A Chhânna Hriat A Pawimawh Em?

“Kum sâwm mi lek ka nih aṭangin mipa ka kawp ṭan a. Atîrah chuan kan invuanin, kan infâwp mai chauh va. Mahse, a hnu lawkah chuan kan kal thui lehzual a, kan taksa pêngte inkhalhsakin, mipat hmeichhiatna lam hawi thil chi hrang hrangte chu kan tichhin ta a ni. Kum 15 mi ka nih chuan, hna ka thawk ṭan a, ka hna thawhnaa mipate chuan mipat hmeichhiatna hmanpui tûrin min rawn pan ṭhîn a. Tih ngam loh nei lo nih ka duh avângin, ka hnathawhpuite tih apiang chu ka ti ve mai zêl a. Ṭhiante zînga len ve ka duhna chuan mipat hmeichhiatna lam min dai thûktîr telh telh a ni.”—SARAH-I, * AUSTRALIA.

SARAH-I chu sakhaw ngaihsak tak chhûngkuaa sei lian a ni tih hre ta la mak i ti ang em? A nu leh pate chuan nungchang lama Bible tehnate mila nung tûrin theihtâwp chhuahin an enkawl a. Mahse, kawng dang a thlang tlat a ni.

Mi tam tak chuan Sarah-i duhthlanna chu an ṭâwmpui ngei ang. Anni chuan mipat hmeichhiatna chungchânga Bible thlîr dân chu a hmân lai tawh lutukah an ngai a. Mi dangte chuan sakhaw ngaihsak mi tak anga inlantîr chunga mipat hmeichhiatna lama lepchiah taka khawsak chu a inkalhin an hre lo.

Mipat hmeichhiatna chungchânga Bible zirtîrna hriat leh chu mi mila nun leh nun loh chu i tân thil pawimawh a ni em? Bible chu ‘Pathian thâwk khuma pêk, zirtîr kawnga sâwt tak’ niin a inchhâl a. (2 Timothea 3:16) Pathianin mihringte a siam tih leh Bible hi a thâwk khum Thu a ni tih i rin chuan, he mi chungchânga Bible thusawi hi i tân hriat phû tak a ni ngei ang.

Vânduaithlâk takin, mi tam tak chuan mipat hmeichhiatna chungchânga Bible zirtîrna hi an hre chiang lo hle. Bible zahna thûk tak neia inchhâl sakhaw hruaitute chuan he mi chungchângah hian ngaih dân inkalh chi hrang hrang an zirtîr a. Hei hian kohhran lian tam tak pawh a phel darh hial a ni.

Mi dangte sawi rin mai ai chuan, engvângin nge mahni ngeia enfiah nân hun tlêm azâwng i hman loh vang? A dawta thuziak chuan Bible-in mipat hmeichhiatna a thlîr dân chungchânga zawhna zawh fo ṭhin sâwm a rawn târ lang ang a. Chutah chuan Bible zirtîrna dik tak ṭanchhan chhânna chiang tak takte i hmu dâwn a ni. He thuziak inzawm tâwpna ber hian kan duhthlanna siam hian pawimawhna a nei hle tih a rawn sawifiah bawk ang. (w11-E 11/01)

[Footnote]