“Jatsë nety njëmëjt mäjk kojëts mëdë yaˈayˈënäˈk njëdijttsondaky. Tim jawyiin jeˈeyëts naygyëˈëmëmatsëdë ets naytsyuˈkxëdëts, per ok, tajëts naytyoon naymyäjtsëndë mumaty. Kojëtsë njëmëjt nmëdäjty 15, tajëts ndëjkë tuumbë, ets xyˈanmääynyëbëtsë yetyëjk parëts mëët ntsëënët. Nˈijxmatsaambyëtsë nety ets ndunaambyëts tijaty tyuundëp ja nmëguˈuktëjkëts. Ets parëts xykyupëktët, tajëts niˈigyë tijaty nduuny mä ijt tsënaaky.” (SARA, AUSTRALIA) *

WAˈAN mëjmëdoy xyjawët ko Sara jam ojts yeeky mä tuˈugë familyë diˈib tyukˈijtëbë relijyonk. Tyääk tyeety jatukniˈˈijxëdë wiˈix oy jyukyˈatët extëmë Biiblyë jyënaˈany, perë Sara wiink tuˈu myäjts.

Mbäät mayë jäˈäy wyinmaytyë ko oy diˈibë Sara tyuun, pes jyënäˈändë ko të nyidiempë nyäjxnë extëmë Biiblyë tmaytyaˈagyë ijt tsënaaky. Ets ta net diˈib winmääytyëp ko kyaj wyiˈixëty ets tuˈugë jäˈäy ttukˈitëdë relijyonk ets dyajtunëdë nyiniˈkx kyëbäjk wiˈix ttimtseky.

Per ¿oyëdaa ko nnijäˈäjëm ets nbaduˈunëm wiˈixë Biiblyë jyënaˈany mä ijt tsënaaky? Biiblyë jyënaˈany ko “Dios wyinmäˈänymyooy ja jyaˈayëty es tkëxjäˈäyët tëgekyë ja Diosë jyaaybyajtën, es [...] tuump oy [parë] nyaˈëxpëjkëm” (2 Timotee 3:16). Pääty pën nmëbëjkëm ko Dios yëˈë të xyajkojëm ets ko Biiblyë yëˈë yˈayuk, oy ko nnijäˈäjëm wiˈix jyënaˈany.

Jotmay myëët njënäˈänëm ko näägë jäˈäy kyaj yajxon tnijawëdë wiˈixë Biiblyë jyënaˈany mä ijt tsënaaky. Axtë wintsëndëjk diˈib jënandëp ko wyintsëˈkëdëbë Biiblyë wiˈixëm tnimaytyäˈäktë. Ets ko kyaj tuk nax wyinmaytyë, ta mayë relijyonk nyaywyaˈkxyëty diˈib mëj ijtp.

Per en lugäär nmëbëjkëm wiˈixë jäˈäy wyinmaytyë, ¿këdii oyxyëp ko këˈëm nbayoˈoyëm wiˈixë Biiblyë jyënaˈany mä ijt tsënaaky? Mä ja tuˈukpë artikulo tmëminy mäjkë yajtëˈëwën diˈib yaˈˈatsoojëmbijtp mä Biiblyë. Ets mä myëdëgëëkpë artikulo jap yajnimaytyaˈaky tiko jyëjpˈamëty ets niduˈuk niduˈuk nwinmäˈäyëm ti net ndunäˈänëm.

[Notë diˈib noky ëxˈääy]