Ang Bibliya Makabag-o sa Kinabuhi

UNSAY nagtukmod sa usa ka sugarol ug kawatan nga magbag-o sa iyang kinabuhi? Basaha ang iyang asoy.

“Hilig Kaayo Ko sa Karera sa Kabayo.”—RICHARD STEWART

NATAWO: 1965

NASOD: JAMAICA

KANIADTO: SUGAROL UG KAWATAN

KAAGI: Nagdako ko sa kabos nga lugar sa Kingston, ang kaulohan sa Jamaica, diin nagdasok ang mga tawo. Daghan ang way trabaho, ug kaylap ang krimen. Tungod sa mga gang, ang mga tawo nabuhi sa kahadlok. Halos adlaw-adlaw kong makadungog ug pinusilay.

Ang akong kugihang inahan naningkamot pag-ayo alang nako ug sa akong manghod nga lalaki ug babaye. Iyang gitino nga maayo mig edukasyon. Dili kaayo ko ganahang moeskuyla, apan hilig kaayo ko sa karera sa kabayo. Mopalta ko sa eskuylahan ug moadto sa karerahan. Mosakay pa gani ko sa mga kabayo.

Sa wala madugay kusog na kaayo kong mopusta sa karera. Nahimo kong imoral ug daghan kog karelasyong babaye. Ako mag-marijuana ug mangawat aron masustentoan ang akong bisyo. Daghan kog pusil, apan nagpasalamat ko karon nga wala koy napatay sa mga pagpangawat nga akong giapilan.

Sa ngadtongadto, nadakpan ko sa mga polis ug napriso. Sa dihang nakagawas ko, igo ra nakong gipadayon ang akong binuhatan. Gani, misamot pa ang akong pagkabugoy. Inosente kong tan-awon, apan ako gahian, sapoton, ug bagis. Kaugalingon ray akong gihunahuna.

GIBAG-O SA BIBLIYA ANG AKONG KINABUHI: Niining gubot nga panahon sa akong kinabuhi, ang akong inahan nagtuon sa Bibliya ug nahimong Saksi ni Jehova. Nakita nako ang maayong kausaban sa iyang personalidad ug naikag ko. Nakadesisyon ko nga susihon kon nganong nausab si Mama, busa nakighisgot kog Bibliya uban sa mga Saksi.

Akong nakita nga ang pagtulon-an sa mga Saksi lahi kay sa ubang relihiyon ug kini gipasukad sa Bibliya. Sila lang ang akong nahibaloang nagsangyaw sa balay ug balay, sama sa gibuhat sa unang mga Kristohanon. (Mateo 28:19; Buhat 20:20) Nakombinsir ko nga akong nakaplagan ang matuod nga relihiyon sa dihang akong nakita ang ilang tiunayng gugma sa usag usa.​—⁠Juan 13:⁠35.

Sa akong nakat-onan sa Bibliya, akong nakita nga kinahanglan kong mohimog dagkong kausaban sa akong kinabuhi. Akong nasayran nga gidumtan ni Jehova nga Diyos ang pakighilawas ug aron mapahimut-an siya, kinahanglan nakong undangon ang mga buhat nga naghugaw kanako. (2 Corinto 7:1; Hebreohanon 13:⁠4) Natandog ko sa dihang akong nakat-onan nga si Jehova may pagbati ug nga ang akong binuhatan mahimong makapasubo o makapalipay kaniya. (Proverbio 27:11) Busa nakadesisyon ko  nga mohunong na sa pag-marijuana, dili na magtenir ug pusil, ug maningkamot nga mausab ang akong kinaiya. Lakip sa lisod bag-ohon mao ang akong imoral nga pagkinabuhi ug ang pagsugal.

Sa sinugdan, dili ko gustong mahibaloan sa akong mga higala nga nagtuon kog Bibliya uban sa mga Saksi. Apan nausab ang akong hunahuna human nako mabasa ang Mateo 10:​33, diin si Jesus miingon: “Si bisan kinsa nga dili moangkon kanako atubangan sa mga tawo, ako usab dili moangkon kaniya atubangan sa akong Amahan nga anaa sa mga langit.” Kanay nagtukmod nako nga sultian ang akong mga barkada nga ako nagtuon uban sa mga Saksi. Nakurat sila. Dili sila makatuo nga dunay sama nako nga gustong mahimong Kristohanon. Apan ako silang giingnan nga dili na nako gusto ang akong kanhing kinabuhi.

MGA KAAYOHAN NGA AKONG NABATONAN: Ang akong inahan nalipay pag-ayo sa dihang iyang nakita nga gipadapat na nako ang mga prinsipyo sa Bibliya. Karon dili na siya mabalaka kon unsa na poy akong gihimong daotan. Maghisgot mi sa among gugma kang Jehova nga maoy nagbugkos kanamo. Usahay, mahinumdom ko kon unsa ko kaniadto ug dili ko makatuo sa mga kabag-ohan nga akong nahimo sa tabang sa Diyos. Wala na ko mangandoy sa imoral, materyalistikong kinabuhi nako kaniadto.

Kon wala pa ko mosanong sa mensahe sa Bibliya, patay na tingali ko karon o kaha napriso. Apan, karon duna koy malipayong pamilya. Nalipay kong mag-alagad kang Jehova uban sa akong buotang asawa ug anak nga babaye. Mapasalamaton ko kang Jehova sa pagtugot niya kanako nga mahimong bahin sa mahigugmaong Kristohanong panag-igsoonay. Mapasalamaton sab ko kaayo nga dihay naningkamot sa pagtudlo nako sa kamatuoran sa Bibliya. Ug akong gipabilhan ang mga kahigayonan nga makatabang ko sa uban nga makakat-on kon unsay gitudlo sa Bibliya. Dako gayod ang akong pasalamat kang Jehova tungod sa iyang mahigugmaong kalulot sa pagdapit nako nga moduol kaniya.

[Blurb sa panid 11]

“Akong nakat-onan nga si Jehova may pagbati ug nga ang akong binuhatan mahimong makapasubo o makapalipay kaniya”

[Hulagway sa panid 11]

Uban sa akong asawa ug anak

[Hulagway sa panid 11]

Nakita nako ang kausaban sa personalidad ni Mama