Refo Fyadwer Kankenem

ROSAI ḇedif kaku snon ḇefnak judi ma ḇekarawraw fa imnai ro kenem ḇeḇye ḇa ḇyenane? Wawasya fawar ḇyenane.

”Yamanen Kaku Yafnak Judi Balap Kuda.”—RICHARD STEWART

ḆYEḆEAḆEN RO: 1965

SUP RYAMA YA: JAMAIKA

FARFYAR ḆYEJA: IFNAK JUDI MA SNONMAMUN

KENEM AYEDI RO RANDAKYA: Yaba ro kota Kingston, sup Jamaika, kawasa ḇerodiansya sibor kaku ma sesabarar. Ḇena fararur ḇa sya sibor kaku ma ḇaḇeḇarḇor na naisya ro moḇ nakam. Snonmamun sya sifrur fa snonggaku sya simgake. Ras nakam srower spam ker senjata na.

Awin yedi fyararur marḇak fa fyamfon aya ma kasun yesi fandun nggoḇena. Myam mnis insama nggosmai farkarkor ḇepyum. Yamewer yafarkor ri, ḇape yamarisen kaku balap kuda. Yara ḇe rumfarkor ker ḇa bo yara ker ḇe moḇ sifnak balap kuda. Aya kako yek kuda.

Fyoro ḇa mura, yana marasrisen syadi faro judi balap kuda. Yakenem ḇeḇye ḇa, yafarḇuk bin oser ḇa, yasyor ganja ma yakaraw ker fa yafamfon kenem yedi. Yana romamun na naḇor, mboi fyor yakarawraw yamun snonggaku oso ḇaim.

Barpur ya, polisi sya sfor aya ma sisun aya ḇe bui. Fyor yasasyar kwar, yakaḇer wer ḇe kenem ḇekwar yedi ma yaḇyeḇa syadi wer. Smam aya ido na skara ayama snon ḇefrur pyum, mboi kaku ya ayama yadawdower ḇa, yamsor fasawsaw, ma yararmomen. Yafandun manggundaya monda.

RARISO REFOYA FYADWER KENEM YEDI: Fafisu yasmai samswen nabor, Awin yedi fyarkor Refo ma dakḇe Saksi Yahwe. Yamam roi ḇepyum ro Awin kenem ḇyedi, inja yasewar fa yafawi rosai ḇefrur fa Awin iḇese kaku. Mura yafarkor Refo kuker Saksi sya.

Yamam mboi Saksi-Saksi Yahwe sya farkarkor sena naḇese kuker farkarkor agama ḇesena, ma roi sikofen nakam neknam ro Refo ya. Yafawi si monda raryur ḇeḇaryas abar ḇepyum ro rum ḇe rum, imnis snonggaku Kristen ro abad randak sya. (Matius 28:19; Farfyar [Kisah] 20:20) Yakyar snar yasmai agama ḇekaku ya kwar fyor yamam sfasnai saswar ḇekaku rofandu si.​—Yohanes 13:35.

Fyor yafarkor Refo, insape yafawi fandun fa yafadwer kenem yedi. Yafawi snar Yahwe dayin kaku fararur farḇuk famfnom ya, ma insama yafrur fa Imarisen, fandun fa yamnai yafrur roi ḇebor kam ḇefrur mamas ḇaken yedi. (2 Korintus 7:1; Ibrani 13:4) Sne yedine iprei kaku fyor yafawi Yahwe nya sneḇaḇir kako, ma rosai yafrur na nafrur fa sne ḇyedi iduf ḇaido nafrur fa imarisen. (Amsal 27:11) Inja, yun snemuk fa yamnai yasyor ganja, yasawen romamun na, ma yasewar fa yabur kenem ḇeḇye ḇa yena. Roi ḇesamswen fa yafrur ya iso yamnai ro fararur farḇuk famfnom ma fafnak judi.

Randak ya, yamewer bati yesi sifawi yafarkor Refo kuker Saksi-Saksi Yahwe sya. Ḇape, insape yafawi yayokef roi ine bur si awer kukro yawasya Yesus wos ḇyena ro Matius 10:33, ḇekofen, ”Mḇoi mansei ḇefamyun Aya ro ḇarpon snonkaku, Aya kako nari Yakfamyun i ro ḇarpon Mami ro boiyaswa.” Inja yakofenḇair ḇe bati yesi yafarkor kuker Saksi Yahwe sya, ine nafrur fa sikandor kaku. Sikyar ḇaḇeri snonggaku ḇemnis ra aya yamarisen fa yakḇe snonggaku Kristen. Imbape, yakofen yamewer yakenem imnis randak ya wer ḇa.

BARAKAS YASMAI NA: Awin yedi imarisen kaku fyor myam yakenem imnis wos farkin ro Refo. Imgakwarek wer ḇa nari yafrur roi ḇeḇye ḇa na. Kirine bisa nufawar roi nuḇaḇir kam isoine saswar faro Yahwe I. Fafisu ono, yaswarepen moḇ yakenem ro fyor iwara ma yakyar ḇaḇeri bisa yafadwer kenem ḇeḇye ḇa yena snar fafnoḇek ro Yahwe I. Yamewer yakenem raris ḇepon iwara, yakenem famfnom ma yasewar nana arasai na monda.

Yakara mboi, yapampum angginem ro Refo ido, kirine imbude yamar kwar ḇaido yasmai ḇui kwar. Imbape, kirine yana kina ḇeaski ma nggosmai payamyum. Yaryaḇ kaku snar yafarmyan ḇe Saksi Yahwe fnoḇek swa yedi ḇesaramper ker aya ma inai ḇedawrower. Yakofen kasumasa kako ḇe Yahwe snar byuk swaf ḇe aya kako fa yaksun ro ḇaḇemanḇekanaek Kristen ḇefasnai sawarwar. Yakofen syowi kasumasa kako snar oso isya syewar kaku kwar fa fyarkor kakaku ro Refo ya ḇe aya. Ma yaḇesyowi swaf yasmai na fa yafnoḇek snonggaku ḇesesya fa sakfarkor rosai Refo ikofen ya. Ḇesyadi ya, yakofen kasumasa kaku faro Allah Yahwe kukro iswar aya inja dun aya fa yakfarmyan ḇe I.

[Ḇeḇeyap]

”Yafawi Yahwe nya sneḇaḇir kako, ma rosai yafrur na nafrur fa sne ḇyedi iduf ḇaido nafrur fa imarisen”

[Sonin]

Aya, swa yedi, ma inai nuḇedi

[Sonin]

Yamam roi ḇepyum ro Awin kenem ḇyedi