Bay Fan e Fulweg Riy, Fa?

“Nap’an ni gaman ragag e duw rog, mu gu un ko fager. Som’on e gamow ma kol paef ngemu’ ma gamow be kiss. Munmun mu ug mathgow nga yu yang u dowmow ma gamow be gay rogon i rin’ boch ban’en ni ma rin’ e piin pumoon nge ppin. Nap’an ni gaman 15 e duw rog, mu gu un ko maruwel. Ba ga’ ni ma yib i non e pumoon ngog ni gamad nga maruwel ni yad baadag ni nggu pared. Gu baadag ni nggu rin’ boch ban’en ni nga i gin e girdi’ ngay ma gu ma un ko girdi’ ni gamad nga maruwel ko pi n’en ni yad ma rin’. Gu baadag ni nggu fel’ u wan’ e piin ni gu ma chag ngorad me munmun mu gu un i rin’ boch ban’en ni bay rogon ko par ko pumoon nge ppin.”​—SARAH, a AUSTRALIA.

GUR, ga ra gin ngay ni ga ra nang ni Sarah e kan chuguliy u ba tabinaw ni girdi’ riy e ba m’ing ko teliw? Gallabthir rok e yow ma athamgil ni ngar filew e pi kenggin e motochiyel nu Bible ngak. Machane, ke mel’eg Sarah reb e kanawo’ nib thil.

Boor e girdi’ ni baadag e n’en ni ke mel’eg Sarah. Yad ma lemnag ni n’en ni be yog e Bible u murung’agen e par ko pumoon nge ppin e dakuriy angin ngodad e ngiyal’ ney. Boch e girdi’ e darur lemnaged ni bay e kireb riy ni faanra ba m’ing be’ ko teliw rok ma ka be un ko ngongol ndarngal.

Gur, ba ga’ fan ni ngam nang mag fol ko n’en ni be fil e Bible u murung’agen e par ko pumoon nge ppin? Be yog e Bible ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad.” (2 Timothy 3:16) Faanra ba mich u wan’um ni Got e sunmiy e girdi’ ma thin rok e bay u Bible, ma ba t’uf ni ngam nang e n’en ni be weliy u murung’agen e par ko pumoon nge ppin.

Machane, boor e girdi’ ni ke balyangan’rad ko n’en ni be fil e Bible u murung’agen e par ko pumoon nge ppin. Pi tayugang’ ko teliw e yad ma yog ni yad ma tayfan e Bible. Machane ba thilthil e n’en ni yad be fil u murung’agen e re n’ey. Bochan e re n’ey ma boor raba’ e teliw ni kar ruw raba’gad.

Mang fan ndab mu fal’eg i gay murung’agen e re n’ey ko bin ni nge pagan’um ko n’en ni be yog boch e girdi’? Bin migid e article e ra weliy ragag e deer u murung’agen e n’en ni be yog e Bible ni bay rogon ko par ko pumoon nge ppin. U lan e re article nem e gad ra pirieg e fulweg riy nib tamilang ni bay rogon ko n’en ni be fil e Bible. Bin tomur e article e be weliy ko mang nib ga’ fan e n’en ni gad ra dugliy.

[Footnote]