Biblia loko kwo

ANG’O m’ucwalu jatuk tuko mi sente man jayak dhanu niweko kura maeno man niloko kwo pare? Kesom lembe m’ebekoro.

“Agam amaru ng’wec ma ku kana lee dit”​—RICHARD STEWART

ORO MI NYOLIRI PARE: 1965

NG’OM MA THUGI: JAMAIKA

CON EBINO: JATUK TUKO MI SENTE MAN JAYAK DHANU

KWO PARA MA CON: Adongo i pacu moko mi can, ma dhanu pong’ lee i iye i Kingston, adhura ma dit mi Jamaika. Dhanu ma dupa gikoso tic man lembe ma reco unyay lee. Jutim rac uketho dhanu ubed ukwo kwa i lworo. Abed awinjo dwand atum kubang’ ceng’.

Mama ubed utimo tic ma tek pi nigwoko umira ma nyanok, nyamira man bende an. Ebed emito enen nia wanwang’u ponji ma cuu. Agam amaru somo nyanok, ento pi tuko mi ringo ku kana re ubino tek lee i iya. Abed apiey kud i somo man acidho kaka ma juringo i iye ku kana. An de acaku ringo ku kana.

I ng’eye aroyara zoo i nyotho sente iwi tuko mi ringo ku kana. A kwo kit kwo mi sasa, adoko ni umarmon. Abed amadhu taba ma lake tek ma marijuana man abed akwalu kwo pi niwang’u sente mi timo parane. Abedo kud atum lee, ento abedwoko foyofoc nia ng’atu moko mbe m’utho i kind ayeki ma dupa ma adikara i iye.

I ng’eye, polisi umaka man utera i kol pi lembe ma reco ma atimo. Kinde ma jugonya, acaku kura para mir ayekine kendo. I andha, cwinya doko rac nikadhu m’iwang’e de. Abed anen ni dhanu ma ber, karaman atie ng’atu ma cwinye rac, jang’eycwiny, man janek. Abed adieng’ kwa pira gira.

KITE MA BIBLIA ULOKO KO KWO PARA: I kind nindo ma rac maeno mi kwo para, mama uponjo Biblia man edoko Jamulembe pa Yehova. Alokaloka ma beco ma etimo i kwo pare utelo nen para. Anwang’u nia mito akenyang’ i gin m’uloko kwo pa mama, e acaku weco iwi Biblia ku Jumulembe pa Yehova.

Anwang’u nia ponji mi Jumulembe pa Yehova ukoc ku mi dini mange man anwang’u nia lembe ma giponjo ujengere iwi Biblia. Gin kendgi re ma gibino dhanu ma ang’eyo m’ubed urweyo ot kubang’ ot, tap calu ma Jukristu ma kwong’a ubed utimo. (Matayo 28:19; Tic mi Jukwenda 20:20) Anyang’ nia anwang’u dini mandha kinde m’aneno mer m’umbe kud umbili i iye ma gibino nyutho i kindgi.​—Yohana 13:35.

Gin ma aponjo i Biblia uketho aneno nia mito atim alokaloka ma lee i kwo para. Anyang’ nia Yehova udagu tarwang’ man tekene abemito atim ire, acikara niweko timo ma reco m’ubenyotho kuma. (2 Jukorintho 7:1; Juebrania 13:4) Aponjo nia timo para copo nyayu mutoro kunoke can i i Yehova. (Lembrieko 27:11) E ang’iyo nijigo madhu marijuana, nibayu atum para cen, man nipimo niloko loko kura para. I kind alokaloka ma timo ubino tek ma re atuc nitimo utie niweko lembsasa mi tarwang’ man niketho sente iwi tuko.

I acaki, amito ngo jurimba ung’ey nia abeponjo Biblia ku Jumulembe pa Yehova. Ento lembe lokere i ng’ei m’asomo Matayo 10:33, ka ma Yesu uyero i iye kumae: “Ento ng’atu ma tek ukwera i wang’ dhanu, an de abikwere i wang’ Vwa m’i polo.” Wec maeno ucwala ninyutho igi nia abeponjo Biblia ku Jumulembe pa Yehova. Lembene timogi rac mandha. Giyiyo ngo nia ng’atu ma ve an ubemito doko Jakristu. Ento anyutho igi kamaleng’ nia abitimo ngo kendo lembe mi kit kwo para m’ukadhu.

BERO M’ANWANG’U: Anyong’a nego mama lee kinde m’eneno acaku kwo nimakere ku cik mir ukungu mi Biblia. Kawoni dong’ lworo nege ngo nia abitimo lembe ma rac. Kawoni dong’ waweco iwi lembe acel m’ubedikowa: mer ma wamaru ko Yehova. Saa moko, kan abeparu pi kite m’abino ko, ayiyo ngo nia atuc nitimo alokaloka maeno ceke ku kony pa Yehova. Ava kwo mi lemb sasa man mi maru piny hai ma abed akwo i iye nega ngo nyanok dee.

Ka nwang’u ajolo ngo lembe m’i Biblia, nwang’u nyo atho kunoke ani kol tin eni. Ento tin, atie ku juruot ma ber ma weg anyong’a. Atie kud anyong’a nitimo ni Yehova karacelo ku min ot para ma tielo cwinya man nyara ma wor. Adwoko foyofoc ni Yehova kum eketho atie acel m’i kind umego ku nyimego ma Jukristu man ma weg mer. Atie bende kud anyong’a nia ng’atu moko utimo kero pi niponja ku lemandha m’i Biblia. Man aneno nia etie lembe ma pire tek niponjo dhanu mange ging’ey lembe ma Biblia ubeponjo. Akecane abedwoko foyofoc ni Yehova Mungu pi mer pare ma yawe mbe m’etela ko i bang’e.

[Paru ma nwang’ere]

“Aponjo nia timo para copo nyayu mutoro kunoke can i i Yehova

[Cal]

Ku dhaku para man nyathin mwa ma nyaku

[Cal]

Aneno mama utimo alokaloka dupa ma bec