Anga hẽ Etambululo liaco li Kuete Esilivilo?

“Eci nda fetika oku enda lakuenje, nda kuata ekũi kanyamo. Kefetikilo, tua enda ño oku likuata peka kuenda oku lisipula. Noke tua fetika oku likuata kuata kovimatamata vikuavo vietimba kuenje tua seteka oku lipekela volonepa vialua. Eci nda kuata 15 kanyamo, nda fetika oku talavaya kupange woku sanda eteku, kuenje nda kuata ukamba lalume valua va yongola oku lipekela. Nda yonguile oku lekisa utõi kuenda oku likongela lakamba vaco kovina viosi va yongola oku linga. Omo okuti nda yonguile oku va sanjuisa, nda seteka olonjila vialua vioku lipekela.”—SARA, * KOFEKA YO AUSTRALIA.

ANGA hẽ oku kũlĩha okuti Sara wa citiwila vepata limue okuti vakuetavo, ci ku komõhisa? Olonjali viaye via seteka oku u longisa olonumbi Viembimbiliya viatiamẽla kovituwa viwa. Pole, Sara wa nõlapo oku kuama onjila yaye.

Omanu valua ka va pisa onjila Sara a nõlapo oku kuama. Ovo va popia hati, olonumbi Viembimbiliya viatiamẽla koku lipekela, ka vi tiamisiwila vali koloneke vilo. Vakuavo ka va kũlĩhĩle okuti oku kala ukuetavo ci li patãla loku ambata omuenyo wukahonga.

Anga hẽ ci kuete esilivilo oku kũlĩha, loku pokola kueci Embimbiliya li longisa catiamẽla koku lipekela? Ovisonehua Viembimbiliya, “ovitumasuku kuenje vi silivila oku longisa.” (2 Timoteo 3:16) Nda ove o tava okuti Suku eye wa lulika omanu, kuenda okuti Embimbiliya Ondaka yaye, o ka sanjukila oku kũlĩha eci olio li popia catiamẽla kondaka yaco.

Ci sumuisa calua omo okuti vamue ka va kũlĩhĩle eci Embimbiliya li longisa catiamẽla koku lipekela. Ovitunda vietavo vina vi popia hati via sumbila Embimbiliya, ka via siatele oku longisa ocili catiamẽla koku lipekela ndomo ca lekisiwa Vembimbiliya. Alongiso aco a siata oku tatamisa atavo alua.

Momo lie ku konomuisila ove muẽle ondaka yaco vakukutu amue oco ku ka kuame ño eci vakuẽle va popia? Ocipama ci kuãimo, ci ka lombolola apulilo ekũi a siata oku votuiwa lomanu atiamẽla kueci Embimbiliya li longisa kondaka yoku lipekela. Vocipama caco, o ka sangamo atambululo atiamẽla kueci Embimbiliya li longisa. Ocipama ca sulako ci ka lombolola esunga lieci olonjila tu nõla vi kuetele esilivilo.

[Etosi Pombuelo Yemẽla]