Imibuto Levela Kubafundzi

Yini lokufanele ngiyente nangabe nginembuto ngalokutsite lengikufundze eBhayibhelini nobe nangifuna seluleko ngenkinga lenginayo?

Incwadzi yeTaga 2:1-5, ikhutsata ngamunye wetfu kutsi ‘afunisise’ kucondza kanye nelwati kube shengatsi ufuna ‘umcebo lofihliwe.’ Loku kusho kutsi kufanele sitimisele nangabe sifunisisa timphendvulo temibuto yetfu lesekelwe eBhayibhelini kanye nalapho sifuna sisombululo setinkinga tetfu. Singakwenta njani loko?

Incwadzi letsi “Zuza Emfundweni YeSikole Senkonzo Esingokwasezulwini,” ekhasini 33 kuya ekhasini 38, ichaza indlela yekucwaninga usebentisa emathulusi lesiniketwa wona ‘sisebenti lesetsembekile nalesihlakaniphile.’ (Mat. 24:45) Likhasi 36 lichaza indlela yekusebentisa luhlelo ngalunye lwe-“Watch Tower Publications Index,” lolwehlukaniswe ngetihloko kanye nangeluhla lwemibhalo. Loku kwenta kube melula kucwaninga usebentisa ligama leliyinhloko nobe emavesi eliBhayibheli, bese utfola luhla lwetikhombo longahlola kuto. Beketela njengobe ufuna imphendvulo nobe sicondziso losidzingako. Khumbula kutsi ufuna ‘umcebo lofihliwe,’ lokutsatsa sikhatsi kanye nemandla kuwutfola.

Kuliciniso kutsi kunetihloko kanye nemiBhalo, tincwadzi tetfu letingakake tacoca ngayo. Ngisho nalapho sike salichaza livesi letsite leBhayibheli, kungenteka kutsi sisengakake sacoca ngembuto wena lowucabangako. Lokunye kulandzisa kweliBhayibheli kusenta sibe nemibuto ngesizatfu sekutsi akusiniketi yonkhe imininingwane ngaleyondzaba. Ngaleso sizatfu, asititfoli ngekushesha timphendvulo taleminye imibuto lesinayo. Esimeni lesinjalo, akukafaneli sicombele ngentfo lesingeke sikwati kutfola imphendvulo yayo, futsi kufanele sibalekele “kuphikisana lokungasiti lutfo esikhundleni sekutsi kuphumelelise kusebentela Nkulunkulu ngekukholwa.” (1 Thim. 1:4; 2 Thim. 2:23; Thit. 3:9) Ngisho nelihhovisi leligatja nobe inhloko-hhovisi yemhlaba wonkhe ayikwati kuhlatiya kanye nekuphendvula yonkhe imibuto lokungakake kwakhulunywa ngayo etincwadzini tetfu. Singaciniseka ngekutsi liBhayibheli lisiniketa kwatiswa lokwanele kwekusicondzisa ekuphileni, kodvwa liphindze lingakufaki lokunye kute lisente sibe nekukholwa lokucinile kuMbhali walo losezulwini.—Fundza emakhasi 185 kuya ku-187 encwadzi letsi “Sondela KuJehova,” ngesiZulu.

Kutsiwani nangabe sewente konkhe lokusemandleni akho ucwaninga ngendzaba letsite lekutsintsako, kodvwa solo ungasitfoli sicondziso nobe likhambi lolidzingako? Tive ukhululekile kucoca nemKhristu lovutsiwe, nobe mhlawumbe lomunye walabadzala belibandla lokulo. Banelwati lolubanti ngeliBhayibheli kanye nalokuhlangenwe nako ekuphileni kwebuKhristu. Lusito lwabo lungaba ngulolufanele ikakhulu lapho udzinga seluleko ngenkinga lonayo nobe sincumo lofuna kusitsatsa, ngobe bakwati kahle, basondzelene nawe futsi bayasicondza simo lokuso. Ungakhohlwa kuthandaza ngalokucondzile kuJehova umtjele ngaloko lokukukhatsatako, futsi umcele kutsi acondzise kucabanga kwakho ngemoya wakhe longcwele, ngobe ‘Simakadze uphana ngekuhlakanipha . . . kanye nekucondza.’—Taga 2:6; Luk. 11:13.