Magnova Ndaty ty Baiboly

Ino ty nampiova i lahilahy mpiloka sady mpangalatsey? Ndraleo ireke ro hitantara aze.

“Tena tea korsa sovala raho.”​—RICHARD STEWART

TERAKE TAMY: 1965

FIRENENA NIAVIA’E: JAMAIKA

FIAIGNA’E TALOHA: MPILOKA SADY MPIAROTEGNE

TY FIAIGNAKO TALOHA: Nibey tamy ty faritse mahantra naho maro ndaty ta Kingston, rova i Jamaika agne raho. Maro ty ndaty tsy nanagne asa sady nimaro ty mpiarotegne ty tagne. Nagnorohoro o ndatio o malasò. Isan’andro raho maharey poa-basy avao.

Niasa mafe ty Nene mba hikarakaragne ahy naho i zaiko roe rey. Natao’e ze hahazoa’ay fampianaragne soa. Tsy le nitea nianatse raho, fa tena tea korsa sovala. Mateteke raho ro ningitsike le nandeha amo o toeragne fanoagne korsa sovalao agne. Nitingitse i sovala rey aza raho.

Tsy ela raho le nanjare mpiloka tamy ty korsa sovala. Naloto findesam-batagne raho, sady zatse nila ampela maro sambe hafa. Nifoke rongony ka raho, sady nangalatse mba hahazoako vola hanoako ty fiaignako. Nanagne basy maro raho. Faie soa avao fa tsy nisy nimate tamy i fanafihagne natao’ay rey.

Nitratse o polisio raho tamy ty fara’e sady nigadra. Faie naho fa nafahagne raho, le mbe nanohy avao i fahazarako taloha rey, sady vao mainke nanjeke aza. Hoe raha tsy ndaty raty zay raho naho henteagne ivela’e etoy avao, faie mafe loha naho mora boseke sady raty fagnahy naho ty maregne. Tsy nisy nidareako naho tsy ty tegnako avao.

TY NAGNOVÀ TY BAIBOLY TY FIAIGNAKO: Tagnate ze fotoagne zay, le nianatse Baiboly ty Nene sady nanjare Vavolombelo i Jehovah. Nivoamareko fa niova ty toetse’e sady nahaliagne ahy zay. Teako ho fantatse tie ino ty nampiova aze, le niara-nianatse Baiboly tamo o Vavolombelogneo raho.

Treako tie tsy manahake o fivavahagne hafao ty fampianara ty Vavolombelo i Jehovah. Nifagnarake tamy ty Baiboly ze kila raha nampianare iareo. Iareo avao ty mba fantako tie mitory isan-tragno, manahake ty natao ty Kristiana voaloha’e. (Matio 28:19; Asan’ny Apostoly 20:20) Nanjare rese lahatse raho fa nahatrea ty fivavahagne maregne, naho fa nahatrea tie tena mifankatea o Vavolombelo i Jehovah-o.​—Jaona 13:35.

Naho fa nianatse Baiboly raho, le nitreako fa nila nanao fiovagne lahibey. Fantako fa heje i Jehovah Andrianagnahare ty mijangajanga, le naho te hampifale aze raho, le nila nisintake tamy i fahazaragne nandoto ty vatako rey. (2 Korintianina 7:1; Hebreo 13:4) Tena nanohigne ty foko ty nahafantatse tie, va’e hampalahelo ndra hampifale i Jehovah ze raha ataoko. (Ohabolana 27:11) Tapa-kevetse areke raho fa tsy hifoke rongony naho tsy hampiasa basy sasa, sady hikezake hagnasoa ty toetseko. Agnisa ty tena nisarotse ty nisintake i findesam-batagne ratỳ naho i filokagney.

Tena tsy teako ho fanta i namako rey tamy ty voaloha’e tie nianatse Baiboly tamy ty Vavolombelo i Jehovah raho. Faie niova zay naho fa namaky ty Matio 10:33 raho. Hoe ty Jesosy ao: ‘Ze tsy magneke ahy agnatreha o ndaty eo tie mpianako, le tsy hekeko agnatreha i Babako an-dagnitse agney ka.’ Izay ty nandrisike ahy hirehake tamy i namako rey tie mianatse Baiboly raho. Tena niboseke iareo. Tsy nino iareo tie ndaty manahake ahy vao le tena hanjare Kristiana. Faie nirehafeko iareo tie tsy teako sasa ty fiaignako taloha.

TY SOA NIRAMBESEKO: Tena fale ty Nene naho fa nahavazoho tie nanomboke nampihatse ty toro lala ty Baiboly raho. Tsy mba minekoneko sasa reke tie amy izao tie ino ka zao ty raha raty hataoko. Sambe tea i Jehovah zahay, le ty miomba izay ka zao ty rehafe’ay. Naho fa mandineke ty taloha raho, le tena tsy mino tie nahavita niova noho ty fagnampean’Andrianagnahare. Tsy raty findesam-batagne naho tsy tea vola manahake ty taloha sasa raho.

Va’e fa nimate ndra nigadra raho naho tsy nianatse Baiboly. Faie sambatse ty tokantragnoko tie amy izao. Tena fale raho manompo i Jehovah miarake amy i valiko sady manohagne ahy naho i anak’ampelako mankatò ahỳ. Misaotse i Jehovah raho fa nenga’e ho agnisa ty keleia ty mpirahalahy kristiana tena bey hatea. Tena isaorako ka i ndaty nikezake nampianatse ahy ty hamarenagney. Sarobily amako ty magnampe ty hafa hianatse Baiboly. I Jehovah ro tena isaorako satria soa fagnahy naho bey hatea reke, le nitaogne ahy hiharine aze.

[Hevetse Lahibey]

‘Nanjare fantako tie, va’e hampalahelo ndra hampifale i Jehovah ze raha ataoko’

[Sare]

Miarake amy i valiko naho i anak’ampelakoy

[Sare]

Voamareko fa niova ty toetse i Nene