Bíblia ta muda vida di algen

KUZÊ ki poi un ómi ki ta pustaba dinheru i ta asaltaba algen, ta larga kes mau ábitu ki el tinha i ta muda se vida? Lé kuzê ki el ta fla.

“N gostaba txeu di korida di kabalu.” — RICHARD STEWART

ANU KI EL NASE: 1965

PAÍS KI EL NASE: JAMAIKA

SE VIDA NA PASADU: TA PUSTABA DINHERU I TA ASALTABA ALGEN

MODI KI ÉRA NHA VIDA ANTIS: N kria na un zóna póbri ki ta mora txeu algen, na Kingston, ki é kapital di Jamaika. Tinha txeu krimi i falta di trabadju la. Kes algen di la ta staba sénpri ku medu pamodi kes grupu violéntu. N ta obiba tiru kuazi tudu dia.

Nha mai éra trabadjadera i el faze se midjór pa mi ku nha irmon i nha irman más pikinoti. El faze di tudu pa nu ten un bon idukason. N ka mutu gostaba di skóla, má mi éra dodu na korida di kabalu. N ta faltaba aula pa N baba pa kes lugar di korida i ti N ta montaba kes kabalu.

Na poku ténpu, N kumesa ta pusta txeu dinheru na koridas di kabalu. N ta lebaba un stilu di vida mariadu i N ta ranjaba txeu mudjer. N ta fumaba padjinha i N ta furtaba pa N mante nha stilu di vida. N tinha txeu arma, má N ta fika kontenti pamodi ningen ka móre na kes monti asaltu ki N faze.

Pulísia kaba pa pega-m i es pô-m na kadia pamodi kes krimi ki N faze. Má dipôs ki N sai di kadia, N kontinua ku kel mésmu stilu di vida. Aliás, N bira inda más piór. Di pa fóra N ta parseba un algen dretu, má mi éra orgulhozu, N ka tinha paxénxa i mi éra runhu. N ta preokupaba sô ku nha kabésa.

MODI KI BÍBLIA MUDA NHA VIDA: Na kel ténpu la, nha mai kumesa ta studa Bíblia i el bira Tistimunha di Jeová. N da kónta ma nha mai faze bons mudansa na se manera di ser i kel-la pô-m ku kuriozidadi. N disidi djobe kuzê ki poi nha mai ta faze kes mudansa, pur isu N kumesa ta pâpia sobri Bíblia ku Tistimunhas di Jeová.

N da kónta ma kuzê ki Tistimunhas di Jeová ta inxina é diferenti di otus relijion i ma tudu kuza ki es ta fla ten bazi na Bíblia. N ka konxeba ninhun otu relijion ki ta pregaba di kaza en kaza sima kes primeru sigidor di Jizus ta fazeba. (Mateus 28:19; Atos 20:20) N fika ku sertéza ma N atxa relijion verdaderu kantu N odja kel amor di verdadi ki es ta mostra pa kunpanheru. — João 13:35.

Sima N ba ta studa Bíblia, N da kónta ma N meste fazeba mudansas sériu na nha vida. N prende ma Jeová Deus ta ôdia konportamentu seksual mariadu i ma si N krê agradaba el, N tinha ki largaba kes kuza mariadu ki N ta fazeba. (2 Coríntios 7:1; Hebreus 13:4) Un kuza ki mexe txeu ku mi é kantu N prende ma Jeová ten sentimentus i ma kel ki N ta faze pode magua-l ô dexa-l kontenti. (Provérbios 27:11) Pur isu, N disidi para di fuma padjinha, bota kes arma ki N tinha i sforsa pa midjora nha manera di ser. Un di kes mudansa más difísil pa mi foi larga kel stilu di vida mariadu ki N tinha i para di faze apósta.

Na komésu, N ka kria pa nhas amigu sabe ma N staba ta studa Bíblia ku Tistimunhas di Jeová. Má N muda nha manera di pensa kantu N lé Mateus 10:33, undi Jizus fla: ‘Ken ki nega-m dianti di ómi, ami tanbê N ta nega-l dianti di nha Pai, ki sta na séu.’ Kes palavra li pô-m ta fla nhas koléga ma N staba ta studa Bíblia ku Tistimunhas di Jeová. Es fika di bóka abértu. Es ka krê kriditaba ma un algen sima mi pode biraba un sérvu di Deus. Má N fla-s ma N ka kria ten nada aver ku kel vida ki N ta lebaba antis.

BENSONS KI N RESEBE: Nha mai fika uma kontenti kantu el odja ma N kumesa ta vive di akordu ku kel ki Bíblia ta fla. Gósi el ka ten ki fika preokupadu pamodi N pode sta ta mete na algun prubléma. Gósi nu sta más amigu di kunpanheru pamodi nos tudu dôs ta ama Jeová i nu ta pâpia ku kunpanheru sobri kel-li. Alvês N ta fika ta pensa na kel algen ki mi éra antis i nen N ka ta kridita na tudu kes mudansa ki dja N konsigi faze ku ajuda di Deus. Gósi kel stilu di vida mariadu i amor pa dinheru ki N tinha ka ta txoma-m ninhun atenson más.

Si N ka setaba mensaji di Bíblia, talvês gósi ô N staba mortu ô N staba na kadia. Gósi N ten un família unidu i filís. N ta xinti uma kontenti di sirbi Jeová djuntu ku nha mudjer ki ta apoia-m i ku nha fidju-fémia ki ta konporta dretu. N ta agradese Jeová pamodi el seta-m na família di se sérvus ki ta ama kunpanheru. N ta agradese tanbê pamodi algen sforsa pa inxina-m kes verdadi di Bíblia. N ta da txeu valor pa oportunidadi di djuda otus algen prende kuzê ki Bíblia ta inxina. I kuzê ki N ta agradese Jeová más txeu inda é pa bondadi ki el mostra-m kantu el atrai-m pa el.

[Lejenda na pájina 11]

“N prende ma Jeová ten sentimentus i ma kel ki N ta faze pode magua-l ô dexa-l kontenti.”

[Fotu na pájina 11]

N da kónta ma nha mai faze bons mudansa na se manera di ser

[Fotu na pájina 11]

Mi ku nha mudjer i nha fidju-fémia