Bibliami gentecunapa causaita cambiashca

APOSTASHPA pugllanata yachaj, shuanata yachaj, paipa causaipi cambiocunata rurachun ima ayudashcata ricupashun.

“Caballo carreracunapimi ninanda apostan carcani” (RICHARD STEWART)

NACIRISHCA HUATA: 1965

LLACTA: JAMAICA

PAIPA PUNDA CAUSAI: SHUASHPALLA, APOSTASHPALLAMI CAUSAN CARCA

ÑUCA PUNDA CAUSAI: Ñucaca Jamaica llactapi pobrella pushtupimi viñarcani. Chaipica trabajopash illa y ashtaca shuacunami tiarca. Chaimandami chaipi causaj gentecunaca manllaihuan causan carca. Casi cada punllami shuacunaca paipura dispararijta uyan carcani.

Ñucanchica quimsa huahuacunami carcanchi. Chaimandami ñuca mamitaca ñucanchita mantiningapaj, minishtirishcaguta cungapaj, estudiachingapaca shinllitapacha trabajan carca. Shinapash ñucataca caballo carrerata ricunatami ninanda gushtan carcani. Chaimandami escuelamanbash huaquinbica faltashpa chai carreracunata ricungapaj rin carcani. Shinallata huaquinbica ñucapashmi chai carreracunapi participan carcani.

Asha tiempo jipaca apostashpa pugllana viciopimi urmarcani. Shinallata ashtaca huarmicunatapashmi charircani. Marihuanata chupanatapashmi yachajurcani. Chai viciocunapi catingapaca, shuanatapashmi yachajurcani. Chaimandami ashtaca armacunatapash charircani. Antsicarinmi chai tiempopica pitapash na huañuchishcani.

Shuj punllaca policiacunaca japihuarcallatami. Chaimi carcelman cachahuarca. Carcelmanda llujshishpaca ashtahuan nali cosascunatami rurai callarircani. Ñucaca nalitaca na ruranshnallami ricujurcani, pero nalipachami carcani. Ñucapillami pensarishpa causan carcani.

BIBLIAMI ÑUCA CAUSAITA CAMBIARCA: Chai tiempopimi ñuca mamitaca testigo de Jehovacunahuan Bibliamanda yachajushpami bautizarirca. Ñuca mamita paipa causaipi ninanda cambiarijta ricushpami ñucapash yachangapaj munarcani. Chaimi testigo de Jehovacunahuan ñucapash Bibliamanda yachajui callarircani.

Paicunahuan yachajui callarishpami shuj religiongunamanda diferente cashcata cuenta japircani. Testigocuna imata yachachishpapash Bibliata utilizashpami siempre yachachin. Testigo de Jehovacunallami Jesusta punda catijcunapa ejemplota catishpa, huasin huasin rishpa gentecunamanga yachachin (Mateo 28:19; Hechos 20:20). Testigo de Jehovacuna randimanda juyarijta ricushpami ali religionda tarishcata cuenta japircani (Juan 13:35).

Bibliata yachajui callarishpaca ñuca causaipi cambiarinapacha cashcatami cuenta japircani. Jehová Diosca huainayashpa causanataca millanayachishpami ricun. Chaimandami Jehová Diospa amigo tucungapaj munashpaca chai nali cosascunataca saquina carcani (2 Corintios 7:1; Hebreos 13:4). Ñuca ruraicunahuan Jehová Diosta cushichita o llaquichi ushashcata yachajunapash shungumanmi chayahuarca (Proverbios 27:11). Chaimandami drogacunata, armacunata saquinata, shinallata ñuca causaipi cambiaringapapash decidircani. Shinapash apuestacunata saquina, huarmicunahuan purinatapash saquinami ashtahuanbachaca shinlli carca.

Testigo de Jehovacunahuan Bibliata yachajujujta ñuca amigocuna yachachunga na munarcanichu. Shinapash Mateo 10:33​pi shimicunata liinami ñucataca ayudahuarca. Chaipica nin: “Ashtahuangarin gentecunapaj ñaupajpi: ‘Paitaca na rijsinichu’ nishpa ñucata nijpica, ñucapash jahua pachapi tiajuj ñuca Taitapaj ñaupajpimi: ‘Paitapash na rijsinichu’ nisha” ninmi. Chai textota liishca jipami ñuca cumbacunamanga Bibliamandami yachajui callarircani nishpa villarcani. Chaita uyashpami paicunaca ñuca cambianataca na crishpa uyarca. Shinapash ñuca causaipi cambiangapaca decididomi cani nircanimi.

¿IMA BENDICIONGUNATATA CHASQUIPASHCANI? Bibliapa yachachishcacunata pactachi callarijpica ñuca mamitaca ninandami cushijurca. Imata rurajujpi, maipi cajpipash, cunanga imatashi rurajun nishpaca ñana preocuparinllu. Ñuca mamitahuan parlajushpaca Jehová Diosta sirvinamanda parlanataca ninandami gushtanchi. Taita Diospa ayudahuan cai ashtaca cambiocunata rurai ushashcamandaca cushijushcapachami cani. Cunanga ashtahuan culquita charina munaita, huainayashpalla causaitapash munaitapacha ñana munanichu.

Bibliata na yachajushpaca seguromi carcelpi o huañushca caiman carcani. Shinapash Bibliata yachajuimandami ñuca familiahuan cushilla causaita ushapashcani. Ñuca huarmiguca siempremi ñucataca apoyahuan, ñuca ushigupash ali aligumi can. Quimsandimi Jehová Diostaca cushilla sirvinchi. Bibliamanda yachajui ushashcamandaca ninandami agradicini. Chaimandami tucui gentecunahuan Bibliamanda parlangapaj esforzarini. Jehová Dios paipa organizacionbi cachun ayudahuashcamandaca ninandami agradicini. Shinallata paiman quimirina oportunidadta carahuashcamandapash ninandapachami cushijuni.

[Comentario]

“Ñuca ruraicunahuan Jehová Diosta cushichita o llaquichi ushashcata yachajunapash shungumanmi chayahuarca”

[Foto]

Ñuca huarmigu y ñuca ushigundimi capani

[Foto]

Ñuca mamita paipa causaipi cambiocunata rurajta ricushpami, ñucapash Bibliamanda yachajungapaj munarcani