E Veisautaka na Bula na iVolatabu

NA CAVA e uqeta e dua na dauveimauilavo e daubutako tale ga, me veisautaka nona bula? Wilika mada na ka e tukuna.

“Au Taleitaka ga na Veitau Ose.”​—RICHARD STEWART

SUCU: 1965

VANUA: JAMAICA

KA E KILAI KINA: DAUVEIMAUILAVO, DAUBASULAWA

NOQU BULA E LIU: Au susu ena dua na yasayasa dravudravua qai tawani vakalevu ena koroturaga kei Jamaica o Kingston. E levu era sega ni cakacaka, dua tale ga na ka na levu ni basulawa. Era dauveivakarerei na ilala dauvakacaca qai rogoci na cabolo ni dakai e veisiga.

E dau cakacaka vakaukaua o tinaqu me qaravi keitou na le tolu na veitacini. E vinakata me keitou vuli vinaka. Ia au sega sara ni taleitaka na vuli, au taleitaka ga na veitau ose. Au dau dro mai koronivuli meu lako ena vanua ni veitau ose, au dauvodo ose tale ga.

Toso na gauna sa qai levu ga na noqu voli tikite ni veitau ose. E dukadukali na noqu ivakarau ni bula niu dau vakamoce yalewa. Au kana mariwana, au butako tale ga me saumi kina na veika au dau cakava. E levu na noqu dakai, kalougata niu sega ni vakamatea e dua ena vica vata na butako au vakaitavi kina.

Sega ni dede ra vesuki au na ovisa, au mani bala e valeniveivesu ena veika ca au cakava. Niu sere mai valeniveivesu au tomana tale na veika au dau cakava, ia e ca sara ni vakatauvatani e liu. O koya e raici au ena sega ni vakabauta niu dau cudrucudru, voravora noqu itovo, au qai cakava ga na ka au vinakata. Au sega ni kila tale e dua, o yau ga.

VEISAUTAKI AU NA IVOLATABU: Gauna au sotava tiko kina na leqa, a vuli iVolatabu o tinaqu, yaco sara me iVakadinadina i Jiova. Au kauai niu raica na vinaka ni nona itovo. Niu via kila na vu ni nona veisau o Na, au veivosakitaka kina kei ira na iVakadinadina i Jiova na iVolatabu.

Au raica ni duidui sara na ka era vakavulica na iVakadinadina i Jiova mai vei ira eso tale na lotu, au raica tale ga nira yavutaka ena iVolatabu na ka era vakavulica. Au kila ni o ira ga era vunau e veivale me vakataki ira na lotu vaKarisito taumada. (Maciu 28:19; Cakacaka 20:20) Niu raica na nodra veilomani dina, au vakadeitaka nira lewena na lotu dina.—Joni 13:35.

Na ka au vulica ena iVolatabu e uqeti au sara ga meu vakayacora eso na veisau lelevu ena noqu bula. Au vulica ni cata na Kalou o Jiova na veidauci. Keu vinakata gona meu vakamarautaki koya, ena vinakati meu vakasavasavataki au mai na dukadukali ni yago. (2 Korinica 7:1; Iperiu 13:4) E tarai au sara ga na  noqu kila ni rawa ni vakamarautaki Jiova se vakararawataki koya na veika au cakava. (Vosa Vakaibalebale 27:11) Au mani vakadeitaka meu muduka noqu kana mariwana, meu biuta laivi noqu dakai, qai saga meu vakavinakataka na noqu itovo. Ia e dredre duadua meu biuta na ivakarau ni bula dukadukali kei na veimauilavo.

Au a sega ni vinakata mera kila na noqu itokani niu sa vuli iVolatabu kei ira na iVakadinadina i Jiova. Ia a veisau na noqu rai niu wilika na Maciu 10:33, a tukuna kina o Jisu: “O koya e cakitaki au vei ira na tamata, au na cakitaki koya tale ga vei Tamaqu mai lomalagi.” E uqeti au na vosa qori meu tukuna vei ira na noqu itokani niu sa vuli iVolatabu kei ira na iVakadinadina i Jiova. Era kurabui nira rogoca qori, era sega ni vakabauta niu via dua na lotu vaKarisito. Ia au tukuna vei ira niu sa sega ni via lesuva na noqu ivakarau ni bula makawa.

KENA YAGA: Dua na ka nona marau o Na niu sa muria na ivakavuvuli ena iVolatabu. Sa sega ni leqataka ena gauna qo seu cakava tiko na ka ca se sega. Keirau dau veitalanoataka na ka keirau tautauvata kina—neirau lomani Jiova. Niu rai lesu ena so na gauna, au drukataka tale na veisau au vakayacora rawa ena veivuke ni Kalou. Sa oti vakadua na kamica ni noqu ivakarau ni bula dukadukali e liu kei na noqu vinakata na iyau.

Keu sega ni vulica na iVolatabu, au sa rairai mate se tu e valeniveivesu. Ia qo sa dua noqu vuvale totoka qai mamarau. Au marau ni qaravi Jiova kei na watiqu e dauveitokoni, kei na luvequ yalewa e dautalairawarawa. Dua na ka noqu vakavinavinakataki Jiova ni vakadonuya meu lewena e dua na mataveitacini era dauveilomani. Au marau tale ga ni saga e dua me vakavulici au ena ka dina ena iVolatabu. E ka dokai na noqu rawa ni vukei ira tale eso mera kila na iVolatabu. Au vakavinavinakataka vakalevu na nona yalololoma na Kalou o Jiova ni vagolei au mai meu qaravi koya.

[Tikina bibi ena tabana e 11]

“Au kila ni rawa ni vakamarautaki Jiova se vakararawataki koya na veika au cakava”

[iYaloyalo ena tabana e 11]

Au raica na vinaka ni nona itovo o tinaqu

[iYaloyalo ena tabana e 11]

Keitou vakaveitamani