Taui te Pipiria i te Oraanga

EAA tei akakeu i tetai tangata peti oroenua e te keikeia kia akamutu i tana e rave ra e kia taui i tona oraanga? Tatau i tana tua.

“E mea inangaro naku te au oroenua taemoemo.”​—RICHARD STEWART

MATAITI ANAU: 1965

ENUA ANAU: JAMAICA

ORAANGA: TANGATA PETI OROENUA E TE KEIKEIA

TOKU ORAANGA I MUA ANA: Utuutuia au i Kingston, te oire maata o Jamaica, e ngai putaua e e maata te tangata e noo ana i reira. Maata te aronga kare a ratou angaanga e e maata te kino e tupu ra i teia oire. Mataku katoa te tangata i te au pupu aronga kino. Vaitata i te au rā ravarai, kua akarongo atu au i te au pupui.

Kua angaanga pakari toku mama i te akono iaku, toku teina e te tuaine. Kua akapapu aia e kia aere matou ki tetai apii meitaki. Kare au e reka ana i te apii, inara e mea inangaro naku te au oroenua taemoemo. Ka akatau apii au no te aere ki te ngai taemoemo oroenua. Kua akaoro katoa au i te oroenua.

Kare i roa, kua akamata au i te rave putuputu i te peti oroenua. E oraanga tau kore toku e kua rave au i te pirianga ainga ki te au vaine tukeke. Kua kai maruana au e kua keikeia ei tutaki i te au peu taku e rave ra. E maata taku au pupui. Noatu ra, manuia e kare e tangata i tamateia i roto i taku angaanga keikeia.

Aere ua rai, kua opu te au akava iaku e kua tiriaia au ki roto i te are auri. Te tukuia anga au ki vao, kua rave ua atu au i te kino. Te tika, e kino atu toku tu i to mua ana. Noatu i te akara anga, e tangata meitaki au inara, e tu marokiakia, riririri e te kino toku. Kua manako au iaku uaorai, kare i tetai ke.

KUA TAUI TE PIPIRIA I TOKU ORAANGA: I tera tuatau manamanata, kua apii toku mama i te Pipiria e kua riro mai ei Kite no Iehova. Kua kite au i te au tauianga meitaki tana i rave e kua inangaro i te kite i te tumu. No reira, kua akamata au i te uriuri i te Pipiria ma te Au Kite.

Kite mai au e tuke te au apiianga a te Au Kite o Iehova mei te au akonoanga ke, e kua akatumuia ta ratou apiianga pouroa ki runga i te Pipiria. Taku i kite mai, ko ratou ua te aronga tei tutu aere mei tera are ki tera are, mei te au Kerititiano mua rai. (Mataio 28:19; Angaanga 20:20) Te kite anga au i te aroa ngakau tae i rotopu ia ratou, kua papu iaku e kua kite au i te akonoanga mou.​—Ioane 13:35.

Mei taku apii Pipiria, kua kite mai au e ka anoanoia au kia rave i te au tauianga maata i roto i toku oraanga. Kua apii au e te rikarika ra te Atua ko Iehova i te moeaana e me inangaro au i te akamareka iaia, ka anoanoia au kia akamutu i te au peu tei taviivii i toku kopapa. (2 Korinetia 7:1; Ebera 13:4) Kua tukia toku ngakau i te kite anga e ka riro taku e rave ra ei tamamae me kore ei akarekareka i to Iehova ngakau. (Maseli 27:11) No reira, kua iki au i te akamutu i te kai maruana, kare au i taangaanga akaou i taku pupui e kua tauta au i te akameitaki atu i toku tu. Inara, ko te akaruke anga i toku oraanga tau kore e te akamutu i te peti oroenua te nga tauianga ngata roa atu noku.

I te akamataanga, kare au i inangaro i toku au oa kia kite e te apii ra au i te Pipiria ma te Au Kite o Iehova. Inara kua taui toku manako i muri ake i te tatau anga ia Mataio 10:​33, te karanga anga a Iesu e: “Kareka te uuna iaku ki mua i te aroaro o te tangata nei, e uuna katoa au iaia ki mua i te aroaro o taku Metua i te ao ra.” Kua akakeu teia irava iaku kia akakite ki toku au oa e te apii ra au ma te Au Kite. Poitirere ratou. Kare ratou i manako ana e ka inangaro tetai tangata mei iaku rai kia riro mai ei Kerititiano. Inara akakite au kia ratou e kua inangaro au i te akaruke takiri i toku au peu taito.

KUA PUAPINGA AU: Mataora tikai toku mama te kite anga aia iaku e akono ra i te au kaveinga Pipiria i roto i toku oraanga. I teianei, kare aia e manata akaou iaku. Ka pukapuka maua no runga i to maua inangaro no Iehova. I tetai taime, me oki au i te akamanako i toku tu i mua ana, umere tikai au i te au tauianga taku i rave ma te tauturu a te Atua. Kare au e inangaro akaou i te oraanga tau kore e te noinoi.

Naringa kare au i akarongo ki te karere a te Pipiria, kua mate au me kore tei roto au i te are auri i teia rā. Inara i teianei, e ngutuare tangata manea e te mataora toku. Rekareka maata au i te tavini kapiti i te Atua ko Iehova ma taku vaine akono meitaki e ta maua tamaine akarongo. Akameitaki tikai au ia Iehova no te akatika mai iaku kia riro mai ei tuanga no tetai taokotaianga taeake Kerititiano aroa. Mataora tikai au e kua tauta tetai tangata kia apii mai i te au tuatua mou a te Pipiria kiaku. Akaperepere tikai au i te au atianga taku i rauka mai no te tauturu i tetai ke kia apii i te Pipiria. Akaperepere maata roa au i te Atua ko Iehova no tona aroa takinga meitaki i te akavaitata mai iaku kiaia.

[Tataanga]

“Tukia toku ngakau i te kite anga e ka riro taku e rave ra ei tamamae me kore ei akarekareka i to Iehova ngakau”

[Tutu]

Kite au i te au tauianga meitaki ta toku mama i rave

[Tutu]

Matou ko taku vaine e te tamaine