He Oyshaa Zaaroy Qoppana Bessiyaabee?

“Attuma naatuura allaxxiyoogaa doommiyo wode taayyo layttay tamma. Koyro heeran issoy issuwaa yeroosinne kushiyaa oyqqoos. SHin hegaappe takkennan, issoy issuwaa pokkuwaa oyqqiyoogaanne pokkoba gidida darobaa oottiyoogaa doommida. Tau layttay 15 kumiyo wode, oosuwaa oyqqaas: qassi tanaara oottiya attuma asati etaara asho gaytotettaa polanaadan tana oychidosona. Tanaara oottiyaageeti haniyo ubbabaa hananaunne daafan yeggiyaabaakka xalan oottanau koyaas. Ta laggeti tana dosanaadan koyaas; hegee qassi asho gaytotettaara gayttida darobaa taani mala beˈanaadan oottiis.” —SAARO, * AWUSTTIRAALIYAA

SAARA diccidoy haymaanootiyaa mintti kaalliya keettaana gidiyoogaa eriyaakko neeni garamettikkii? O yelidaageeti, a Geeshsha Maxaafaa kandduwaa maaraa naagada deˈanaadan dichanau baaxetidosona. Gidikkokka, Saara hegaadan deˈabeykku.

Daroti Saariigaa mala deˈuwaa dooroosona. Eti asho gaytotettaa xeelliyaagan Geeshsha Maxaafay yootiyoobay ha wodiyan koshshennabadan qoppoosona. Harati qassi issi uri haymaanootiyau aqaas giiddi bessenna asho gaytotettaa polin aynne baawa giidi qoppoosona.

Asho gaytotettaa xeelliyaagan Geeshsha Maxaafay tamaarissiyoobaa eriyoogeenne hegaadan deˈiyoogee qoppana bessiyaabee? Geeshsha Maxaafan ‘Xoossaa ayyaanay deˈiyoogaa, qassi i tumatettaa tamaarissanau maaddiyoogaa’ Xoossaa Qaalay yootees. (2 Xim. 3:16, 17) Neeni, asaa medhiday Xoossaa gidiyoogaa, qassi Geeshsha Maxaafay Xoossaa ayyaanay denttettin xaafettidoogaa ammaniyaaba gidikko, asho gaytotettaa xeelliyaagan Geeshsha Maxaafay woygiyaakko eriyoogee bessiyaaba.

SHin, Geeshsha Maxaafay asho gaytotettaa xeelliyaagan tamaarissiyoobay darotussi kirqqi giidoogee azzanttiyaaba. Geeshsha Maxaafaa bonchoos giya, haymaanootiyaa kaalettiyaageeti issoy issuwaara phalqqettiya qofaa tamaarissoosona. Ubba, ha allaallee waannatiya, daro haymaanooteti shaahettanaadan gaaso gidiis.

Haraati giyooban ammanettiyoogaappe, guutta wodiyaa immada ha allaalliyaa neeni ne huuphe aybissi pilggikkii? Geeshsha Maxaafay asho gaytotettaa xeelliyaagan tamaarissiyoobaara gayttidaagan darotoo denddiya tammu oyshata, kaalliya huuphe yohuwan beˈana. Geeshsha Maxaafay tumuppe tamaarissiyoobaa kaafiya qoncce zaaruwaa he huuphe yohuwan beˈana. Ha sintta huuphe yohotun wurssettaagee, nuuni oottanau dooriyoobaa keehippe qoppana koshshiyoy aybissakko qonccissees.

[Tohossa qofaa]