Ngbangɔ ndo gbinyangbi dungɔ lɛ ngɛ̃́

Ye mɛndó to kɔli kɔi mɛndó ndo ye wele ti falanga gba nga wa nzĩ ya lo zia aye niko nɛ? Di tɛnɛ mɛ lo tɛnɛ.

“Mbi ndo yendó wele ti punda gba.”​—RICHARD STEWART

ADŨNDÓ LO NA BULU TI: 1965

KA KƆDƆRƆ TI: JAMAÏQUE

DUNGƆ LƐ NGƐ̃́ TƐ LO TI GÃ: WA LƐNGƆ WELE TI FALANGA NGA WA NZĨ

SE MƐNDÓ MBI DA GÃ: Mbi maindó ka kartye tɛ awa yɛlɛ mɛ azi ndo du ka da gba, ka Kingston, kɔdɔrɔ gbia ti Jamaïque. Ta azi gba ndó na kwa ma, ni la ala ndo hɛ̃ndo tɛrɛ la gba na lingɔ mobulu. Azi ndo dundó na mbɛtɔ gba na lo ti mobulu niko. Mbi ndo mandó ngombe ndo kpale bí zu.

Mama ndo lindó kwa kpengbani wa lo ndo li ngandó zu ya mbi na angambi mbi sɛ e du nzɔ̃ni. Gwɛ̃ tɛ lo dundó ya e li kalasi nzɔ̃ni. Ta mbi ndo yendó nvɛ̃ni kalasi ma, kanda mbi ndo yendó wele ti punda gba. Ni la mbi ndo kpɛndó kalasi ti nɛngɔ ya mbi gwe mbi ba wele niko. Mbi banda ngandó dɔngɔ nɔ na punda.

Na gesi mbi hɛ̃ndó tɛrɛ mbi gba na ya lɛngɔ wele ti punda. Mbi ndo lɔ ngandó awe gba. Mbi ndo nyɔndó bangɛ, wa mbi ndo nzĩ ngandó nzĩ ti nɛngɔ ya mbi lua falanga. Mbi ndó na angomba gba, kanda merci na Nzapa na ndenge mɛndó ta mbi ho bɛ zo kɔi na ngoi mɛndó e ndo gwe ti nzĩngɔ nzĩ ma.

Na lo ti aye mɛndó mbi ndo li ko, apolisi gbɔ̃ndó mbi bi bɔlɔkɔ. Mbi di dirindó ndo aye mɛ mbi ndo li na ngoi mɛndó azi mbi ka bɔlɔkɔ. Mbi di tindó siɔ ni ɔngɔ se mɛndó mbi da uzu. Abɛse du ya azi ndo hũndó mbi mabere nzɔ̃ zo ko, mbi ndó siɔ zo, mbi ndó wa zaga wa mbi ndó nyɛi ndó gba. Ta mbi ndo hũndó zo kɔi ngbondoni ge lɛ mbi ma.

SE MƐNDÓ NGBANGƆ GBINYANGBI NA DUNGƆ LƐ NGƐ̃́ TƐ MBI: Mama tɛ mbi mandandó Ngbangɔ wa lo ti ngandó tɛmwɛ tɛ Yehova na ngoi mɛndó mbi ndo li asiɔ ye niko. Mbi hũndó ya mama ti na aseliye ti nzɔ̃ni wa ni benda ngandó likebi tɛ mbi. Mbi ndo gindó hĩngangɔ ye mɛndó gbinyangbi dungɔ lɛ ngɛ̃́ tɛ mama tɛ mbi, ni lindó ya Atɛmwɛ tɛ Yehova banda mandangɔ mbi na Ngbangɔ.

Mbi hũndó ya tɛnɛ mɛ Atɛmwɛ tɛ Yehova ndo ha aɔngbi na tɛ asambela mɛndɛ̃, wa mbi gbɔ̃ ngandó ndani ya tɛnɛ zu mɛndó ala ndo tɛnɛ ando lo kaya Ngbangɔ. Bo ala la ndo fa tɛnɛ nyɔ da na nyɔ da nga ma se mɛndó awakristo ti uzu ndo li na ni. (Matie 28:19; Awa Pangɔ Kwa 20:20) Mbi yendó na bɛ mbi kɔi ya mbi lua bɛta sambela na ngoi mɛndó mbi hũ songo mɛndó ala ndo fangbi ka popo tɛ la.​—Yoanɛ 13:35.

Aye mɛndó mbi ndo manda kaya Ngbangɔ atondó mbi ya, mbi zia aye ti siɔni mɛndó mbi ndo li. Mbi mandandó ya Yehova ndo kɛ̃ pite, wa se mbi ye hɛ̃ngɔ lo dengɔ bɛ ko, ayɔ ya mbi zia aye zu mɛ alengbi ti gbɛ̃ngɔ sãte tɛ mbi. (2 Kɔrinto 7:1; Aebreo 13:4) Na ngoi mɛndó mbi manda ya aye mɛ zo ndo li alengbi ti hɛ̃ngɔ Yehova dengɔ bɛ bere vundu ko, ni gbɔ̃ndó bɛ mbi nvɛ̃ni. (Masese 27:11) Mbi mundó ekateli ti ziangɔ bangɛ, ziangɔ ngombe wa mbi ti nga nzɔ̃ zo. Ye mɛ du pɛnɔ ya mbi zia adundó lɔngɔ awe gba nga na lɛngɔ wele ti falanga.

Na ebandeli ta mbi yendó ya akwa mbi hĩnga ya Atɛmwɛ tɛ Yehova ndo manda mbi na Ngbangɔ ma. Kanda mbi gbinyangbindó dangɔ bɛ tɛ mbi na ngoi mɛndó mbi di mbɛti ti Matie 10:33, mɛ Yezo tɛnɛ ya: “Zo ko gbanda abɛrɛ na gbɛlɛ azi ya, ta ni hĩnga mbi ma ko, mbi bɛrɛ nga gbanda na gbɛlɛ To mbi mɛ ka yayu ya, ta mbi hĩnga zo niko ma.” Tɛnɛ niko tondó mbi ya mbi pa hɛ̃ akwa mbi ya Atɛmwɛ tɛ Yehova ndo ha mbi na Ngbangɔ. Ala kamwandó gba. Ta ala lengbindó ti yengɔ ya zo nga mabere mbi lengbi ti tingɔ wakristo ma. Kanda mbi pandó hɛ̃ la ya, ta mbi di ye lingɔ aye mɛndó mbi ndo li uzu ma.

ANZƆ̃ SULU MƐ MBI LUA: Mama tɛ mbi tindó na dengɔ bɛ gba na ngoi mɛndó lo hũ ya, mbi ndo tɔndɔ andia ti ya Ngbangɔ. Ta lo di dɛ kpɛ mbɛtɔ ya bere mbi dɛ bo mbi li aye ti siɔni ma. E ndo tɛnɛ tɛnɛ gba na ndo ye mɛ abombi e ndoni kɔi: songo tɛ e na mbage tɛ Yehova. Ngoi mɛndɛ̃ mbi ndo da bɛ mbi na se mɛndó mbi da gã mbi ndo kamwa na bangɔ se mɛndó Yehova za na mbi ya mbi gbinyangbi. Mbi ziandó dungɔ lɛ ngɛ̃́ ti lɔngɔ awe gba nga na gingɔ aye ti gigi.

Se ta mbi tɔndɔndó andia ti ya Ngbangɔ ma ko, ale ngoi mɛndɛ̃ mbi kpindó wɛ bere mbi dɛ ka bɔlɔkɔ. Kanda mbi na olo kaya ndasewa ti dengɔ bɛ nvɛ̃ni. Mbi na dengɔ bɛ ti lingɔ kwa hɛ̃ Yehova Nzapa ndoni kɔi na ya mbi nga na nyi e ti wali mɛ na tɔndɔngɔ. Mbi ndo hɛ̃ Yehova siakɔli na ndenge mɛ lo za mbi ya mbi li kaya bombi tɛ awakristo mɛ na songo. Mbi na dengɔ bɛ na ndenge mɛndó zo kɔi li kpengbani ti hangɔ mbi na Ngbangɔ. Mbi ndo sepala gba na nzɔ̃ tangɔ ligɛrɛ mɛ mbi na ni ti zangɔ azi mɛndɛ̃ ya ala hĩnga tɛnɛ mɛ kaya Ngbangɔ. Mbi ndo hɛ̃ Yehova Nzapa siakɔli gba na ndenge mɛ lo li ya mbi dɔ dã na lo na lége ti nzɔ̃ bɛ tɛ lo.

 [Tɛnɛ ti koko mbeti na ndo pajɛ 11]

“Mbi mandandó ya aye mɛ zo ndo li alengbi ti hɛ̃ngɔ Yehova dengɔ bɛ bere vundu”

[Limɔ ti pajɛ 11]

Mbi, yambi nga na nyingambi tɛ e

[Limɔ ti pajɛ 11]

Mbi hũndó ya mama ti na aseliye ti nzɔ̃ni