Baibolo Ilaalula Abantu

CINSHI calengele ukuti umuntu uwali icipondo kabili uwatemenwe icangalo ca kushitikapo indalama aleke imisango yakwe? Belengeni ifyo umwine ashimika.

“Nalitemenwe Sana Icangalo ca Kucimfyanya Pali Bakabalwe.”—RICHARD STEWART

UMWAKA BAFYELWE: 1965

ICALO: JAMAICA

IFYO BALI: BALITEMENWE SANA ICANGALO CA KUSHITIKAPO KABILI BALI CIPONDO

INKULILO YANDI: Nakuliile mwi tauni lya Kingston, umusumba ukalamba uwa calo ca Jamaica. Muli uyu musumba mwali sana ubupiina kabili mwali abantu abengi nga nshi. Abengi tabalebomba incito, kabili mwalifulile sana na bumpulamafunde. Mwali utumabumba twa fipondo utwalengele abantu ukulaikala fye mwenso mwenso. Mupepi fye na cila bushiku naleumfwa ukulila kwa mfuti.

Bamayo balebombesha nga nshi pa kuti balesakamana fwe bana, ine, umwaice wandi umwaume, na nkashi yandi. Balibikileko sana amano ku kutusambilisha. Nshatemenwe isukulu, natemenwe sana icangalo ca kucimfyanya pali bakabalwe. Nalelofwa ku sukulu no kuya ku cibansa ukwalebela ici cangalo ca kucimfyanya, kabili na ine wine naleninako pali bakabalwe.

Tapakokwele, nalitendeke ukwangalako ici cangalo ca kucimfyanya pali bakabalwe ico bashitikapo ne ndalama. Natendeke ukucita ubulalelale kabili naleulungana na banakashi abengi. Nalepeepa ibange kabili naleiba no kwiba pa kuti ndekwata indalama sha kubomfya ku fyo nalefwaya. Nalikwete imfuti ishingi, lelo ico natemwako sana ca kutila nangu ca kuti naleiba sana, nshaipeyepo umuntu nangu umo.

Bakapokola basukile banjikata kabili balinkakile mu cifungo. Ilyo nafumine, natwalilile fye ne misango yandi iyabipa, nshayalwike nakalya. Na kuba, e lyo nacililemo ukubipa. Nangu ca kutila nalemoneka uwatekanya, nalefulwa bwangu, nali umunkalwe, kabili nshalealululwa. Nshalebika amano ku bantu bambi, nali kaitemwe.

IFYO BAIBOLO YA-ALWILE UBUMI BWANDI: Pali iyi yine nshita ilyo nali fye icibebebe, bamayo batampile ukusambilila Baibolo kabili basangwike ne Nte ya kwa Yehova. Bamayo balyalwike sana kabili nalefwaisha ukwishiba icalengele. E ico natendeke ukusambilila Baibolo ne Nte sha kwa Yehova.

Nasangile ukuti ifyo ba Nte balesambilisha fyalipusene ne fyo aba mu mipepele imbi balesambilisha, kabili nalimwene no kuti ifyo balesambilisha fyalefuma mu Baibolo. E bantu fye naishibe abaleshimikila ku ng’anda ne ng’anda nga filya Abena Kristu ba kubalilapo balecita. (Mateo 28:19; Imilimo 20:20) Nalishininkishe ukuti nalisangile ukupepa kwa cine ilyo namwene ifyo ba Nte batemwana icine cine.—Yohane 13:35.

Ifyo nasambilile muli Baibolo fyalengele nkutuluke ukuti mfwile ukwaluka sana. Naishileishiba ukuti Yehova Lesa alipata ubulalelale no kuti  nga ndefwaya ukumusekesha, nalingile ukuleka imisango yabipa iyalekowesha umubili wandi. (2 Abena Korinti 7:1; AbaHebere 13:4) Ilyo nasambilile ukuti ifyo ncita kuti fyalenga Yehova ukusekelela nelyo ukumfwa ububi, calengele ukuti ncitepo cimo. (Amapinda 27:11) E co napingwilepo ukuleka ukupeepa ibange, ukuleka ukubomfya imfuti, no kulaesha na maka yonse ukwalula imibele yandi. Lelo icangafishe sana pa fintu fyonse, kuleka ukucita ubulalelale no kuleka icangalo ca kushitikapo indalama.

Pa kubala, nshalefwaya abanandi ukwishiba ukuti nalesambilila Baibolo ne Nte sha kwa Yehova. Lelo naishilealuka ilyo nabelengele amashiwi Yesu alandile ayaba pali Mateo 10:33, apatila: “Onse uwankaana pa menso ya bantu, na ine nkamukaana pa menso ya kwa Tata wa mu muulu.” Aya mashiwi yalengele ukuti njebe abanandi ukuti nalesambilila Baibolo ne Nte sha kwa Yehova. Balipapile nga nshi. Tabaletontonkanya ukuti umuntu uwali nga ine kuti afwaya no kuba Umwina Kristu. Lelo nabebele ukuti nshalefwaya ukutwalilila ne misango yandi iya kale.

IFYO NANONKELAMO: Bamayo balitemenwe nga nshi ilyo bamwene ukuti natampa ukukonka ifyo Baibolo ilanda. Ino nshita tabasakamana ukuti nalimo ndecita ifintu ifyabipa. Bonse twalitemwa Yehova kabili tulalanda pa fyo twamutemwa. Limo ndatontonkanya pa fyo nalecita kabili ndafilwa no kushininkisha pa fyo Lesa angafwa ukwaluka. Nshikumbwa ukucita ubulalelale no kuba ne fyuma ifingi nga filya cali kale.

Nkana sambilila Baibolo, ino nshita nga nalifwa nelyo nga balinkaka mu cifungo. Ino nshita nalikwata ulupwa ulusuma kabili ulwa nsansa. Ndomfwa bwino sana ukubombela Yehova Lesa capamo no mukashi wandi uuntungilila e lyo no mwana wandi umukashana uwaba ne mibele iisuma. Ndatasha sana Yehova pa kunenga ukuba mu cilonganino ca ba bwananyina abatemwana. E lyo ndatasha nga nshi na pa muntu uwaipeeleshe ukunsambilisha icine ca mu Baibolo. Kabili ndashukila inshita yonse ukwebako bambi ifyo Baibolo isambilisha. Ndatasha sana Yehova Lesa pa kutemwa kwakwe ne cikuuku cakwe ifyalenga ukuti mpalame kuli ena.

[Amashiwi pe bula 11]

“Nasambilile ukuti ifyo ncita kuti fyalenga Yehova ukusekelela nelyo ukumfwa ububi”

[Icikope pe bula 11]

Ndi no mukashi wandi no mwana wesu

[Icikope pe bula 11]

Bamayo balyalwike sana