E Biblia parhudias lengo traio

SOSTAR iek manush kai khelelas peske pe lovende ai kai chorelas khera parhudias pesko traio? Vo si te phenel amenge.

“Plachalas man le grast kai prastenas” (RICHARD STEWART)

KANA ARAKHADILO: 1965

THEM: JAMAICA

PA LESTE: KHELELAS PESKE PE LOVENDE AI CHORELAS

SAR SAS MURHO TRAIO: Barilem ando Kingston, iek baro foro anda e Jamaica. Ando foro kai traivas nas but love, nas but buki ai nakhenas but prame zhungale. Le manush daranas pala le prame kai kerenas aver manush kai chorenas. Butivar ashunasas plumbi.

Murhi dei kerelas but buki te del amen so trobulas amen, man ai murhe phralen mai tsinorhe —murho phral ai murhi phei—, ai tradias amen ande escuela. Plachalas man le grast kai prastenas, pala godia chi zhavas ande escuela ai zhavas ando hipodromo. Ai vi prastavas po grast.

Ande tsirha vriama numa gindivas te khelau mange pe lovende ai te ankliau zhuvliantsa. Vi piavas tsigeri dile. Te avel man godo traio trobuvas te chorau, ai pala godo trobulas te avel man but pistoluria. Che mishto ke kana zhavas te chorau chi mundardem khanikas!

La vriamasa phandade man. Kana anklistem pale, astardem te kerau so keravas de mai anglal. Astardem te kerau dieli mai zhungale. Numa gindivas ande mande ai makar miavas lasho, andral simas pherdo dieli chorhe.

SAR E BIBLIA PARHUDIAS MURHO TRAIO: Ande godia vriama phari anda murho traio, murhi dei astardias te sikiol pa e Biblia ai kerdili marturo le Jehovasko. Kamavas te zhanau sostar parhudias dieli ande pesko traio. Pala godia astardem te dau duma pa e Biblia le Marturentsa.

Dem po gor ke von sikavenas so phenel e Biblia, na sar le kolaver religionuria. Numa le Marturia ningerenas o suato le Devlesko sar le pervo kristianuria (Mate 28:19; Le Apostolengo 20:20). O kamlimos kai sikavenas iek avreske azhutisardias man te dau po gor ke sas e religion chachi (Iovano 13:35).

Kana astardem te sikiuau pa e Biblia, dem po gor ke trobuvas te parhuvau sa murho traio. Ka o Jehova nai leske drago kana le manush keren prame bi vuzhe, te avela ke kamavas te kerau so si leske drago, trobuvas te mekau sa le dieli kai meliaren o stato (2 Korintiana 7:1; Zhiduvuria 13:4). Plachaias man te zhanau ke o Jehova shai avel veselime vai tristo pala le prame kai kerau (Proverbios 27:11). Pala godia meklem te piau tsigeri dile ai le pistoluria, ai thodem mandar te parhudiuvau. Le prame mai phare sas, te mekau te ankliau zhuvliantsa ai te khelau mange pe lovende.

Kana astardem te sikiuau pa e Biblia le marturentsa le Jehovaske chi kamavas te zhanen murhe amiguria. Numa parhudem murho gindo kana chitosardem so phendias o Jesus ando Matei 10:33 (E Nevi Viasta ai o Psalmo): “Numa kudo kai phenel angla o narodo ke chi prinzhiarel ma, vi me phenav angla murho dad kai si ande o cheri ke chi prinzhiarav les”. Fuga phendem lenge so keravas. Nashtinas te pakian ke iek manush sar mande shai avelas kristiano. Numa phendem lenge ke chachimasa kamavas te parhuvau murho traio.

SAVO LASHIMOS LEM: Murhi dei sas defial veselime kana dikhelas ke thavas ande murho traio so phenel e Biblia. Akana chi mai jal la e briga pala so kerau. Drago amenge te das duma pa vareso kai plachal amen but: amaro kamlimos karing o Jehova. Kana gindiu sar sas murho traio de mai anglal, nashtiu te pakiau sar azhutisardias man o Del. Akana nai mange drago sar sas murho traio de mai anglal.

Zhanau ke te na avela pala so sikilem anda e Biblia sas te avau phandado vai mulo. Numa pala so sikilem, si man iek familia veselime, murha rhomniasa ai murha shasa luvudis veselime le Devles. Naisiu but ke sikade man o chachimos la Bibliako. Pala godia kana arakhau varekas dau duma lesa pa so phenel e Biblia. Naisiu ka o Jehova te avau ande lesko foro ai ke alosardias man.

[Suato anda e patrin]

“Plachaias man te zhanau ke o Jehova shai avel veselime vai tristo pala le prame kai kerau”

[Patreto]

Murha rhomniasa ai murha shasa

[Patreto]

Kamavas te zhanau sostar murhi dei parhudias dieli ande pesko traio