Beibele e Fetoša Maphelo

KE’NG seo se tutueleditšego mopetšhi le lehodu go tlogela temalelo ya gagwe le go fetoša tsela ya gagwe ya bophelo? Bala seo a se bolelago.

“Ke be ke Fišegela Mekato ya Dipere.”—RICHARD STEWART

NGWAGA WA MATSWALO: 1965

NAGA: JAMAICA

BOPHELO BJA PELE E EBA MOKRISTE: MOPETŠHI LE SESENYI

BOPHELO BJA KA BJA NAKONG E FETILEGO: Ke goletše lefelong le le diilago leo le nago le baagi ba bantši kudu la Kingston, mošate wa Jamaica. Go hloka mošomo le bosenyi di be di atile kudu. Dihlopha tša disenyi di be di phediša batho ka poifo. Ke be ke ekwa medumo ya dithunya mo e ka bago letšatši le lengwe le le lengwe.

Mma, yo a bego a šoma ka thata, o ile a dira sohle seo a ka se kgonago bakeng sa go hlokomela nna le moratho wa ka gotee le kgaetšedi ya ka. O ile a kgonthišetša gore re hwetša thuto ya maemo a godimo. Ke be ke sa kgahlegele sekolo gakaalo, eupša ke be ke fišegela kudu mekato ya dipere. Ke be ke fela ke thiša sekolo gomme ke eya dipereng. E bile ke be ke namela dipere.

Go se go ye kae ke ile ka thoma go petšha dipere kudu. Ke ile ka phela bophelo bjo bo gobogilego le go rata basadi kudu. Ke be ke kgoga patše e bile ke utswa e le gore ke kgone go lefelela mokgwa wa ka wa bophelo. Ke be ke ena le dithunya tše dintši, eupša ga bjale ke leboga gore ga go le o tee yo a ilego a bolawa bohlakoding bjoo ke ilego ka tšea karolo go bjona.

Mafelelong, ke ile ka swarwa ke maphodisa le go išwa kgolegong ka baka la bosenyi bja ka. Ka morago ga go lokollwa, ke ile ka fo tšwela pele ka mokgwa wa ka wa bophelo. Ge e le gabotse, ke ile ka senya le go feta pele. Gaešita le ge ke ena le sefahlego seo se sa sodišego, ke be ke phegelela go dira dilo ka tsela ya ka, ke rumolega gabonolo e bile ke le sehlogo. Ke be ke tshwenyega ka nna feela.

KAMOO BEIBELE E FETOTŠEGO BOPHELO BJA KA: Nakong ya ge ke be ke phela bophelo bja ka bja mathata, mma o ile a ithuta Beibele gomme a fetoga yo mongwe wa Dihlatse tša Jehofa. Ke ile ka bona diphetogo tše di kgahlišago semelong sa gagwe gomme ka nyaka go tseba. Ke ile ka dira phetho ya go nyaka go tseba seo se fetošitšego mma, ka gona ka thoma go ahlaahla Beibele le Dihlatse.

Ke ile ka hwetša gore dithuto tša Dihlatse tša Jehofa di be di fapane le tša madumedi a mangwe le gore dilo ka moka tšeo Dihlatse di bego di di bolela di be di theilwe Beibeleng. E be e le sehlopha feela seo ke bego ke se tseba seo se bego se dira boboledi ka ntlo le ntlo, go swana le Bakriste ba pele. (Mateo 28:19; Ditiro 20:20) Ke be ke kgodišegile gore ke hweditše bodumedi bja therešo ge ke be ke bona lerato la kgonthe leo di bego di le bontšha.—Johane 13:35.

Seo ke ithutilego sona ka Beibeleng se ile sa dira gore ke bone go nyakega ga go dira diphetogo tše dikgolo bophelong bja ka. Ke ithutile gore Jehofa Modimo o hloile bootswa le gore ge e ba ke nyaka go mo kgahliša, ke be ke swanetše go tlogela mekgwa yeo e bego e šilafatša mmele wa ka. (2 Bakorinthe  7:1; Baheberu 13:4) Ke ile ka kgomega ge ke be ke ithuta gore Jehofa o na le maikwelo le gore ditiro tša ka di ka mo thabiša goba tša mo kweša bohloko. (Diema 27:11) Ka gona ke ile ka dira phetho ya go kgaotša go kgoga patše, ka lahla dithunya tša ka le go leka go kaonefatša semelo sa ka. Tše dingwe tša diphetogo tše thata kudu tšeo ke ilego ka di dira e be e le go tlogela boitshwaro bjo bo gobogilego le go kgaotša go petšha.

Mathomong, ke be ke sa nyake gore bagwera ba ka ba tsebe gore ke be ke ithuta Beibele le Dihlatse tša Jehofa. Eupša dilo di ile tša fetoga ka morago ga gore ke bale Mateo 10:33, moo go begilwego mantšu a Jesu a rego: “Mang le mang yo a ntatolago pele ga batho, le nna ke tla mo latola pele ga Tate yo a lego magodimong.” Mantšu ao a ile a ntutueletša go botša bagwera ba ka gore ke be ke ithuta le Dihlatse. Ba be ba maketše. Ba be ba sa dumele gore motho wa go swana le nna o be a nyaka go fetoga Mokriste. Eupša ke ile ka ba botša gore ke be ke sa nyake go itswakanya le selo le ge e le sefe seo se bego se tswalana le bophelo bja ka bja nakong e fetilego.

KAMOO KE ILEGO KA HOLEGA KA GONA: Mma o be a thabile kudu ge a be a mpona ke thoma go phela ka melao ya motheo ya Beibele. Ga bjale ga a tshwenyege ka gore ke dilo dife tše mpe tšeo nka bago ke di dira. Re boledišana ka selo seo re swanago ka sona—go rata ga rena Jehofa. Ka dinako tše dingwe ge ke lebelela morago dilong tšeo ke bego ke di dira, ga ke dumele diphetogo tšeo ke kgonnego go di dira ka thušo ya Modimo. Ga ke sa hlwa ke kganyoga bophelo bjo bo gobogilego le bja go rata dilo tše di bonagalago bjoo ke bego ke bo phela.

Ge nkabe ke se ka ka ka arabela molaetšeng wa Beibele, nkabe lehono ke hwile goba ke le kgolegong. Lega go le bjalo, ga bjale ke na le lapa le lebotse le le thabilego. Ke thabišwa kudu ke go hlankela Jehofa Modimo ke ena le mosadi wa ka yo a nthekgago gotee le morwedi yo a itshwerego gabotse. Ke leboga Jehofa ge a ntumeletše go ba karolo ya borwarre bjo lerato bja Bokriste. Ke thabišwa kudu ke gore motho yo mongwe o ile a dira maiteko a go nthuta therešo ya Beibele. Le gona ke tšeela godimo dibaka tšeo ke nago le tšona tša go thuša ba bangwe go ithuta seo Beibele e se rutago. Ke leboga Jehofa Modimo ka mo go kgethegilego bakeng sa botho bja gagwe bjoo bo ilego bja nkgogela go yena.

[Ntlhakgolo go letlakala 11]

“Ke ile ka ithuta gore Jehofa o na le maikwelo le gore ditiro tša ka di ka mo thabiša goba tša mo kweša bohloko”

[Seswantšho go letlakala 11]

Ke ile ka bona diphetogo tše di kgahlišago semelong sa mma

[Seswantšho go letlakala 11]

Ke ena le mosadi wa ka le morwedi