Importante Bala Mahibaluan ang Sabat?

“Pulo pa lang ako ka tuig, naga-date na ako. Sang primero, nagauyatay lang kami sang kamot kag nagahalukay. Pero sang ulihi, nagahikapay na kami sang pribado nga parte sang amon lawas kag nagaeksperimento sa sex. Sang 15 anyos ako, nagatrabaho na ako kag ginahagad ako sang mga katrabaho ko nga lalaki nga mag-sex. Gusto ko tilawan ang tanan nga ginahimo sang akon mga katrabaho. Gusto ko nga batunon nila ako, gani labi ako nga naganyat sa sex.”—SARAH, * AUSTRALIA.

MAHIMO makibot ka kon mahibaluan mo nga si Sarah naghalin sa isa ka relihioso nga pamilya. Gintinguhaan sang iya mga ginikanan nga padakuon sia sa mga prinsipio sang Biblia. Pero lain nga kabuhi ang iya ginpili.

Madamo ang magaugyon sa ginpili ni Sarah. Nagapati sila nga indi na uso ang pagtamod sang Biblia parte sa sex. Para sa iban, wala sing malain kon paayawan sang isa ka relihioso nga tawo ang iya kaugalingon sa sex.

Importante bala nga hibaluon mo kag sundon ang ginatudlo sang Biblia parte sa sex? Ang pagsulat sang Biblia ‘gintuytuyan sang Dios kag mapuslanon sa pagpanudlo.’ (2 Timoteo 3:16) Kon nagapati ka nga gintuga sang Dios ang mga tawo kag ang Biblia amo ang iya Pulong, importante nga mahibaluan mo ang ginsiling sini parte sa sex.

Makapasubo nga madamo ang naligban kon ano ang ginatudlo sang Biblia parte sini. Ang mga lider sang relihion nga nagapangangkon nga nagarespeto sa Biblia, may lainlain nga ideya parte sini. Ang matuod, wala nagaugyunay ang dalagku nga mga relihion sa sini nga isyu.

Sa baylo nga patihan ang ginasiling sang iban, ngaa indi mo paghibaluon ang ginatudlo sang Biblia parte sini? Binagbinagon sang masunod nga artikulo ang pulo ka pamangkot parte sa pagtamod sang Biblia sa sex. Makita mo sa sina nga artikulo ang prangka nga mga sabat nga nabase sa Biblia. Ang katapusan nga artikulo parte sini nga topiko magabinagbinag kon ngaa dapat naton sundon ang mga prinsipio sang Biblia.

[Nota]