Ti Biblia Balbaliwanna ti Biag

ANIA ti nakatignayan ti maysa a sugador ken agtatakaw tapno baliwanna ti panagbiagna? Usigem ti salaysayna.

“Pagay-ayatko ti Lumba ti Kabalio.”​—RICHARD STEWART

PANNAKAYANAKNA: 1965

NAKAYANAKANNA: JAMAICA

PAKASARITAANNA: DATI A SUGADOR KEN KRIMINAL

TI NAPALABASKO: Dimmakkelak iti nakurapay a lugar ti Kingston, ti kabesera ti Jamaica. Iti adu a populasionna, adu ti awanan iti trabaho, ken nasaknap ti krimen. Agbutbuteng dagiti tattao gapu kadagiti gang. Gistay inaldaw a makangngegak iti kanalbuong ti paltog.

Ti nagaget a nanangmi ti nangisakad iti panagbiagmi nga agkakabsat. Inkagumaanna a maaddaankami iti nasayaat nga edukasion. Diak interesado nga agadal, ngem pagay-ayatko ti lumba ti kabalio. Diak mapan ageskuela tapno laeng makabuyaak iti lumba ti kabalio. Simmakayak pay ketdi kadagiti kabalio.

Idi agangay, naigamerakon iti panagpusta iti lumba ti kabalio. Imoral ti panagbiagko ket nagbalinak a babaero. Nagusarak iti marihuana ken nagtakawak tapno masuportarak ti bisiok. Adu ti paltogko, ngem naimbag laengen ta awan ti natay iti adu a panagtakaw a nakiramanak.

Ngem idi agangay natiliwdak dagiti polis ket naibaludak gapu kadagiti krimen a naaramidak. Idi nakaruarakon, sinubliak ti dati nga aramidko ket kimmaro ti kinadakesko. Nupay inosente ti langak, manangipapilit, managpungpungtot, ken naranggasak. Bagbagik laeng ti pakaseknak.

NO KASANO A BINALBALIWAN TI BIBLIA TI BIAGKO: Bayat ti nariribuk a paset ti biagko, inrugi ni nanangko ti agadal iti Biblia ken nagbalin a Saksi ni Jehova. Nasdaawak idi nakitak a simmayaat ti ugalina. Kayatko nga ammuen ti makagapu iti panagbalbaliw ni Nanang, isu a nakisaritaak kadagiti Saksi ni Jehova maipapan iti Biblia.

Nakitak a naiduma ti sursuro dagiti Saksi ni Jehova no idilig iti dadduma a relihion. Ibasarda iti Biblia ti amin a sawenda. Isuda laeng ti ammok a mangaskasaba iti binalaybalay, kas iti inaramid dagiti nagkauna a Kristiano. (Mateo 28:19; Aramid 20:20) Nakombinsirak a nasarakakon ti pudno a relihion idi nakitak ti naimpusuan a panagayat nga ipakpakitada iti maysa ken maysa.​—Juan 13:35.

Gapu iti naadalko iti Biblia, nabigbigko a masapul a balbaliwak ti biagko. Naammuak a kagura ni Jehova a Dios ti pannakiabig, ket tapno maparagsakko, masapul nga isardengko dagiti aramid a mangrugrugit iti bagik. (2 Corinto 7:1; Hebreo 13:4) Natukay ti riknak idi naammuak nga adda gayam rikna ni Jehova, ket mabalin a masaktan wenno maragsakan iti ar-aramidek. (Proverbio 27:11) Inkarik nga isardengkon ti agusar iti marihuana, saanakon nga  agiggem iti paltog, ken baliwak ti kababalinko. Ngem ti imoral a panagbiagko ken ti panagsugalko ti karirigatan a binalbaliwak.

Idi damo, diak kayat a maammuan dagiti gagayyemko a makipagad-adalak iti Biblia kadagiti Saksi ni Jehova. Ngem nagbalbaliw ti panangmatmatko idi nabasak ti sasao ni Jesus iti Mateo 10:33, a kunana: “Siasinoman a mangtallikud kaniak iti sanguanan dagiti tattao, paglikudakto met iti sanguanan ni Amak nga adda iti langlangit.” Dayta ti nangtignay kaniak a mangibaga kadagiti kakaduak a makipagad-adalak kadagiti Saksi. Nasdaawda ken saanda a mamati a kayat ti tao a kas kaniak ti agbalin a Kristiano. Ngem imbagak kadakuada a diak kayaten a sublian ti dati a kabibiagko.

NO KASANO A NAGUNGGONAANAK: Napalaus ti ragsak ni nanangko idi nakitana nga an-annurotekon dagiti prinsipio ti Biblia. Saanen a madanagan amangan no agaramidak iti dakes. Pagsarsaritaanmi itan dagiti pagpadaanmi​—ti panagayatmi ken Jehova. No pampanunotek ti napalabas a kabibiagko, kasla diak mamati a nabalbaliwak ti biagko babaen iti tulong ti Dios. Saankon a sapsapulen ti imoral ken materialistiko a biag.

No diak impangag ti mensahe ti Biblia, mabalin a natayak koman wenno addaakon iti pagbaludan. Addaanak itan iti nasayaat ken naragsak a pamilia. Napalalo ti ragsakko nga agserserbi ken Jehova a Dios a kaduak ti mannakaawat nga asawak ken ti natulnog nga anakko. Agyamanak ken Jehova ta impalubosna nga agbalinak a paset ti naayat a Nakristianuan a panagkakabsat. Apresiarek ti panagregget ti kabsat a nangisuro kaniak iti kinapudno a linaon ti Biblia. Diak sayangen ti gundawayko a tumulong iti sabsabali a mangammo kadagiti sursuro ti Biblia. Kangrunaan iti amin, agyamanak iti naayat a kinamanangngaasi ni Jehova a Dios ken iti panangtulongna kaniak nga umadani kenkuana.

[Blurb iti panid 11]

“Naammuak nga adda gayam rikna ni Jehova, ket mabalin a masaktan wenno maragsakan iti ar-aramidek”

[Ladawan iti panid 11]

Kaduak ni baketko ken ti balasangmi

[Ladawan iti panid 11]

Nakitak a simmayaat ti ugali ni nanangko