Jiñi Biblia tsiʼ qʼuextʌbeyob i pensar

¿CHUQUI tsiʼ ñijcʌbe i pusicʼal juntiquil xʼalas chaʼan taqʼuin yicʼot muʼ bʌ i wen chaʼlen xujchʼ ti otot tac chaʼan miʼ cʌy jiñi mach bʌ weñic miʼ mel? Laʼ la cʌcʼ chaʼan miʼ subeñonla.

«Tsaʼ c wen mulaj jiñi carrera tac chaʼan caballo» (RICHARD STEWART)

JABIL CHEʼ TSAʼ CHʼOCʼA: 1965

PAÍS: JAMAICA

YAN TAC BɅ: MIʼ CHAʼLEN ALAS CHAʼAN TAQʼUIN YICʼOT XUJCHʼ

BAJCHEʼ QUILAL TI WAJALI: Tsaʼ quila pañimil ti jumpʼejl tejclum baqui an pʼumpʼuñiyel ti Kingston, i capital Jamaica, maʼañic eʼtel yicʼot cabʌl jontolil. Jiñi lac piʼʌlob yaʼi miʼ wen bʌcʼñañob jiñi xtsʌnsajob. Maʼañic jumpʼejl qʼuin baqui maʼan mi lon cubin julbʌl.

Jiñi c mamá miʼ wen chaʼlen wersa ti eʼtel chaʼan miʼ mʌcʼlañon yicʼot chaʼtiquil quijtsʼiñob i cheʼ jaʼel tsiʼ chaʼle wersa chaʼan mi lon c majlel ti escuela. Pero joñon mic wen mulan jiñi carrera tac chaʼan caballo, mach jiñic jiñi clase. An i tajol maʼañic mic majlel ti escuela i yaʼ mic majlel baqui miʼ chaʼlen ajñel jiñi caballo tac, tsaʼto cʼoti j cʼʌchtan jiñi caballo tac am bʌ yaʼi.

Mach jalic tsaʼ ñumi, tsaʼ caji c mulan jiñi alas chaʼan taqʼuin yicʼot xʼixicob, cheʼ jaʼel mic ñucʼ marihuana. Pero chaʼan mic tajben tac i tojol jiñi, mic chaʼlen xujchʼ i jin chaʼan cabʌl c juloñib. ¡Wen cheʼ maʼañic tsaʼ c chaʼle tsʌnsa cheʼ bʌ tsaʼ c wen chaʼle xujchʼ!

Ti wiʼil, tsiʼ chucuyoñob i tsaʼ otsʌntiyon ti cárcel. Pero cheʼ bʌ tsaʼ loqʼuiyon, tsaʼ caji c chaʼ mel mucʼʌch bʌ c mel, ñumen jontolto tsaʼ sujtiyon, mach poj cheʼic yilal, pero tiʼ sujm cheʼʌchi. Cojach mic bajñel ñaʼtan c bʌ.

BAJCHEʼQUI JIÑI BIBLIA TSIʼ QʼUEXTɅBEYON C PENSAR: Jimbʌ ora jiñi, c mamá tsaʼ caji ti estudio i tsaʼ sujti ti Testigo. Cheʼ bʌ tsaʼ caji j qʼuel bajcheʼqui c mamá tsiʼ qʼuexta i melbal com c ñaʼtan chucoch. Jin chaʼan tsaʼ caji cʌl chaʼan bʌ Biblia yicʼotob jiñi i testigojob Jehová.

Mach jalic tsaʼ ñumi, tsaʼ cʼoti j qʼuel chaʼan jiñi testigojob mach cheʼic miʼ chaʼleñob cʌntesa bajcheʼ jiñi yan tac bʌ ñopbalʌl, muʼ bʌ i yʌlob chuculʌch ti Biblia. Cojach jiñi tsaʼ bʌ j qʼueleyob tiʼ subtʼan ti ototʌl tac cheʼ bajcheʼ tsiʼ meleyob jiñi ñaxam bʌ xñoptʼañob (Mateo 28:19; Hechos 20:20). I tsaʼ bʌ i coltayon j qʼuel chaʼan jiñʌch i sujm bʌ ñopbalʌl jiñʌch cheʼ miʼ lajal cʼuxbiñob i bʌ (Juan 13:35).

Cheʼ bʌ tsaʼ caji j cʌn muʼ bʌ i yʌl jiñi Biblia, tsaʼ j qʼuele chaʼan yomʌch mij qʼuextan c melbal. Jehová miʼ tsʼaʼlen jiñi tsʼiʼlel, i mi com chaʼan wen miʼ qʼuelon yom mij cʌy pejtelel muʼ bʌ i bibʼesan c bʌcʼtal (2 Corintios 7:1; Hebreos 13:4). Tsiʼ ñijca c pusicʼal cheʼ bʌ tsaʼ j qʼuele chaʼan Jehová miʼ mejlel i tijicñesʌben i pusicʼal o yʌqʼuen i chʼijyemlel chaʼan jiñi muʼ bʌ c mel (Proverbios 27:11). Jin chaʼan tsaʼ j cʌyʌ marihuana yicʼot jiñi juloñib tac, tsaʼ c chaʼle wersa j qʼuextan c melbal. Ñumen wocol bʌ tsaʼ cubi jiñʌch mij cʌy jiñi xʼixicob yicʼot jiñi alas chaʼan taqʼuin.

Ti ñaxan mach comic c suben jiñi camigojob chaʼan woliyon ti estudio yicʼot jiñi i testigojob Jehová. Pero jiñi c ñaʼtʌbal tsaʼ qʼuextʌyi cheʼ bʌ tsaʼ c pejca tsaʼ bʌ i yʌlʌ Jesús am bʌ ti Mateo 10:33: «Pero mi an muʼ bʌ i jamʌ al tiʼ wut lac piʼʌlob chaʼan mach i cʌñʌyoñic, joñon jaʼel mi caj cʌl tiʼ tojlel c Tat am bʌ ti panchan chaʼan mach j cʌñʌyic». Ti ora tsaʼ c sube jiñi camigojob chuqui wolic mel. Toj sajtelob i pusicʼal, come maʼañic miʼ ñopob chaʼan juntiquil cheʼ bʌ bajcheʼ joñon muʼto i mejlel ti sujtel ti xñoptʼan. Jin chaʼan, tsaʼ c subeyob chaʼan ñaʼtʌbilix c chaʼan chaʼan mi caj j qʼuextan c melbal.

CHUQUI BɅ WENLEL TAJBIL C CHAʼAN: Jiñi c mamá tijicña miʼ yubin chaʼan woliyʌch c mel muʼ bʌ j cʌn majlel ti Biblia. Wʌle maʼañix miʼ cʼojoʼtan chaʼan bajcheʼ yilal melbal. Ti lon c chaʼticlel mi lon j comol al jiñi lon j cʼuxbiya tiʼ tojlel Jehová. An i tajol cheʼ mij cʼajtesan bajcheʼ yilalon ti wajali, maʼan mic ñop yubil chaʼan tsaʼ j qʼuexta jiñi c melbal tiʼ coltaya Jehová. Maʼañix mic mulan tsʼiʼlel yicʼot maʼañix mic wen mulan jiñi taqʼuin bajcheʼ ti ñaxan.

Machic tsaʼ c jacʼʌ jiñi cʌntesʌntel am bʌ ti Biblia, tajol añon ti cárcel o chʌmeñon ili ora. Jiñi tsaʼ bʌ j cʌñʌ tsaʼʌch i wen coltayon come ili ora tijicña añon quicʼot c familia, jiñi quijñam miʼ coltañon i jiñi quixicʼal wem bʌ xchʼoc, i temel mi lon c melben i yeʼtel Jehová. Maʼañic mic taj c tʼan chaʼan mi cʌqʼuen wocolix i yʌlʌ jiñi tsaʼ bʌ cʌntesayon chaʼan bʌ Biblia. Jin chaʼan mic chaʼlen wersa jaʼel chaʼan mi cʌcʼ ti cʌñol muʼ bʌ i yʌl jiñi Biblia. Wocolix i yʌlʌ Jehová cheʼ tsiʼ yʌcʼʌyon ti ochel tiʼ tejclum, pero mic ñumen aqʼuen wocolix i yʌlʌ cheʼ tsiʼ pʌsbeyon i yutslel cheʼ tsiʼ pʌyʌyon tiʼ tojlel.

[Comentario]

«Tsiʼ ñijca c pusicʼal cheʼ bʌ tsaʼ j qʼuele chaʼan Jehová miʼ mejlel i tijicñesʌben i pusicʼal o yʌqʼuen i chʼijyemlel chaʼan jiñi muʼ bʌ c mel»

[Foto]

Cheʼ bʌ tsiʼ qʼuexta i melbal c mamá com c ñaʼtan chucoch

[Foto]

Quicʼot quijñam yicʼot quixicʼal