Okuti Ekumbululo Liesukisa?

“Ame nahimbika okukaenda-enda novakuendye etyi ankho ndyina omanima ekwi. Potete, ankho tulikuata vala momaoko, nokuliavela onombesinyu. Konyima, atuhimbika okulikuata mononthele ononkhuavo mbolutu nokulinga apeho otyihola. Etyi natuukisa omanima 15, nahimbika okuundapa iya andyilingi oupanga nomulume umwe kovilinga ankho unthyanda. Ankho ndyihanda okukala omunthu wahumbua nokuliwaneka navana ndyiundapa navo, movipuka aviho valinga. Ankho ndyihanda okutavelwa navo, iya otyo atyinthuala kokulinga vali unene otyihola.”—SARAH, a AUSTRALIA.

OKUTI tyikuhuvisa okunoñgonoka okuti Sarah wekulila meumbo lio Vakristau? Ovohe, valinga ononkhono mbo kumulongesa ovitumino Viombimbiliya konthele yovituwa oviwa. Mahi, Sarah waholovona ondyila onkhuavo.

Ovanyingi vapondola okupopia okuti etyi tyalinga Sarah tyaviuka. Vetavela okuti etyi Ombimbiliya ipopia konthele yotyihola katyilikuate nouye wohono. Ovakuavo vasoka okuti katyapengele okuenda apeho kongeleya nokulinga otyihola na kese munthu.

Okuti kuove tyesukisa okunoñgonoka nokulandula etyi Ombimbiliya ilongesa konthele yotyihola? Ombimbiliya ipopia okuti oyo “yatumwa okuhonekwa na Huku nokuna esilivilo pala okulongesa.” (2 Timóteo 3:16) Inkha utavela okuti Huku walinga ovanthu, nokuti Ombimbiliya Ondaka yae atuma okuhoneka, ngotyo wesukisa okunoñgonoka etyi ilongesa konthele yotyihola.

Mahi, ovanyingi vangwangwana netyi Ombimbiliya ilongesa konthele yotyihola. Ononkhalamutwe mbonongeleya vapopia okuti vena onthilo Nombimbiliya, mahi vena omalusoke elikalela konthele yotyihola. Tyotyili, otyo tyikahi nokuyapaula onongeleya ononyingi ononene.

Omokonda yatyi uhaovolela ove muene etyi Ombimbiliya ilongesa konthele yotyihola, tyipona okuyumba vala onthumbi muetyi vakuenyi vapopia? Onthele ilandulako ipopia omapulo ekwi ehole okulingwa konthele yoñgeni Ombimbiliya itala otyihola. Monthele oyo movasimo omakumbululo ayandyuluka alekesa etyi Ombimbiliya tyili ilongesa. Onthele yahulililako maipopi omokonda yatyi etyi tuholovona tyesukisa.

[Onondaka Poutoi]