Ang Tubag ba Hinungdanon?

“Diyes anyos pa lang ko sa dihang nagsugod kog pakigdeyt. Sa sinugdan, magkuptanay mig kamot ug maghalok. Apan sa wala madugay maghinikapay na mig pribadong parte sa lawas ug mag-eksperimento sa lainlaing paagi sa pakigsekso. Sa 15 anyos ko, nagtrabaho na ko ug dihay mga lalaki sa akong trabahoan nga gustong makigsekso nako. Misundog ko sa binuhatan sa akong mga kauban kay dili ko gustong ingnong talawan. Gusto nakong dawaton ko nila, mao nga migrabe ang akong pag-eksperimento sa sekso.”​—⁠SARAH, * AUSTRALIA.

DILI ka ba makurat kon sultihan ka nga si Sarah nagdako sa relihiyosong pamilya? Ang iyang ginikanan naningkamot sa pagmatuto kaniya sumala sa moral nga sukdanan sa Bibliya. Apan siya mitipas.

Daghan ang mouyon sa gibuhat ni Sarah. Sila nagtuo nga kinaraan na ang panglantaw sa Bibliya bahin sa sekso. Alang sa uban, dalawaton ra ang kinabuhing mapatuyangon sa sekso bisag ang usa relihiyoso.

Hinungdanon ba nga mahibalo kon unsay gitudlo sa Bibliya bahin sa sekso ug magkinabuhi sumala niana? Ang Bibliya nag-ingon nga kini “inspirado sa Diyos ug mapuslanon sa pagpanudlo.” (2 Timoteo 3:16) Kon nagtuo ka nga gilalang sa Diyos ang tawo ug ang Bibliya maoy iyang inspirado nga Pulong, nan angay nimong mahibaloan ang giingon niana bahin sa sekso.

Ikasubo, daghan ang naglibog kon unsa gyoy gitudlo sa Bibliya bahin sa sekso. Ang mga lider sa relihiyon nga nangangkong nagtahod sa Bibliya nagtudlog nagkasumpaking mga ideya. Gani, kini nga isyu nakapabahin sa dagkong relihiyon.

Imbes motuo sa gisulti sa uban, nganong dili mogugol ug panahon sa pagsusi kon unsay gitudlo sa Bibliya bahin niana? Ang sunod nga artikulo maghisgot sa napulo ka pangutana nga sagad isukna bahin sa panglantaw sa Bibliya sa sekso. Nianang artikuloha imong makita ang prangkang mga tubag nga gipasukad sa Bibliya. Ang kataposang artikulo niini nga serye maghisgot kon nganong hinungdanon ang mga desisyon nga atong himoon.

[Footnote]