Ombimbiliya Ipilulula Omwenyo Wovanthu

OMULUME umwe ankho uvaka, ulinga vala ovipuka ovivi, wetyiyeka-po. Oityi etyiyekela-po? Tanga omukanda ou utyinoñgonoke.

“Ankho Ndyityihole Tyokutala Tyina Ononkhambe Mbuhateka” — RICHARD STEWART

ENIMA ATYITWA: 1965

KOTYILONGO ATYITILWA: JAMAICA

EHIPULULO: ANKHO UMONENA MU VAKWAVO TUPU ANKHO UVAKA

OMWENYO WANGE KOHALE: Natyitilwa mepunda-umbo limwe lyo Jamaica litiwa Kingston. Apa tukala ovilinga kavimoneka. Patilisa unene owoma mokonda ovanthu kavelivili, vakalela vala okulwa, ononthiki ambuho utehela vala ovanthu valoya.

Mee ankho uhanda atuho apa tulilandulila tukale ovana valongoka nawa, vena onondunge, etupake mosikola. Mahi ame ankho hihande kosikola, ankho ndyityihole tyokutala tyina ovanthu velitaata nononkhambe. Pamwe ankho ndyilañga umwe kosikola pala okwenda vala kononkhambe.

Apakala vala katutu na ame pahe andyilipake umwe mokuhateka nononkhambe. Ankho ndyilinga ovipuka viasila unene, ankho ndyina avahikwena ovanyingi, ndyipwena, ndyivaka. Tyina ankho tukavaka ankho twenda umwe nomauta. Mahi tyilinga Huku katwaipaele omunthu nawike.

Onthiki imwe andyikwatwa andyitwalwa mokaleya. Etyi pahe natunda-mo andyivilipo umwe. Ovanthu tyina vanthala ñgaa ankho vasoka okuti ndyikahi nawa, mahi naina ndyimukalavi, hesuki-ale novanthu.

OÑGENI OMBIMBILIYA YAPILULULA OMWENYO WANGE: Etyi pakala, mee ahimbika okulilongesa Ombimbiliya Nonombangi mba Siovaa. Andyimono okuti mee pahe omunthu omuwa ukahi nawa. Mokonda pahe ankho nahanda umwe okunoñgonoka oityi ena nokulongeswa tyemukalesa nawa ngatyina, naame andyihimbika okulilongesa Ombimbiliya.

Namona okuti Onombangi mba Siovaa etyi valongesa katyelifwile netyi ovikapela ovikwavo vilongesa, vana vetyipola umwe mo Mbimbiliya. Ovo vala ndyii venda umwe momaumbo ovanthu opo vekevelongese Ombimbiliya, ngetyi ankho tyilinga Ovakilisitau vo kohale. (Mateusi 28:19; Ovilinga 20:20) Etyi namona olwembia vena na vakwavo andyityimono umwe okuti navasa elilongeso liotyotyili. — Suau 13:35.

Etyi nelilongesa Ombimbiliya namona okuti Huku uyele ovanthu valinga ovipuka ovivi. Netyimona okuti opo ame ndyikale epanga lya Huku, ankho ndyina okuyekapo ovipuka aviho ovivi ndyilinga vinyona olutu lwange. (2 Ova Kolindu 7:1; Ova Hebeleu 13:4) Etyi namona okuti ovipuka ndyilinga vipondola okunumanesa Siovaa, atyinkhalesa omapita. (Provérbios 27:11) Andyiyekepo okusipa epangwe, omauta ankho ndyina-o andyiepolo-mo meumbo liange. Otyipuka tyemphuilisile vali, okuyekapo ovahikwena, nokumonena mu vakwetu.

Potete ankho hahandele okupopila omapanga ange okuti ndyina nokulongeswa Ombimbiliya Nonombangi mba Siovaa. Pahe etyi natanga onondaka mba Sesusi mbuli mu Mateusi 10:33, andyivepopila. Omo Sesusi wati: “Una waanya okuti omulongwa wange kovanthu, na ame ku Tate yange ukahi keulu himemutavela okuti omulongwa wange.” Etyi nevepopila avehetyitavela, ankho vasoka okuti omunthu nga ame ketyivili-ale okukala omunthu wa Huku. Andyivepopila umwe okuti hihande vali okulinga ovipuka ovivi.

OUWA PATYI NAPOLA-KO: Etyi nayekapo okulinga ovivi, mee ahambukwa unene. Wahambukilwe mokonda pahe ankho kalingi vali otyiho tyokuti hamwe ndyina nokupikitila kovipuka viaamwene. Pahe tuhipulula umwe nawa, haunene tupopia evi viayemba ku Huku yetu Siovaa. Pamwe tyina namasoko umwe ñgaa kovipuka vina ankho ndyilinga, ndyipandula umwe Huku. Pahe ovipuka vina ovivi ankho ndyilinga viokuhanda unene ovahikwena, nokuovola vala onombongo, ndyiviyele.

Ine helilongesile Ombimbiliya ñgeno hityii hono ndyiivalela-pi. Ñgeno oola oyo tyafwa nankhia-le ine hatyo ñgeno ndyili mokaleya. Pahe ndyikahi nawa, ndyina omukai wange nomona wange. Atuho tufenda Huku yetu Siovaa. Hipopi-ale na Siovaa! Wandingila okankhenda, andyeta pokati kovanthu vae. Tupu ndyipandula unene omunthu una wokwandongesile. Pahe naame ndyilongesa vakwetu opo navo vanoñgonoke Huku.

[Onondaka Mbavilapo]

“Namona okuti ovipuka ndyilinga vipondola okunumanesa Siovaa”

[Olutalatu]

Ame nomukai wange nomona wetu

[Olutalatu]

Andyimono okuti mee pahe omunthu omuwa ukahi nawa