Bíblia troka ema nia moris

SAIDA mak book ema ida neʼebé gosta taru osan no naʼok-teen atu husik ninia toman aat sira no troka ninia moris? Lee toʼok ninia esperiénsia hodi bele hatene.

“Haʼu gosta tebes haree kuda halai-taru”—RICHARD STEWART

TINAN MORIS: 1965

HUSI RAI: JAMAIKA

MORIS ULUK NIAN: TARU OSAN NO HALO KRIME

HAʼU-NIA MORIS ULUK NIAN: Haʼu sai boot iha área kiak neʼebé iha populasaun barak, iha sidade Kingston, rai-Jamaika nia kapitál. Ema barak la iha serbisu, no akontese krime barak. Ema sempre taʼuk tanba geng sira. Besik loroloron, haʼu rona kilat nia lian.

Haʼu-nia amá mak ema neʼebé badinas no ho laran tomak tau matan ba haʼu, haʼu-nia alin-feto no alin-mane. Nia serbisu makaʼas atu ami bele hetan edukasaun diʼak. Haʼu la interese ho eskola, maibé haʼu gosta tebes haree kuda halai-taru. Duké ba eskola, haʼu ba fatin kuda halai-taru. Haʼu mós saʼe kuda sira-neʼe.

Lakleur deʼit, haʼu sempre taru osan kona-ba kuda halai-taru. Haʼu-nia morál la diʼak, haʼu halo sala seksuál ho feto barak. Haʼu uza ganja no haʼu mós naʼok osan hodi uza armas atu bele kontinua goza moris. Haʼu iha kilat barak, maibé haʼu agradese tanba la iha ema ida mak mate kuandu haʼu naʼok hodi uza kilat.

Ikusmai, polísia kaer haʼu no hatama haʼu ba komarka tanba krime neʼebé haʼu halo. Bainhira haʼu livre, haʼu kontinua halaʼo moris iha dalan neʼebé aat. Loloos, haʼu-nia hahalok sai aat liután. Maski haʼu-nia oin haree hanesan ema inosente, maibé haʼu mak ema neʼebé ulun-toos, hirus lalais no laran-aat. Haʼu hanoin deʼit kona-ba haʼu-nia an.

OINSÁ BÍBLIA TROKA HAʼU-NIA MORIS: Durante tempu neʼe, haʼu-nia amá estuda Bíblia, no sai Testemuña ba Jeová. Haʼu haree katak ninia hahalok sira sai furak liután, no haʼu interese kona-ba neʼe. Haʼu deside atu buka-hatene saida mak book haʼu-nia amá atu troka. Entaun, haʼu komesa koʼalia kona-ba Bíblia ho Testemuña ba Jeová.

Haʼu haree katak Testemuña ba Jeová nia hanorin sira la hanesan ho relijiaun sira seluk nia hanorin. Testemuña sira-nia hanorin hotu bazeia ba Bíblia. Só sira deʼit mak haklaken husi uma ba uma, hanesan ho ema Kristaun sira iha tempu antigu. (Mateus 28:19; Apóstolu 20:20) Ikusliu, bainhira haʼu haree domin neʼebé loos entre Testemuña sira, neʼe halo haʼu fiar metin katak neʼe mak relijiaun neʼebé loos.​—João 13:35.

Buat neʼebé haʼu aprende husi Bíblia, halo haʼu komprende katak haʼu tenke halo mudansa boot iha haʼu-nia moris. Haʼu aprende katak Jeová odi sala seksuál, no se haʼu hakarak halo nia kontente, haʼu tenke para toman sira neʼebé hafoʼer haʼu-nia isin. (2 Korinto 7:1; Ebreu 13:4) Haʼu aprende katak Jeová iha sentimentu, no haʼu-nia desizaun sira bele halo nia kontente ka triste. Ida-neʼe book haʼu-nia laran. (Provérbios 27:11) Entaun, haʼu deside atu para uza ganja, soe haʼu-nia kilat sira, no hakaʼas an atu troka haʼu-nia hahalok. Buat balu neʼebé susar ba haʼu atu husik mak haʼu-nia dalan moris neʼebé la morál no para taru osan.

Foufoun, haʼu lakohi haʼu-nia kolega sira hatene katak haʼu estuda Bíblia ho Testemuña ba Jeová. Maibé kuandu haʼu lee tiha Mateus 10:33, haʼu troka haʼu-nia hanoin. Iha versíkulu neʼe Jesus dehan: “Maibé ema neʼebé nega haʼu iha ema seluk nia oin, haʼu mós sei nega nia iha haʼu-nia Aman iha lalehan nia oin.” Liafuan sira-neʼe book haʼu atu konta ba haʼu-nia kolega sira katak haʼu estuda Bíblia ho Testemuña. Sira hakfodak loos. Sira la fiar katak ema hanesan haʼu hakarak sai ema Kristaun ida. Maibé, haʼu konta ba sira katak haʼu hakarak husik haʼu-nia moris uluk nian.

BUAT DIʼAK NEʼEBÉ HAʼU HETAN: Haʼu-nia amá kontente tebes kuandu haree haʼu troka haʼu-nia moris tuir Bíblia nia matadalan. Nia la hanoin barak ona kona-ba haʼu-nia atividade aat sira. Ami bele koʼalia ba malu kona-ba ami-nia domin ba Jeová. Dala ruma, haʼu haree filafali ba haʼu-nia moris uluk nian, no haʼu hakfodak ho mudansa sira neʼebé haʼu halo ona ho Maromak nia ajuda. Haʼu lakohi ona atu moris hanesan uluk, nakonu ho hahalok la morál no domin ba osan.

Se haʼu la simu Bíblia nia mensajen, karik haʼu mate ona ka iha komarka laran. Maibé agora, haʼu iha família neʼebé kontente. Haʼu sente kontente tebes atu serbí Maromak Jeová hamutuk ho haʼu-nia feen no oan-feto neʼebé laran-metin. Haʼu agradese tebes ba Jeová, tanba nia husik haʼu atu sai parte husi família Kristaun neʼe. Haʼu agradese tanba iha duni ema neʼebé prontu atu hanorin haʼu lia-loos husi Bíblia. No haʼu mós hafolin oportunidade neʼebé haʼu hetan atu hanorin ema seluk kona-ba Bíblia nia hanorin sira. Haʼu agradese liután tanba Maromak Jeová hatudu domin neʼebé laran-metin ba haʼu hodi dada haʼu ba nia.

[Liafuan]

“Haʼu aprende katak Jeová iha sentimentu, no haʼu-nia desizaun sira bele halo nia kontente ka triste.”

[Dezeñu]

Haʼu haree katak haʼu-nia amá nia hahalok sira sai furak liután

[Dezeñu]

Hamutuk ho haʼu-nia feen no oan-feto