Baibolo Upimpula Bwikalo bwa Bantu

ÑANYI kintu kyalengejile muntu umo watemenwe bingi ngyuka ne kwiba kwikileka ne kupimpula byubilo byanji? Tangai mwiumvwine mwine byo aamba.

“Natemenwe bingi makayo a pa bambili.”—BYASHIMIKIZHA BA RICHARD STEWART

MWAKA YE BASEMEKELWE: 1965

KYALO: JAMAICA

MWAPITA BWIKALO BWABO: KUCHIKAPO MALI NE BUMBANZHI

BWIKALO BWA KALA: Amiwa nakomejile mu kisemi kiyanji bingi, mu mpunzha ya Kingston muzhi mukatampe wa Jamaica mwavujile bingi bantu. Kutaana makito kwakatezhe bingi kabiji bumbanzhi bwavujile bingi. Bambanzhi balengejile bantu kususubala bingi. Pa juba pa juba naumvwanga bantu saka baloza mata.

Bamama betukwashishe mu bintu byonsetu amiwa ne nkasami wamulume ne nyenga yami. Bamama betutwajile ku sukulu. Amiwa kechi natemenwe sukulu ne. Pakuba natemenweko makayo a pa bambili. Nafuukulangapo kushala ku sukulu ne kuya ku makayo a pa bambili. Nakanjilanga ne pa bambili.

Mu kimyetu kicheche, naikele shenyenye mu kisela kya kuchikapo mali mu makayo a pa bambili. Natendekele bulalelale kabiji nalaajile na banabakazhi bavula bingi. Napeepanga bingi jamba ne kwibila bantu pa kuba’mba mmwenengamo mali a kwikwashishamo. Napotele mata avula bingi. Kyawaminekotu kechi naipayilepo muntu na mambo a bwivi bwami ne.

Mu kuya kwa moba, bakapokola bankwachile ne kunkasa pa bintu byatama byo naubilenga. Nangwa kya kuba bankasulwile mu kaleya, natwajijiletu na byubilo byami bya bumbanzhi. Kwambatu kishinka, byo nafumine mu kaleya nakizhizhemo kukanama kukila kala. Pa meso namwekanga bingi kwikala muntu wakookelela bingi. Bino mukachi ka muchima nakanamine bingi. Kabiji nazhingilazhingilanga bingi bukiji ne kushinta. Kafwako muntu ye nachinanga ne.

BAIBOLO BYO APIMPWILE BWIKALO BWAMI: Bintu byo byantamijile mu bwikalo bwami, bamama bafunjilenga Baibolo kabiji baikele Bakamonyi ba kwa Yehoba. Nemwenejile bamama byo bapimpwile byubilo byabo. Kabiji nakebeshe kuyuka kibakwasha kwikala na byubilo byawama. Nafuukwilepo kwipuzha bamama namba bambuuleko kintu kibakwashishe kupimpula byubilo byabo. Ponkapotu ne amiwa natendekele kufunda Baibolo na Bakamonyi.

Nashiinwe kuba’mba bintu bifunjisha Bakamonyi ba kwa Yehoba byapusana bingi na bintu bifunjisha machechi akwabo. Kabiji nemwenejile kuba’mba bintu byonse bifunjisha nangwa’mba byamba Bakamonyi bifuma mu Baibolo. Nemwenejile’mba bo bonkatu basapwila ku nzubo ku nzubo byonkatu byaubanga bena Kilishitu batanshi. (Mateo 28:19; Byubilo 20:20) Nashiinwe kuba’mba pano nataana bupopweshi bwa kine byo namwene Bakamonyi byo betemwa bene na bene kufuma panshi ya muchima.​—Yoano 13:35.

Bintu byo nafunjile mu Baibolo, byandengejile kuleka byubilo byami byatama. Nafunjile kuba’mba Yehoba Lesa washikwa bingi bantu boba bulalelale. Kabiji inge amiwa nkeba kumutokeshanga ku muchima, nafwainwa kuleka bintu byonse byatama byonauna mubiji. (2 Kolinda 7:1; Bahebelu 13:4) Natemenwe bingi byo nafunjile kuba’mba Yehoba kimukola bingi ku muchima ne kuba’mba byubilo byami byakonsha kumukozha ku muchima nangwa kumutokesha ku muchima. (Byambo bya Maana 27:11) Onkao mambo, nafuukwilepo kuleka kupeepa jamba, nalekele kwendanga na mata ne kwibikako kwikala na byubilo byawama. Bintu bibiji bikatampe byankatezhe bingi kuleka ke bulalelale ne kisela kya kuchikapo mali.

Patanshitu kechi nakebelenga balunda nami kuyuka’mba mbena kufunda Baibolo na Bakamonyi ba kwa Yehoba ne. Bino nalekele kwifya ku bakwetu byo natangile Mateo 10:33 paji bino byambo byaambile Yesu bya kuba’mba: “Yense unkana pa meso a bantu, ne amiwa nkamukana ku meso a Batata ba mwiulu.” Abino byambo byandengejile kubuula balunda nami bonse kuba’mba mbena kufunda Baibolo na Bakamonyi ba kwa Yehoba. Balunda nami pa kumvwa kino, bakuminye bingi. Bazhinaukile bingi kuba’mba amiwa nji na byubilo byatama bibye, nkeba kwikala mwina Kilishitu. Bino nebabuujile’mba amiwa nakebesha kuleka byubilo byami byonse byatama.

BINTU BYO NAMWENAMO: Bamama batemenwe bingi byo bamwene kuba’mba natendeka kwingijisha mafunde a mu Baibolo mu bwikalo bwami. Aluno bamama baleka kwakamwa kuba’mba nsakuba bintu byatama. Misambo yetu imenatu pa butemwe bo twatemwa Yehoba. Bimye bimo, nkankamanatu inge navuluka byo najinga kala. Kabiji natemwa bingi Lesa byo ankwasha kupimpula byubilo byami. Kechi njipo na kilaka kya kulaala na banabakazhi ne kutemwa bintu bya mu bwikalo byonkatu byo najinga kala ne.

Inge kine nabujile kuswa kufunda Baibolo, kino kimye kampe inge nafwile kala nangwa inge nji mu kaleya. Pa kino kimye, bwikalo bwami bwawama bingi kabiji twaikala bingi bulongo mu kisemi. Kintokesha bingi ku muchima kwingijila Yehoba Lesa pamo na mukazhami ne mwanami uji na byubilo byawama. Namusanchila bingi Yehoba pa kunkwasha kwikala mwina Kilishitu. Nasanchila bingi muntu wamfunjishe Baibolo. Kabiji natemwa bingi byo mbena kwibikako kukwasha bakwetu kuyuka byaamba Baibolo. Kine, namusanchila bingi Yehoba Lesa pa lusa lwanji lwa kunkokela kwi aye mwine.

[Mabulañano]

“Natemenwe bingi byo nafunjile kuba’mba Yehoba kimukola bingi ku muchima ne kuba’mba byubilo byami byakonsha kumukozha ku muchima nangwa kumutokesha ku muchima”

[Kipikichila]

Amiwa pamo na mukazhami ne mwanami wamukazhi

[Kipikichila]

Nemwenejile bamama byo bapimpwile byubilo byabo