Baibuli Neehindura Emitwarize Y’abantu

NIKI ekyahigire omuteezi wa zaara kandi omushuma kucwa emize ye n’okuhindura emitwarize ye? Shoma oreebe eki arikugamba.

“Nkaba Ninkundira Kimwe Empaka z’Okuvuga Embaraasi.”​—RICHARD STEWART

OMWAKA OBU NAAZAARWA: 1965

EIHANGA RY’OBUZAARWA: JAMAICA

EBY’ENYIMA: OMUTEEZI WA ZAARA KANDI OMUKOZI W’EMISHANGO

EBI NAARABIREMU: Nkakurira omu mwanya gw’abooro kandi ogurimu abantu baingi omuri Kingston, ekibuga ekikuru ekya Jamaica. Abantu baingi bakaba bataine mirimo kandi obuhenda biragiro buri bwingi. Ebigombe by’abashuma bikaba nibireetera abantu kutiina. Buri izooba nkaba mpurira amasasi.

Maawe akaba naakora munonga kutureeberera, nyowe na barumuna bangye. Akateeraho kureeba ngu twatunga obwegyese burungi. Nkaba ntarikukunda kushoma, kureka nkaba ninkunda empaka z’okuvuga embaraasi. Nkaba nyosha okuza aha ishomero reero nza kureeba empaka z’embaraasi. Kandi naanye nkaba niinvuga embaraasi.

Omu bwire bukye nkatandika kuteera zaara y’empaka z’embaraasi. Nkeejumba omu bikorwa by’obushambani kandi naakunda abakazi baingi. Nkareetsa tsigara kandi naiba kubaasa kutunga esente z’okukoresa. Nkaba nyine embundu nyingi, kwonka ninsiima munonga ahabw’okugira ngu tihariho owaafiire emirundi yoona ei naazikoreise kwiba.

Bwanyima, nkakwatwa poriisi kandi naateebwa omu kihome ahabw’emishango yoona ei naakozire. Ku naarugire omu kihome, nkagaruka naakora ebi naabaire ninkora enyini. Nangwa, nkeeyongyera kutwaza kubi, kukira oku naabaire ndi. N’obu aha maisho naabaire nindeebeka nk’omuntu murungi, nkaba ndi enshaarizi, kandi ndikukora kyona eki mmaririire kukora. Nkaba ntarikufayo aha bandi.

OKU BAIBULI YAAHINDWIRE EMITWARIZE YANGYE: Omu bwire obwo obwabaire bugumire, maawe akatandika kwega Baibuli kandi yaaba Omujurizi wa Yehova. Nkareeba empinduka nungi ezi yaakozire kandi eki kikandeetera kwenda kumanya. Nkacwamu kusherura ekyareeteire maawe kukora empinduka, n’ahabw’ekyo nkatandika kugaaniira aha Baibuli n’Abajurizi ba Yehova.

Nketegyereza ngu enyegyesa z’Abajurizi ba Yehova nizitaana aha z’ediini ezindi kandi ngu buri kimwe eki baabaire nibagamba bakaba nibakyegamiza ahari Baibuli. Nibo bonka abu naabaire niimanya abaabaire nibabuurira enju aha nju nk’Abakristaayo ab’ekyasha ky’okubanza oku baabaire nibakora. (Matayo 28:19; Ebyakozirwe 20:20) ku naareebire rukundo ei barikworekana, nkahamiza kimwe ngu ntungire ediini eyaabuzima.—Yohaana 13:35.

Ebi naayegire omu Baibuli bikandeetera kumanya ngu nyine kukora empinduka z’amaani munonga. Nkeega ngu Yehova Ruhanga naayanga obushambani, kandi ngu naaba niinyenda kumushemeza nyine kureka ebikorwa byona ebirikushiisha omubiri gwangye. (2 Abakorinso 7:1; Abaheburaayo 13:4) Kikankwataho munonga kumanya ngu Yehova aine enyehurira kandi ngu ebikorwa byangye nibibaasa kumugwisa kubi nari kumushemeza. (Enfumu 27:11) N’ahabw’ekyo nkamariirira kucwa omuze gw’okureetsa, kuhayo embundu zangye, n’okuhindura emitwarize yangye. Zimwe aha mpinduka ezaabaire zigumire okukora, n’okureka ebikorwa by’obushambani n’okuteera zaara.

Omu kubanza, nkaba ntarikwenda banywani bangye bakimanye ngu niinyega Baibuli n’Abajurizi ba Yehova. Kwonka emiteekateekyere yangye ekahinduka bwanyima y’okushoma Matayo 10:33, ebigambo bya Yesu ebyo nibigira biti: “Kwonka weena oriinyehakana omu maisho g’abantu, naanye ndyamwehakana omu maisho ga Tata ori omu iguru.” Ebigambo ebyo bikampiga kugambira banywani bangye ngu Abajurizi ba Yehova bakaba nibanyegyesa Baibuli. Bakatangaara. Bakaba batarikukiikiriza ngu omuntu nkaanye niinyenda kuba Omukristaayo. Kandi nkabagambira ngu nkaba ntarikwenda kugaruka kutwaza nka ira.

OKU NGASIIRWE: Maawe akashemererwa munonga ku yaandeebire ninkuratira emisingye ya Baibuli. Hati takyerarikirira ngu nyine ebintu bibi ebi ndikukora. Nitugamba aha kintu eki turikushushanisa, niyo rukundo ei twiniire Yehova. Obume ku ndikuteekateeka aha mitwarize yangye ey’enyima, nintangaara kureeba empinduka ezi nkozire ahabw’obuhwezi bwa Yehova. Hati tinkiine kyetengo ky’okwejumba omu bikorwa by’obushambani nari kusherura esente nyingi nk’oku naabaire ninkora enyima.

Ku ogire ngu tindikiriize obutumwa bwa Baibuli, hati kuri naafiire nari kuri ndi omu kihome. Kwonka hati nyine eka nungi erimu okushemererwa. Nshemereirwe kuheereza Yehova ndi n’omukazi wangye orikunshagika na muhara waitu. Ninsiima munonga Yehova ahabw’okunyikiriza kuba omwe aha Bakristaayo abaine rukundo. Nikinshemeza ahabw’okugira ngu ahariho owaatairemu amaani kunyegyesa amazima ga Baibuli. Kandi naanye ninsherura oburyo bw’okuhwera abandi kwega eki Baibuli erikwegyesa. Okukira munonga niinyebaza Yehova ahabwa rukundo n’embabazi ze akanyeyiriza haihi.

[Ekishushani]

“Nkamanya ngu Yehova aine enyehurira kandi ngu ebikorwa byangye nibibaasa kumugwisa kubi nari kumushemeza

[Ekishushani]

Ndi n’omukazi wangye na muhara waitu

[Ekishushani]

Nkareeba empinduka nungi ezi maawe yaakozire