Biblia okinpatili innemilis

¿TLEN okipaleui se tlakatl ayakmo matlachteki uan mamotlatlani ika tomin? Matikitakan.

“Onechpaktiaya niktlanis tomin ika caballos” (RICHARD STEWART)

ONESKI ITECH XIUTIL: 1965

UEYI ALTEPETL: JAMAICA

OKSEKI TLAMANTLI: OMOTLATLANIAYA UAN OTLACHTEKIAYA

TLEN ONIKCHIUAYA: Onineski itech altepetsintli Kingston, tlen kajki altepetl Jamaica, ompa amo okipiayaj tomin uan miakej sapanoua omoteuiayaj. Nochipa otlatojtoponiayaj, ik non, akinmej ompa ochantiayaj sapanoua omomojtiayaj.

Nonantsin sapanoua otekipanouaya para uelis techiskaltis ne iuan nokniuan uan okichi matimomachtikan escuela. Ne onechpaktiaya ijkuak omotlatlaniayaj caballos uan amo onechpaktiaya nimomachtis. Ualeua amo oniaya escuela uan oniaya kanin omotlatlaniayaj caballos, miak uelta inpan onitlejkok.

Opejki nimotlatlani ika tomin, oniauilnemiaya uan onikchichinaya marihuana. Para uelis ijkon nikchiuaskia omonekiaya nitlachtekis uan non okichi manikpia miak tepostli tlen ika moteuiaj. Amikaj onikmikti ijkuak onitlachtekiaya.

Onechkitskijkej uan onechtsakej pero ijkuak onechkixtijkej, okachi opejki nitlachteki. San notech onimokuayejyekouaya, amo onikchiuaya tlen onechiluiayaj, san niman onikualaniaya uan onitetlajyouiltiaya.

BIBLIA OKIPATLAK NONEMILIS: Ijkuakon nonantsin opejki momachtia Biblia uan omochi iTlaixpantijka Jehová. Onechtlajtlachialti ken okipatlak inemilis. Oniknekiaya nikmatis tlen okipaleui, ik non, opejki nimotlapouia iuan iTlaixpantijkauan Jehová.

San niman onikitak yejuan amo otlamachtiayaj ken oksekimej religiones uan nochi tlen otlamachtiayaj okisaya itech Biblia. Yejuan otetlapouiayaj tekalijtik ijkon ken akinmej opejki kichiuaj ken Cristo (Mateo 28:19; Hechos 20:20). Ijkuak onikitak nochtin omotlasojtlayaj, onikneltokak yejuan okiueyichiuayaj toTajtsin Dios ken ye kineki (Juan 13:35).

Ijkuak opejki nimomachtia Biblia onikajsikamatki omonekiaya nikpatlas tlen onikchiuaya. Jehová amo kipaktia matiauilnemikan, ik non, para uelis nikyolpaktiskia omonekiaya ayakmo niauilnemis nion nikchiuas tlen kijtlakoua tocuerpo (2 Corintios 7:1; Hebreos 13:4). Onechyolchika ijkuak onikmatki uelis nikyolpaktis noso nikyolkokos Jehová ika tlen nikchiua (Proverbios 27:11). Ik non, ayakmo onikintekitiltiaya teposmej tlen ika moteuiaj uan ayakmo onikchichinaya marihuana, onimochijchika nikpatlas nonemilis. Onechchiuili oui ayakmo nimotlatlanis ika tomin uan niauilnemis.

Amo oniknekiaya noyolikniuan makimatikan onimomachtijtoka Biblia iuan iTlaixpantijkauan Jehová. Pero ijkuak oniktlajtolti tlen okijto Jesús, san niman onikinmilui noyolikniuan onimomachtijtoka Biblia, itech Mateo 10:33 Jesús okijto: “Iwa tla aka kijtos teixpa, amo nechixmati, Ne noiwa nikijtos ixpan Notajtsi non kajki ilwikak amo nikixmati”. Omotlajtlachialtijkej ijkuak ijkon onikinmilui. Maski amo okineltokayaj, ne yonikijtojka nikpatlas nonemilis.

TLATEOCHIUALISTLI TLEN YONIKSELI: Nonantsin sapanoua oyolpakik ijkuak okitak opejki nikchiua tlen onimomachtiaya itech Biblia. Axkan ye kimati ayakmo nikchiua tlen achto onikchiuaya. Tiyolpakij ijkuak timotlapouiaj ken tiktlasojtlaj Jehová. Ijkuak nikilnamiki ken onikpiaya nonemilis, nechtlajtlachialtia ken Jehová yonechpaleui. Axkan ayakmo nikneki niauilnemis nion nikpias miak tomin.

Tla amo nimomachtiskia Biblia, xamo axkan nitsaktoskia noso ayakmo niyoltoskia. Axkan ika miak pakilistli niktekichiuilia Jehová iuan nosiua. Nikpia se nochpoch tlen nechtlakaita uan noijki kitekichiuilia Jehová. Niktlasojkamati porque onechmachtijkej tlen kijtoua Biblia, ik non, nochipa nitetlapouia. Niktlasojkamatilia Jehová porque axkan nipoui itech ialtepe uan noijki porque onechpaleui manikixmati.

[Tlen moijtoua]

“Onechyolchika ijkuak onikmatki uelis nikyolpaktis noso nikyolkokos Jehová ika tlen nikchiua”

[Tlen moijtoua]

Onechtlajtlachialti ken nonantsin okipatlak inemilis

[Tlen moijtoua]

Nosiua uan nochpoch