Baebolo Ne Kakyi Sonla

DUZU a maanle awie mɔɔ to kyakya na eza ɔle awule la hakyile ye subane nee ye ɛbɛlabɔlɛ ɛ? Kenga mɔɔ ɔhanle la.

“Ɛnee Me Nye Die Mgbɔnwɔ Mɔɔ Bɛfa Bɛsu Ɛnriandilɛ La Anwo.”​—RICHARD STEWART

BƐWOLE YE: 1965

MAANLE MƆƆ ƆVI NU: JAMAICA

Ɔ NWO EDWƐKƐ: ƆTO KYAKYA YƐƐ ƆDI ƐTANE

ME ƐBƐLA DƐBA NE: Bɛtetele me wɔ Jamaica suakpole Kingston azo. Ɛnee menli dɔɔnwo wɔ ɛkɛ yɛɛ bɛdi ehyia. Ɛnee menli dɔɔnwo ɛnnyia gyima ɛnyɛ yɛɛ ɛtanelilɛ ɛbu zo wɔ ɛkɛ. Ɛnee ɛkɛ ne yɛ ɛzulolɛ. Mendele etu ne alehyenlɛ biala.

Me mame yɛle gyima ɛsesebɛ nleanle me nee me diema nrenyia nee raalɛ ekyi ne. Ɔbɔle mɔdenle ɔmaanle yɛhɔle sukulu. Ɛnee mengulo sukulu ɛhɔlɛ noko ɛnee me nye die mgbɔnwɔ mɔɔ bɛfa bɛsu ɛnriandilɛ la anwo. Ɔyɛ a mengɔ sukulu, emomu mekɔ ɛleka mɔɔ mgbɔnwɔ su ɛnriandilɛ la. Mendɛnlanle mgbɔnwɔ zo bɔbɔ menganle bɛ.

Yeangyɛ membɔle ɔ bo kɛ mekɔ mgbɔnwɔ ne mɔ anwo bɛte. Membɔle ɛbɛlatane na ɛnee mekulo mraalɛ kpalɛ. Ɛnee meno wee yɛɛ menwuale awie mɔ menvale meneanle me nwo. Ɛnee melɛ adu dɔɔnwo na kɛkala ɔyɛ me fɛ kɛ me etu ne mɔ biala angu awie wɔ mekɛ mɔɔ melɛwua bɛ la.

Nzinlii, kpolisima hyele me na bɛdole me efiade ɔlua me ɛtanelilɛ ne ati. Bɛyele me la membɔle me ɛbɛla dɛba ne abo bieko. Akee menzɛkyele mendɛlale dɛba ne. Ɛnee ɛnwu me a, ɛbaha kɛ menze nwolɛ bie noko ɛnee meka kɛ meyɛ debie a awie ɛngola ɛnzi me adenle, ɔngyɛ na meava ɛya yɛɛ me ti yɛ se. Ɛnee mele angomedi.

KƐZI BAEBOLO NE HAKYILE ME ƐBƐLABƆLƐ LA: Mekɛ mɔɔ ɛnee melɛbɔ ɛbɛla ɛhye la anu, me mame zukoale Baebolo ne na ɔrayɛle Gyihova Dasevolɛ. Menwunle kɛ ye subane ɛhakyi ɛyɛ kpalɛ na ɛnee mekulo kɛ menwu mɔɔ boale ye la. Yemɔti membɔle ɔ bo kɛ me nee Alasevolɛ ne mɔ bɔ Baebolo nu adawu.

Menwunle kɛ Gyihova Alasevolɛ ne mɔ ngilehilelɛ ne le ngakyile fi asɔne gyɛne mɔɔ ɛha la ɛdeɛ ne anwo yɛɛ ɛnee bɛgyinla Baebolo ne azo a bɛkilehile a. Bɛdabɛ ala a ɛnee bɛka edwɛkɛ ne wɔ azua nu kɛ mɔɔ alimoa Kilisienema ne yɛle la a. (Mateyu 28:19; Gyima ne 20:20) Mɔɔ menwunle ɛlɔlɛ mɔɔ bɛlɛ bɛmaa bɛ nwo la menliele menlile bɔkɔɔ kɛ menwu nɔhalɛ ɛzonlenlɛ ne.​—Dwɔn 13:35.

Mɔɔ menzukoale ye Baebolo ne anu la maanle menwunle kɛ ɔwɔ kɛ meyɛ nzenzaleɛ wɔ me ɛbɛlabɔlɛ nu. Menwule kɛ Gyihova kyi adwɔmane ɛbɛla na saa mekulo kɛ meyɛ mɔɔ ɔsɔ ɔ nye a ɛnee ɔwɔ kɛ megyakyi nyɛleɛ mɔɔ gua me sonlabaka ne anwo evinli la. (2 Kɔlentema 7:1; Hibuluma 13:4) Mɔɔ menzukoale kɛ Gyihova te nganeɛ ɔti me nyɛleɛ kola maa ɔdi nyane anzɛɛ ɔ nye die la, ɔhanle me kpalɛ. (Mrɛlɛbulɛ 27:11) Ɔti menzile kpɔkɛ kɛ menrɛnlo wee, menguale me etu ne mɔ lɔ na membɔle mɔdenle kɛ mekakyi me subane. Ɛnee nzenzaleɛ mɔɔ yɛ se kpalɛ maa me kɛ mebayɛ la a le kɛ mebagyakyi mraalɛ ɛhulolɛ nee kyakyadolɛ.

Mɔlebɛbo ne ɛnee mengulo kɛ me gɔnwo mɔ nwu ye kɛ me nee Gyihova Alasevolɛ ɛlɛsukoa Baebolo ne. Noko ninyɛne hakyile wɔ mekɛ mɔɔ mengengale Gyisɛse edwɛkɛ mɔɔ bɛhɛlɛ ye wɔ Mateyu 10:33 la. Ɔse: “Awie biala mɔɔ kpo me wɔ menli nyunlu la, medame noko mebakpo ye wɔ me Ze mɔɔ wɔ anwuma la anyunlu.” Zɔhane edwɛkɛ ne maanle menganle mengilele me gɔnwo mɔ kɛ me nee Alasevolɛ ne mɔ ɛlɛsukoa debie. Ɔzinle bɛ nwo. Bɛanlie bɛanli kɛ awie mɔɔ le kɛ medame la kulo kɛ ɔyɛ Kilisienenli. Noko menganle mengilele bɛ kɛ mengulo kɛ mebɔ me ɛbɛla dɛba ne bieko.

KƐZI YEBOA ME LA: Me mame nwunle kɛ melɛfa Baebolo ngyinlazo meabɔ me ɛbɛla la, ɔ nye liele kpole kpalɛ. Ɛnee ɔnzulo kɛ mebayɛ ninyɛndane. Me nee ye ka ɛlɔlɛ mɔɔ yɛlɛ yɛmaa Gyihova la anwo edwɛkɛ. Ɔyɛ na menea kɛzi ɛnee me ɛbɛlabɔlɛ de la na menwu nzenzaleɛ mɔɔ Nyamenle ɛboa me ɛmaa meyɛ la a, ɔsi me nwo. Me nye ɛnlie ɛbɛlatane nee ninyɛndane mɔɔ ɛnee meyɛ la anwo bieko.

Saa meandie Baebolo nu folɛdulɛ ne a, anrɛɛ bie a mewu anzɛɛ mela efiade. Noko kɛkala melɛ abusua asetɛnla mɔɔ yɛ anyelielɛ. Me nee me ye mɔɔ le boavolɛ kpalɛ nee me ra raalɛ ne mɔɔ yɛ tieyɛ la ɛlɛfa anyelielɛ azonle Gyihova na ɛhye maa me nye die kpalɛ. Meyɛ Gyihova mo kɛ yemaa meraboka mediema Kilisienema ekpunli mɔɔ ɛlɔlɛ wɔ bɛ nu la anwo la. Eza ɔyɛ me fɛ kɛ awie bɔle mɔdenle hilehilele me Baebolo nu nɔhalɛ ne la. Na me nye die nwolɛ adenle mɔɔ menyia ye mekilehile awie mɔ Baebolo ne la anwo. Meyɛ Gyihova Nyamenle mo kɛ ɔvile ɛlɔlɛ nee atiakunlukɛnlɛma nu ɔhwenle me ɔbikyele ɔ nwo la.

[Edwɛkɛ mɔɔ bɛkpa]

“Mɔɔ menzukoale kɛ Gyihova te nganeɛ ɔti me nyɛleɛ kola maa ɔdi nyane anzɛɛ ɔ nye die la, ɔhanle me kpalɛ”

[Nvoninli]

Menwunle kɛ me mame subane ɛhakyi ɛyɛ kpalɛ

[Nvoninli]

Me nee me ye nee me ra raalɛ ne