Pasapeng kan Kesempwal?

“I tepida iangih pwutak ahnsou me I sounpar eisek. Nin tapio, ihte me se kin wia iei kolpeh oh mpoake. Ahpw mwuri ekis, se kin tepida doahke at dipwisou en kaparapar kan oh pil kin song wia soangsoangen wiepe kan en wendipene. I tepida doadoahk en mwohni ahnsou me I sounpar 15 oh ohl tohto me iang ie doadoahk kin men sen wia nsenen pwopwoud. I kin akkommwad oh iang iengei tohndoadoahk kan wia soahng koaros me re kin wia. I men iengei kan en kin pwungkin ie, oh met kalaudehla ei pil kin iang wia soangsoangen wiepe kan ong wia nsenen pwopwoud.”​—SARAH, * AUSTRALIA.

KE PAHN pwuriamweiki Sarah eh tikida nan peneinei poadidi ehu? Eh pahpa nohno kin kakairada ih en mourki kaweid en Paipel me pid tiahk mwahu. Ahpw Sarah pilada ehu mour tohrohr.

Me tohto pahn pwungki en Sarah eh pilipil. Irail kamehlele me dahme Paipel mahsanihki duwen wia nsenen pwopwoud sohla konehng atail ahnsou. Ekei sohte kin medewe me e sapwung en wia aramas poadidi men oh pil kin saledek en wia mouren nenek.

Ia duwe, e kesempwal kitail en ese oh idawehn dahme Paipel padahngki duwen wia nsenen pwopwoud? Paipel kin “pwilisang rehn Koht, oh e mwahu ong atail doadoahk en padahkihong aramas akan me mehlelo.” (2 Timoty 3:16) Ma ke kamehlele me Koht me ketin kapikada aramas akan oh me Paipel iei sapwellime Mahsen, eri e kesempwal ken ese dahme e mahsanihki duwen ire wet.

Ahpw me tohto kin pingkihda duwen dahme Paipel padahngki me pid wia nsenen pwopwoud. Padahk en kaunen pelien lamalam akan me pid wia nsenen pwopwoud kin wekpeseng oh re kin nda me arail padahk kan kohsang nan Paipel. Ni mehlel, ire wet katohrepesengehr pelien lamalam kan me pali laud en aramas akan kin iang.

Dahme ke sou mweidohng ahnsou ken pein kasawih duwen ire wet ahpw ieremen nohk likihala dahme meteikan kin nda. Iren mwurio pahn koasoia peidek eisek me aramas akan kin kalapw idek me pid dahme Paipel mahsanihki duwen wia nsenen pwopwoud. Nan ireo ke pahn diar pasapeng inen kan me kohsang dahme Paipel uhdahn padahngki. Kaimwiseklahn oaralap me pid ire pwukat pahn koasoia dahme kahrehda pilipil kan me kitail wiahda kin kesempwal.

[Nting tikitik me mi pah]