ናብ ትሕዝቶ ኺድ

ናብ ትሕዝቶ ኺድ

መጽሓፍ ቅዱስ ንህይወት ሰባት ይቕይር

መጽሓፍ ቅዱስ ንህይወት ሰባት ይቕይር

መጽሓፍ ቅዱስ ንህይወት ሰባት ይቕይር

ሓደ ተጣላዕን ከታርን ዝነበረ ሰብኣይ፡ ንኣመላቱ ሓዲጉ ኣነባብራኡ ንኪቕይር ዝደረኾ እንታይ እዩ፧ እንታይ ከም ዝበለ እስከ ርአ።

‘ናይ ውድድር ኣፍራስ እፈቱ ነበርኩ።’​—ሪቻርድ ስቲዋርት

ዓመተ ልደት፦ 1965

መበቈል ሃገር፦ ጃማይካ

ታሪኽ፦ ተጣላዕን ገበነኛን

ሕሉፍ ህይወተይ፦ ኣብታ ድኻታትን ብዙሓት ተቐማጦን ዚነብሩላ ኪንግስተን እትበሃል ርእሲ ኸተማ ጃማይካ እየ ዓብየ። ኣብዚ ቦታ እዚ፡ ሽቕለት ኣልቦነትን ገበንን ኣመና ኣስፋሕፊሑ ነበረ። ብዙሓት ሰባት ብሰንኪ ዓዋሉ፡ ብፍርሂ እዮም ዚነብሩ ነይሮም። ነፍሲ ወከፍ መዓልቲ፡ ድምጺ ጥይት ከይሰማዕኩ ኣይውዕልን እየ ነይረ።

እታ ጻዕራም ኣደይ፡ ንዓይን ንምንኣሰይ ሓወይን ንሓብተይን ንኸተዕቢ ዝከኣላ ዅሉ ትገብር ነበረት። ጽቡቕ ትምህርቲ ኽንመሃር ከኣ ትደሊ ነበረት። ኣነ ግና ብዛዕባ ትምህርቲ ብዙሕ ተገዳስነት ኣይነበረንን፣ ናይ ውድድር ኣፍራስ ግና እፈቱ ነበርኩ። ትምህርቲ ሓዲገ፡ ናብቲ ውድድር ምግላብ ኣፍራስ ዚግበረሉ ቦታ እኸይድ ነበርኩ። ኣፍራስ ጋሊበ እውን እፈልጥ እየ።

ነዊሕ ከይጸንሐ፡ ብውድድር ምግላብ ኣፍራስ ክጣላዕ ጀመርኩ። ርኽሰት ዝመልኦ ናብራ እነብርን ምስ ብዙሓት ደቂ ኣንስትዮ ጾታዊ ርክብ እፍጽምን ነበርኩ። ማሪዋና አትክኽ ስለ ዝነበርኩ፡ ንወጻኢታተይ ንምሽፋን፡ እኸትር ነበርኩ። ብዙሕ ሸጓጕጥ እኳ እንተ ነበረኒ፡ ብሰሪ እቲ ዝገብሮ ዝነበርኩ ኽትረት እተቐትለ ሰብ ብዘይ ምንባሩ፡ ሕጉስ እየ።

ኣብ መወዳእታኡ፡ ብፖሊስ ተታሒዘ፡ ብሰንኪ እቲ ዝገበርክዎ ገበናት ተኣሰርኩ። ምስ ተፈታሕኩ ግና፡ ነቲ ናይ ቀደም ኣነባብራይ ቀጸልክዎ። አረ ኻብ ቅድሚኡ ዝገደድኩ እውን ኰንኩ። መልክዐይ ዘየፍርህ እኳ እንተ ዀነ፡ ነቓጽን ቍጡዕን ጨካንን እየ ነይረ። ብዛዕባ ገዛእ ርእሰይ እንተ ዘይኰይኑ፡ ብዛዕባ ኻልእ ኣይግድሰንን እዩ ነይሩ።

መጽሓፍ ቅዱስ ንህይወተይ ዝቐየረሉ መገዲ፦ ኣብዚ ኣጸጋሚ እዋን እዚ ኸለኹ፡ ኣደይ መጽሓፍ ቅዱስ ኣጽኒዓ ናይ የሆዋ ምስክር ኰነት። ነቲ ዝገበረቶ ናይ ባህርይ ለውጢ ምስ ረኣኹ ኸኣ፡ ናይ ምፍላጥ ሃንቀውታ ሓደረኒ። ንኣደይ ዝቐየራ እንታይ ምዃኑ ኽፈልጥ ወሰንኩ፣ ምስ ናይ የሆዋ መሰኻኽር ድማ ብዛዕባ መጽሓፍ ቅዱስ ክመያየጥ ጀመርኩ።

ትምህርትታት ናይ የሆዋ መሰኻኽር ካብ ናይ ካልኦት ሃይማኖታት እተፈልየ ምዃኑን ናይ የሆዋ መሰኻኽር ዚብልዎ ነገራት ብምሉኡ ኣብ መጽሓፍ ቅዱስ እተመርኰሰ ኸም ዝዀነን ተገንዘብኩ። ብዘይካዚ፡ ልክዕ ከም ቀዳሞት ክርስትያናት ካብ ቤት ናብ ቤት እናኸዱ ዚሰብኩ ንሳቶም ጥራይ እዮም። (ማቴዎስ 28:19፣ ግብሪ ሃዋርያት 20:20) ነቲ ኣብ መንጎኦም ዘሎ ልባዊ ፍቕሪ ምስ ረኣኹ፡ ነታ ናይ ሓቂ ሃይማኖት ከም ዝረኸብክዋ ኣመንኩ።​—ዮሃንስ 13:35

እቲ ኻብ መጽሓፍ ቅዱስ እተመሃርክዎ ትምህርቲ፡ ኣብ ህይወተይ ዓብዪ ለውጢ ኽገብር ከም ዘሎኒ ንኽግንዘብ ሓገዘኒ። የሆዋ ንምንዝር ከም ዚጸልኦ፡ ንዕኡ ኸሐጕሶ እንተ ደልየ ኸኣ ካብ ዜርክሰኒ ነገራት ክርሕቕ ከም ዘሎኒ ተረዳእኩ። (2 ቈረንቶስ 7:1፣ እብራውያን 13:4) የሆዋ ስምዒት ከም ዘለዎን ተግባራተይ ኬጕህዮ ወይ ኬሐጕሶ ኸም ዚኽእልን ምስ ፈለጥኩ፡ ውሽጠይ ተተንከፈ። (ምሳሌ 27:11) በዚ ምኽንያት እዚ፡ ማሪዋና ምትካኽ ሓደግክዎ፡ ንሸጓጕጠይ ኣረከብክዎ፡ ከምኡውን ንባህርያተይ ከመሓይሾ ጸዓርኩ። ኰይኑ ግና፡ ነቲ ዝነብሮ ዝነበርኩ ርኹስ ናብራን ንምጥላዕን ምሕዳግ ከበደኒ።

ኣብ ፈለማ፡ ኣዕሩኸይ፡ ምስ ናይ የሆዋ መሰኻኽር ኰይነ መጽሓፍ ቅዱስ አጽንዕ ከም ዘለኹ ኺፈልጡ ኣይደለኹን ነይረ። ይኹን እምበር፡ ንማቴዎስ 10:33 ምስ ኣንበብክዋ፡ ኣረኣእያይ ቀየርኩ፣ የሱስ ኣብታ ጥቕሲ፡ “ኣብ ቅድሚ ሰብ ንዝኸሐደኒ ግና፡ ኣነ ድማ ኣብ ቅድሚ እቲ ኣብ ሰማያት ዘሎ ኣቦይ ክኽሕዶ እየ” ኢሉ ነበረ። እዚ ሓሳብ እዚ ኸኣ፡ ንኣዕሩኸይ፡ ምስ ናይ የሆዋ መሰኻኽር አጽንዕ ከም ዘለኹ ንኽነግሮም ደረኸኒ። ምስ ነገርክዎም፡ ኣዝዮም ሰምበዱ። ከምዚ ኸማይ ዝበለ ሰብ፡ ክርስትያን ኪኸውን ምድላዩ ኣገረሞም። ኣነ ግና፡ ነቲ ናይ ቀደም ኣነባብራይ ከም ዘቋረጽክዎ ነገርክዎም።

ዝረኸብክዎ ጥቕሚ፦ ኣደይ፡ ብስርዓታት መጽሓፍ ቅዱስ ክነብር ከም ዝጀመርኩ ምስ ረኣየት፡ ኣዝያ ተሓጐሰት። ሕጂ ብዛዕባይ ኣይትሻቐልን እያ። ብዛዕባ እቲ ንዓይን ንዓኣን ሓደ ዚገብረና ጕዳይ፡ ማለት ብዛዕባ እቲ ንየሆዋ ዘሎና ፍቕሪ ኢና እንዘራረብ። ሓድሓደ ግዜ፡ ነቲ ናይ ቀደም ህይወተይ ምልስ ኢለ ኽሓስቦ ኸለኹ፡ እቲ ብሓገዝ ኣምላኽ ዝገበርክዎ ለውጢ ኣዝዩ እዩ ዜገርመኒ። ነቲ ቐደም ዝነብሮ ዝነበርኩ ርኹስን ብፍቕረ ንዋይ ዝመልአን ናብራ፡ ፈጺመ ሃረር ኣይብሎን እየ።

ነቲ ኣብ መጽሓፍ ቅዱስ ዚርከብ መልእኽቲ ጽቡቕ ምላሽ እንተ ዘይህበሉ ነይረ፡ ሎሚ ብህይወት ኣይምሃለኹን ወይ ኣብ ቤት ማእሰርቲ ምበለኹ ነይረ። ሕጂ ግና፡ ባህ ዜብል ስድራ ቤት እዩ ዘሎኒ። ምስታ እትድግፈኒ ሰበይተይን ምስታ እዝዝቲ ጓለይን ኰይነ ንየሆዋ አገልግሎ ምህላወይ፡ ዓብዪ ሓጐስ እዩ ዜምጽኣለይ። ኣባል እቲ ፍቕሪ ዝመልኦ ክርስትያናዊ ሕውነት ብምዃነይ፡ ንየሆዋ ኣዝየ እየ ዘመስግኖ። ነቲ ንዓይ መጽሓፍ ቅዱሳዊ ሓቂ ኺምህረኒ ዝጸዓረ ክርስትያን እውን ኣዝየ እየ ዘመስግኖ። ነቲ ንኻልኦት ብዛዕባ ትምህርቲ መጽሓፍ ቅዱስ ክምህሮም ዘሎኒ ኣጋጣሚ፡ ኣኽቢረ እየ ዝርእዮ። ብፍላይ ግና፡ ነቲ የሆዋ ንዓይ ናብኡ ንኺስሕበኒ ኢሉ ዘርኣየኒ ሳህሊ፡ ኣዝየ እየ ዘማስወሉ።

[ኣብ ገጽ 11 ዘሎ ፍረ ሓሳብ]

‘የሆዋ ስምዒት ከም ዘለዎን ተግባራተይ ኬጕህዮ ወይ ኬሐጕሶ ኸም ዚኽእልን ፈለጥኩ’

[ኣብ ገጽ 11 ዘሎ ስእሊ]

ምስ ሰበይተይን ጓለይን

[ኣብ ገጽ 11 ዘሎ ስእሊ]

ኣደይ፡ ዜገርም ናይ ባህርይ ለውጢ ገበረት