El Biblia Puede Cambia con el Vida

COSA ya manda move con el un jugador de sen y ladron para cambia con el de suyu manera de vida? Le con el cosa le ya relata.

“Quierre-quierre Yo Maga Carrera de Caballo.”​—RICHARD STEWART

AÑO QUE YA NACE: 1965

NACION ONDE YA NACE: JAMAICA

BACKGROUND: JUGADOR DE SEN Y CRIMINAL

DE MIO VIDA DE ANTES: Ya engranda yo na un pobre lugar na Kingston, el centro del Jamaica, donde manada maga gente ta queda. Manada el nuay trabajo y mucho tambien maga crimen ta sucede. Por causa na maga criminal, tiene miedo el maga gente. Halos cada dia yo ta puede oi maga tiro de pusil.

Ta trabaja gayot el de mio nana para hace engranda conmigo y con el de mio menor hermano y hermana. Ya asigura le que puede kame entra escuela. Pero nuay yo tanto interes entra escuela y quierre-quierre yo maga carrera de caballo. Ta escapa yo na escuela y ta anda na lugar onde ta hace el carrera. Ta munta pa gane yo na maga caballo.

Nuay dura, pirmi ya yo tan puesta na maga carrera. Ya queda yo imoral y gane, ya tiene yo sexual relacion na manada mujer. Tan marijuana yo y ta ruba yo para puede yo continua con el de mio manera de vida. Tiene yo manada pusil aquel tiempo. Bueno ya lang nuay quien ya muri na maga robo que ya hace kame.

Na uliji, ya cuji conmigo el maga polis y ya pone na preso. Despues conmigo larga, ya bira yo oleh na de mio manera de vida. Gane, mas grabe el cosa yo ta hace contra de antes. Maskin dol inocente el de mio ichura, brutal yo, iritable y ta insisti na cosa yo quierre. Nuay yo queber na otro maga gente.

SI PAQUEMODO EL BIBLIA YA PUEDE CAMBIA CON EL DE MIO VIDA: Aquel tiempo, ya estudia el de mio nana con el Biblia y ya queda uno del maga Testigo de Jehova. Ya mira yo que ya tiene maga bonito cambio na de suyu personalidad y ya queda yo curioso. Quierre yo sabe si porque ya hace maga cambio el de mio nana, poreso ya principia yo man cuento na maga Witness acerca na Biblia.

Ya puede nota que diferente el maga enseñanza del maga Testigo de Jehova na otro maga religion y ta usa sila con el Biblia para suporta con el diila maga enseñanza. Sila lang el sabe yo que ta predica casa en casa igual na maga Cristiano de antes. (Mateo 28:19; Maga Actividad 20:20) Ya queda yo convincido que ya incuntra yo con el verdadero religion cuando ya puede yo mira que deverasan el amor que ta demonstra sila con uno y otro.—Juan 13:35.

Base na cosa yo ya aprende na Biblia, ya puede yo mira que necesita yo hace maga grande cambio na de mio vida. Ya sabe yo que ta odia si Dios Jehova con el fornicacion y para hace alegre con ele, necesita yo descanza hace con el maga cosas que ta hace mabuling con el de mio cuerpo. (2 Corinto 7:1; Maga Hebreo 13:4) Ya tiene gayot efecto conmigo cuando ya sabe yo que tiene sentido si Jehova y el cosa yo ta hace puede hace sinti duele con ele o hace alegre. (Proverbio 27:11) Poreso ya decidi yo descanza man marijuana, gendeh mas usa y esconde maga pusil, y pricura cambia con el de mio personalidad. Bien dificil para conmigo que deja con el cuanto maga cosas, igual con el de mio imoral manera de vida y jugada de sen.

Del primero, no quierre yo que sabe el de mio maga amigo que ta estudia yo con el Biblia junto na maga Testigo de Jehova. Pero ya cambia se cuando ya puede yo le con el Mateo 10:33, donde si Jesus ya habla: “Si quien ta desconoce conmigo adelante del maga gente, yo tamen ay desconoce con ele adelante del dimio Tata na cielo.” (El Nuevo Testamento na Chavacano) Ya manda este move conmigo para habla con el de mio maga uban que ta estudia yo junto con el maga Witness. Espantao gayot sila que el un persona igual conmigo quierre queda un Cristiano. Pero ya habla yo kanila que no quierre mas yo bira na de mio manera de vida de antes.

SI PAQUEMODO YO YA BENEFICIA: Alegre gayot el de mio nana cuando ya mira le conmigo que ta principia ya aplica con el maga principio na Biblia. Gendeh mas le tan lingasa que baka hace yo maga mal cosas. Ahora, tiene kame mas cerca relacion con uno y otro por causa na diamon amor para con Jehova. Tiene vez, ta acorda yo con el de mio vida de antes y gendeh gayot maka-creé el maga cambio que ya puede yo hace na ayuda del Dios. No quierre mas yo con el imoral y materialistico manera de vida que tiene yo de antes.

Si nuay yo acepta con el mensaje del Biblia, posible muerto ya yo na este tiempo o na preso. Pero ahora, tiene ya yo alegre familia. Alegre yo cay ta sirvi yo con Dios Jehova junto con el de mio amable esposa y obediente anak mujer. Ta rindi gayot yo gracias cay ya acepta conmigo si Jehova para queda uno del de suyu maga siervo. Y ta aprecia gayot yo que tiene quien ya hace esfuerzo para enseña conmigo el verdad na Biblia. Ta dale gayot yo grande importancia con el oportunidad que tiene yo para ayuda con otro aprende si cosa ta enseña el Biblia. Mas pa na todo, ta rindi gayot yo gracias con Dios Jehova cay ya permiti le conmigo que queda de suyu amigo.

[Blurb]

“Ya sabe yo que tiene sentido si Jehova y el cosa yo ta hace puede hace sinti duele con ele o hace alegre”

[Letrato]

Ya mira yo que ya tiene maga bonito cambio na personalidad del de mio nana

[Letrato]

Junto na de mio esposa y anak mujer