Bibliaq yanapayninwan cambianku

¿IMAN yanaparqan pujllay vicioyoq wasikunata suwakuq runata cambiananpaq? Pay kikin willawasun.

“Caballo phawachiyta qhawaymi gustawaq” (RICHARD STEWART)

¿IMA WATAPIN NACERQAN? 1965 WATAPI

¿MAYMANTAN? JAMAICA NACIONMANTA

¿IMAMANTAN WILLAKUSHAN? PUJLLAY VICIOYOQ SUWAKUQ IMAN KARQAN

ÑAUPA VIDAY: Jamaica nacionpin Kingston llaqtapi wiñarqani, chaypiqa askha runakunan tiyarqayku, pisin llank’ana kaq suwakunataq nishu kaq. Runakunaqa manchasqan tiyaqku millay runakuna jawa. Yaqa sapa p’unchaymi baleanakuyta uyariq kani.

Mamayqa sinchitan llank’aq iskaynin sullk’aykunatawan uywawanankupaq, allin educacionniyoq kanaykupaqpas yanapawarqankun. Noqamanqa caballo phawachiyta qhawaymi gustawaq, estudiaymi ichaqa mana gustawaqchu. Caballo phawachinaman rinaypaqmi estudiaq rinaymanta faltakullaq kani. Wakin caballokunamanqa sillakurqanin kanpas.

Pisi tiempollamantan apuestay vicio, juj-juj warmiwan kay vicio ima jaykupuwarqan. Chaymantapas marihuana nisqa drogatan fumaq kani. Chhaynata kausanaypaqmi suwakunay karqan, jinan askha armakunayoq kapurqani. ¡Aswanmi mana pitapas wañuchirqanichu suwakuspa purisqaypi!

Jap’iwaspankun carcelman wisq’awarqanku. Lloqsipuspayqa kaqtan ruwallarqanitaq. Aswantaraqmi chay mana allinkunata ruwarqani. Uyaypiqa manapas ni ima mana allintapas ruwaymanchu karqan jinatan qhawarichikuq kani, ichaqa mana kasukuq, k’araq sonqo, millay runan karqani. Noqallapin piensaq kani.

BIBLIAQ YANAPAYNINWAN CAMBIAPUNI: Mana allin kausaypi purishaqtiymi mamayqa Biblia estudiayta qallarirqan, jinan Jehová Diospa testigon kapurqan. Cambiapusqanta rikuspaymi imachus yanapasqanpi piensarqani. Yachaytan munarqani imarayku cambiapusqanta, chaymi Bibliamanta rimayta qallarirqani Jehová Diospa testigonkunawan.

Usqhayllan repararqani paykunaqa mana wakin religionkuna jinachu yachachisqankuta, Bibliawanpunin imatapas yachachiqku. Paykunallan Bibliamanta yachachispaqa wasin-wasinta puriqku ñaupa tiempo cristianokuna jina (Mateo 28:19; Hechos 20:20). Munanakusqankupin repararqani cheqaq religión kasqankuta (Juan 13:35).

Bibliata estudiaspan repararqani kausayniyta cambiapunay kasqanta. Jehová Diosqa cheqnikunmi mana casarakuspalla warmiwan kaytaqa, Dios chaskiwananpaqqa imakunachus cuerpota qhellichan chaykunatan wijch’upunay karqan (2 Corintios 7:1; Hebreos 13:4). Jehová Diosqa sienteq kasqanta yachay jinallataq imachus ruwasqaywan kusikunanta otaq llakikunanta yachaymi sonqoyman chayawarqan (Proverbios 27:11). Chaymi decidikurqani marihuanata armakunatapas saqepunaypaq, allin runaman tukupunaypaqpas. Aswan sasaqa karqan juj-juj warmiwan kayta, apuestay vicioyta ima saqepuymi.

Qallariypiqa manan munarqanichu Testigokunawan Biblia estudiashasqayta amigoykuna yachanankuta. Ichaqa Mateo 10:33 textopi Jesuspa nisqanta leespaymi piensasqayta cambiarqani, chaypin nin: “Pipas runakunaq ñaupanpi negawaqniytan ichaqa, noqapas negallasaqtaq janaq pachapi kaq Yayaypa ñaupanpi”, nispa. Jinan amigoykunaman willarqani imatachus ruwashasqayta. Manan imaniytapas atirqankuchu, manan creeyta atirqankuchu noqa jina runa cristiano kapunanta. Chhaynaña kaqtinpas cambiapunaypaq decidikusqaytan willarqani.

BENDICIONKUNA CHASKISQAY: Mamayqa anchatan kusikurqan Bibliapi yachasqayta ruwayman churaqtiy. Kunanqa manan llakikunñachu imatachus ruwashasqaymanta. Iskayniykumanmi gustawanku Jehová Diosta munakusqaykumanta rimay. Mayninpiqa ñaupaqpi kausayniyta yuyarispan admirakuni imaynatachus Diospa yanapayninwan cambiapusqaymanta. Manañan ñaupaqpi jina qhelli kausaytapas imaymanayoq kaytapas munapayaniñachu.

Manachus Bibliata estudiayman karqan chayqa carcelpichá kashayman karqan otaq wañupuymanña karqan. Aswanpas imakunatachus yachasqayraykun kusisqa familiaywan kausashani. Esposayqa allintan yanapawan, ususiypas munay respetoyoqmi; llapaykun Jehová Diosta serviyku. Manan imaynata kutichipuyta atiymanchu Bibliamanta yachachiwasqankumanta. Chayraykun kallpachakuni jujkunaman Bibliamanta yachachinaypaq. Jehová Diostan agradecekuni munakuq llaqtanman pusamuwasqanmanta, sumaq sonqo kasqanraykun pusamuwarqan.

[Recuadro]

“Jehová Diosqa sienteq kasqanta yachaymi, imachus ruwasqaywan kusikunanta otaq llakikunanta yachaymi sonqoyman chayawarqan”

[Foto]

Esposaywan ususiypiwan

[Foto]

Mamaypa cambiapusqanta rikuspaymi imachus yanapasqanpi piensarqani