inangaro tauturu au no runga i toku uaorai manamanata?

Te akamaroiroi maira a Maseli 2:1-5 ia tatou tataki tai “kia makitoro marie” no te marama e te kite mei te mea e te kimi ra tatou i te “apinga uunaia.” Te tauturu maira teia ia tatou kia tauta pakari i te kimikimi i te au pauanga ki ta tatou au uianga Pipiria e kia rauka mai te au tauturu no to tatou uaorai au manamanata. Akapeea tatou me rave i teia?

Te akataka maira te puka Benefit From Theocratic Ministry School Education, kapi 33 ki te 38 e, “Akapeea me Rave i te Kimikimianga” na te taangaanga anga i te au tauturu tei orongaia mai e “te tavini akono meitaki e te pakari.” (Mata. 24:45) Te akamarama maira te kapi 36 akapeea me taangaanga i te Watch Tower Publications Index, e kua akapapaia te reira ki roto i te au papaanga tumu manako e te au papaanga tuatua tapu. Na teia e tauturu mai i te kimi i te au tumu tuatua me kore te au irava o te Pipiria, e ka kite koe i tetai au papaanga ei akara anga naau. E akakoromaki me kimi i te pauanga taka meitaki me kore te aratakianga e anoano ra koe. Kia akamaara e, te kimi ra koe i “te apinga uunaia,” e ka pou te taime e te tautaanga.

E tika, te vai ra tetai au tumu manako e te au irava kare i roto i ta tatou au puka. E noatu e kua uriuri ana tatou i tetai au irava o te Pipiria, penei kare i pauia mai te au uianga taau e manako ra. Pera katoa, kare tetai au papaanga Pipiria i akamarama mai ana i te au mea ravarai i roto i te au Tuatua Tapu. No reira, kare e rauka mai ana te au pauanga ki te au uianga tei uiia mai. I roto i taua turanga ra, auraka tatou e tamanako ua i te au mea kare i pauia mai, kia kore tatou e o atu ki roto i te taumaro anga ‘e tupu ei te māro, e kare e akarongo maroiroi i te Atua.’ (1 Timo. 1:4; 2 Timo. 2:23; Tito 3:9) Kare te opati manga e te opati maata i teianei ao e akara e e pau mai i te au uianga ravarai kare i akamanakoia ake i roto i ta tatou au puka. Kia mareka ua tatou e kua oronga mai te Pipiria i te au akakiteanga ka anoanoia ei arataki ia tatou i roto i te oraanga. Te au mea kare tatou e marama ana, te oronga maira i tetai atianga no tatou kia akaari e te ketaketa ra to tatou akarongo i te Atua e tana Tuatua.​—Akara i te kapi 185 ki te 187 o te puka Akavaitata Atu kia Iehova.

Akapeea me kua rave koe i te au mea ravarai i te kimi i te pauanga te puapinga ra kia koe, e kare ra i kiteia mai te aratakianga me kore te pauanga taau e anoano ra? Aravei atu i tetai taeake pakari, penei tetai tangata pakari i toou ngai. E maata to ratou kite i te Pipiria e te marama no runga i te oraanga Kerititiano. Ka rauka ia ratou i te tauturu ia koe me inangaro koe i tetai tauturu no runga i tetai manamanata me kore ikianga, no te mea kua kite ratou ia koe e toou turanga. E auraka e ngaropoina i te pure kia Iehova no runga tikai i toou au manamanata e e pati kiaia kia arataki i toou manako na roto i tona vaerua tapu, no te mea “ko Iehova oki tei oronga mai i te pakari . . . e te karape.”​—Mase. 2:6; Luka 11:13.