¿Kʼaʼabéet wa k-ojéeltik u núukil?

«10 jaʼaboʼob yaanten ka káaj u yantal in novioʼob. Ka káajeʼ chéen k-machik k-kʼab yéetel k-tsʼuʼutsʼikba, baʼaleʼ maʼ xáanchaj ka joʼopʼ k-machikba tak tuʼuxoʼob maʼ unajiʼ. 15 jaʼaboʼob yaanten ka káaj in meyaj yéetel tsʼokaʼaniliʼ u káajal u yaʼalaʼalten tumen uláakʼ xiiboʼob ka yanak baʼax in wil tu yéeteloʼobiʼ. Taak kaʼach in beetik le baʼax ku beetik xan in wéet meyajoʼoboʼ. Le oʼolaleʼ utiaʼal in lúubul utsil tiʼobeʼ káaj in practicartik jejeláas baʼaloʼob yaan yil yéetel sexo.» (SARA, AUSTRALIA) *

MAʼ XAANEʼ jeʼel u jaʼakʼal a wóol a wojéeltik Saraeʼ líikʼ ichil junpʼéel familia yaan u religión. Kex u taataʼob tu kaʼansoʼobtiʼ le baʼaxoʼob ku yaʼalik le Bibliaoʼ, letiʼeʼ tu chʼaʼtuklaj u beetik yaanal baʼal.

Maʼ xaan xaneʼ yaʼab máaxoʼob ku tuklikoʼob maʼ kʼaas le baʼax tu chʼaʼtuklaj u beetik Saraoʼ, tumen ku tuklikoʼobeʼ le baʼax ku yaʼalik le Bibliaoʼ maʼatech u yáantik máak bejlaʼeʼ. Uláakʼoʼobeʼ ku tuklikoʼobeʼ jeʼel u páajtal u yantal u religión máakeʼ yéetel u beetik jeʼel baʼalak yaan yil yéetel sexoeʼ.

Baʼaleʼ, ¿maʼalob wa ka k-beet baʼax ku yaʼalik le Biblia yéetel k-ojéeltik baʼax ku yaʼalik yoʼolal le sexooʼ? Le Bibliaoʼ ku yaʼalikeʼ«Jajal Dios tsʼáa tiʼ tuukul utiaʼal ka tsʼíibtaʼak, maʼalob xan utiaʼal kaʼansaj» (2 Timoteo 3:16). Bey túunoʼ wa juntúul máak ku creertik Dios beetoʼon yéetel ku creertik Dios beet u tsʼíibtaʼal le Bibliaoʼ unaj xan u beetik baʼax ku yaʼalik le Bibliaoʼ.

Baʼaleʼ bejlaʼeʼ yaʼab máakoʼob maʼ jach u yojloʼob baʼax ku yaʼalik le Biblia yoʼolal le sexooʼ. Tak le máaxoʼob nuʼuktik le religionoʼob yéetel ku yaʼalikoʼob ku respetartkoʼob le Bibliaoʼ yaanal baʼaloʼob ku yaʼalikoʼob. Le baʼaloʼobaʼ tsʼoʼok tak u beetik u pʼektikuba le religionoʼob maas nuuktakoʼ.

Baʼaleʼ, tu lugar k-beetik u cuentail le baʼaxoʼob ku yaʼalik u maasiloʼ ¿máasaʼ maas maʼalob ka k-il wa jaaj le baʼax ku yaʼalaʼaloʼ? Le uláakʼ xookoʼ ku taasik diez kʼáatchiʼob jach suuk u beetaʼal yoʼolal le sexooʼ, tsʼoʼoleʼ ku núukik yéetel le Bibliaoʼ. Tu tsʼook xook le jaatsaʼ ku tsolik baʼaxten jach kʼaʼabéet le baʼax ken k-chʼaʼtukult k-beetkoʼ.

[Tsolajil]