Bibele Yacincanga Bupilo Bwa Batu

KI LIKA mañi zenesusuelize mutu yanaaezanga lipapali za kuwina masheleñi ni yanaali lisholi kucinca mupilelo wahae? Muipalele likande lahae.

“Nenilata Hahulu Lipapali za Kukangisana ka Lipizi Zelakana.”—BO RICHARD STEWART

SILIMO SENE BAPEPILWE: 1965

NAHA KONE BAPEPEZWI: JAMAICA

ZENE BAEZANGA KWAMULAHO: LIPAPALI ZA KUWINA MASHELEÑI NI BUKEBENGA

BUPILO BWAKA BWA KWAMULAHO: Nenihulezi mwa sibaka sesibizwa Kingston, ili muleneñi omutuna wa naha ya Jamaica, mi batu babañata bane bapila mwateñi neli babotana. Buñata bwa batu nebasina misebezi, mi nekunani hahulu ni bukebenga mwa sibaka seo. Likwata za likebenga za mwa sibaka seo nelitahisa kuli batu bapile mwa sabo. Ibato ba zazi ni zazi, neniutwanga mulumo wa tobolo.

Bo ma nebasebezanga ka taata kuli batuse na, munyanaaka wamushimani ni kaizelaaka kufumana zene lutokwa mwa bupilo. Hape nebaezize mone bakonela kaufela kulukenisa sikolo kaufelaa luna. Nenisa isi hahulu pilu kwa sikolo, kono nenilata hahulu papali ya kuzulama lipizi. Ka linako zeñwi, nenipicukanga kwa sikolo ilikuli niyo buha batu babakangisana mwa papali ya kumata ka lipizi. Mane fokuñwi ni na nenipahamanga fa lipizi.

Hamulahonyana wafo, natupwikela hahulu mwa papali ya kuwina masheleñi ni ya kuzulama lipizi. Nenikalile kupila ka muzamao wa buhule, mi nenilobalanga ni basali babañata. Nenizubanga matokwani ni kuuzweza batu ilikuli nifumane masheleñi a kuitusisa. Hape neninani litobolo zeñata, kono niitumela kuli hakuna mutu yene nibulaile mwahalaa nako kaufela yene luyanga kwa kuuzwa.

Hamulaho wa nako, mapokola banitama ni kunikenya mwa tolongo kabakala lika zemaswe zene niezize. Hase nilukuluzwi mwa tolongo, nazwelapili mwa mupilelo waka omaswe. Mane nenikalile kueza lika zemaswe hahulu kufita sapili. Nihaike kuli nenibonahala kuba mutu yomunde, nenili mutu wa muñañatoho, wa kacima-cima, ni yasituhu. Nenisina taba ni batu babañwi, kono neniisa pilu ku zaka feela.

BIBELE MONE ICINCELIZE BUPILO BWAKA: Mwahalaa nako yene nipila bupilo bobucwalo, bo ma bona nebakalile kuituta Bibele, mi baba yomuñwi wa Lipaki za Jehova. Nenilemuhile kuli nebaezize licinceho zende mwa bupilo bwabona, mi taba yeo yanikomokisa. Naeza lipatisiso kuli nizibe zenetusize bo ma kueza licinceho mwa bupilo; kacwalo, nakala kuituta Bibele ni Lipaki za Jehova.

Nalemuha kuli litaba zene baluta Lipaki za Jehova nelishutana hahulu ni lituto za mwa bulapeli bobuñwi, mi hape nenilemuhile kuli litaba kaufela zene baluta Lipaki za Jehova nelitomile fa Bibele. Lipaki za Jehova neli bona feela bane bakutazanga fa ndu ni ndu sina feela mone baezezanga Bakreste ba kwa makalelo. (Mateu 28:19; Likezo 20:20) Nakolwa kuli nenifumani niti hane niboni lilato la luli lene babonisana mwahalaa bona.—Joani 13:35.

Litaba zene niitutile mwa Bibele neli nitusize kueza licinceho mwa bupilo bwaka. Neniitutile kuli Jehova Mulimu utoile muzamao wa buhule, mi kuli nimutabise, nenitokwa kutuhela mikwa yemaswe yeo yenesilafaza mubili waka. (2 Makorinte 7:1; Maheberu 13:4) Nenifitilwe kwa pilu hane niitutile kuli Jehova unani maikuto, mi likezo zaka nelikona kumuutwisa butuku, kamba kumutabisa. (Liproverbia 27:11) Kacwalo, natuhela kuzuba matokwani, natuhela kuluwa litobolo, mi nakala kueza licinceho mwa bupilo bwaka. Nihakulicwalo, neninani kuikataza luli kuli nituhele kupila ka muzamao wa buhule ni kueza papali ya kuwina masheleñi.

Hanikala kuituta Bibele ni Lipaki za Jehova, nenisa tabeli kuli balikani baka bazibe ka za teñi. Kono hamulaho wa kubala liñolo la Mateu 10:33, nalemuha kuli nenisa swaneli kubapatela taba yeo. Kwa liñolo leo, Jesu naabulezi kuli: “Mutu kaufela yanilatula fapilaa batu, ni na nika mulatula fapilaa Ndate ya kwa mahalimu.” Manzwi ane nibalile ao atahisa kuli nitaluseze balikani baka kuli nenisweli kuituta Bibele ni Lipaki za Jehova. Balikani baka nebakomokile hahulu kuutwa cwalo. Nebasika libelela kuli mutu yaswana sina na wakona kuba Mukreste. Kono nabataluseza kuli neniikatulezi kutuhela mupilelo waka wakale.

MONITUSELIZWE: Bo ma nebatabile hahulu hane balemuhile kuli nenikalile kupila ka kulumelena ni likuka za Bibele. Cwale, habasa ikalelwanga ka za haiba nisweli kueza lika zemaswe kamba kutokwa. Luambolanga lika zelutabela hahulu, ili lilato laluna ku Jehova. Ka linako zeñwi, nahupulanga lika zene niezanga kwamulaho, mi niitumela ku Mulimu kuli unitusize kueza licinceho mwa bupilo. Hanisa tabela kupila ka muzamao wa buhule, ni wa kundongwama sifumu.

Kambe nenisika ituta Bibele, kacenu le kambe nishwile kamba kambe ni mwa tolongo. Kono ka nako ya cwale, ninani lubasi lolunde lolutabile. Nitabile hahulu kuli na ni musalaaka hamohocwalo ni mwanaaka wamusizana yanani muzamao omunde, lusebeleza Jehova Mulimu. Niitumela ku Jehova kuli unitusize kuba mwa lubasi lwa mizwale ni likazeli babanani lilato. Hape niitumela ku muzwale yanaangile muhato wa kuituta Bibele ni na. Mi niitebuha kolo yeninani yona ya kutusa babañwi kuziba zeibulela Bibele. Kono sihulu niitumela ku Jehova Mulimu kakuli unibonisize sishemo ka kunitusa kusutelela ku yena.

[Manzwi]

“Nenifitilwe kwa pilu hane niitutile kuli Jehova unani maikuto, mi likezo zaka nelikona kumuutwisa butuku, kamba kumutabisa”

[Siswaniso]

Na ni musalaaka ni mwanaaka wamusizana

[Siswaniso]

Nenilemuhile kuli bo ma nebakalile kueza licinceho mwa bupilo bwabona