Bayibolu Lisintha Ŵanthu

KUMBI ntchinthu wuli cho chinguwovya munthu yo watchovanga juga, munkhungu kweniso chigeŵenga kuti wasinthi? Wonani vo wangukamba.

“Ndangayanjanga Ukongwa Maphara nga Mahachi.”—RICHARD STEWART

NDIKUWA MU: 1965

CHARU CHO NDIKUWIYA: JAMAICA

MBIRI YANGU: NDATCHOVANGA JUGA KWENISO NDENGA CHIGEŴENGA

UMOYU WANGU WAKALI: Ndikukuliya ku Kingston, tawuni yikulu ku Jamaica kweniso yo ye ndi ŵanthu anandi. Banja lidu lenga likavu. Ntchitu zasoŵanga ukongwa kweniso vinthu vankhaza vachitikanga ukongwa. Ŵanthu ajanga mwamantha chifukwa cha vigeŵenga. Ndavwanga kuliya kwa futi pafufupi zuŵa lelosi.

Ama agwiranga ntchitu mwaphampha kuti aphweriyengi ini, mvurwa wangu kweniso mzichi wangu. Yiwu akhumbisiskanga kuti tisambiri sukulu. Ini ndayiyanjanga cha sukulu kweni ndayanjanga maphara nga mahachi. Ndagwenthanga ku sukulu mbwe ndiluta ko kwachitikiyanga maphara nga mahachi. Ndipu nyengu zinyaki ndakweranga pa mahachi.

Pati pajumpha nyengu yimanavi ndingwamba kubecherana ndi anyangu hachi yo yingawina. Ndenga ndi jalidu la uleŵi, ndipu ndagonananga ndi anthukazi anandi. Ndakweŵanga chamba kweniso ndabanga kuti ndisaniyengi vinthu vakukhumbika pa umoyu. Ndenga ndi futi zinandi, kweni ndiwonga chifukwa palivi yo wakufwapu pa nyengu yo ndabanga ndi futi.

Apolisi angundiko chifukwa cha milandu yo ndenga nayu ndipu angundijaliya mu jeri. Ndati ndatuwa mu jeri ndingwamba so kuba kweniso kuchita mijalidu yinyaki yiheni. Yapa vinthu vingufika paheni ukongwa kuphara pakwamba. Chinanga kuti chisku changu chawonekanga nge kuti nde munthu wakufwasa kweni ndenga muvwa zaki, ndasweranga cha kukwiya kweniso ndenga wankhaza. Ndenga wakujiyanja.

MO BAYIBOLU LINGUSINTHIYA UMOYU WANGU: Pa nyengu yosi yo ndachitiyanga vinthu vinivi, ama asambiranga Bayibolu ndi Akaboni aku Yehova. Ndinguwona kuti ama asintha ukongwa nkharu yawu ndipu naniso ndakhumbisiskanga kusambira. Ndingufufuza cho chingupangisa kuti ama asinthi, mwaviyo ndingwamba kusambira Bayibolu.

Ndinguwona kuti vo Akaboni aku Yehova asambizanga vipambana ukongwa ndi vo visopa vinyaki visambiza ndipu ndingusaniya kuti vo Akaboni asambiza vituliya mu Bayibolu. Mbakaboni aku Yehova pe wo apharazganga nyumba ndi nyumba nge mo Akhristu amunyengu yakali achitiyanga. (Mateyu 28:19; Machitidu 20:20) Ndingusimikiza kuti ndasaniya chisopa chauneneska ndati ndawona kuti atanjana ukongwa.—Yohane 13:35.

Ndingusintha ukongwa vinthu pa umoyu wangu chifukwa cha vo ndingusambira mu Bayibolu. Ndipu ndingusambira kuti Yehova watinkha uleŵi ndipu asani ndikhumba kumukondwesa ndikhumbika kuleka mijalidu yiheni yo yinanga liŵavu langu. (2 Akorinto 7:1; Aheberi 13:4) Ndingukwaskika ukongwa ndati ndaziŵa kuti vo ndichita vingamukondwesa pamwenga vingamukwiyisa Yehova. (Nthanthi 27:11) Mwaviyo ndingusimikiza mtima kuti ndileki kukweŵa chamba, ndileki kugwiriskiya ntchitu futi kweniso ndisinthi nkharu yangu. Vingunditole nyengu kuti ndisinthi jalidu la uleŵi kweniso kutchova juga.

Pakwamba, ndakhumbanga cha kuti anyangu aziŵi kuti ndayamba kusambiri Bayibolu ndi Akaboni aku Yehova. Kweni ndinguziŵa kuti ndikhumbika kuchitapu kanthu ndati ndaŵerenga lemba la Mateyu 10:33, po pe mazu ngaku Yesu ngakuti: “Weyosi yo watindikana pa masu pa ŵanthu, nani ndazakumukana pa masu pa Ada wo ŵe kuchanya.” Fundu ya pa lemba ili ndiyu yingundichiska kuti ndikambiyi anyangu kuti ndayamba kusambira Bayibolu ndi Akaboni aku Yehova. Yiwu anguzizwa ukongwa. Ndipu anguvwisa cha kuti munthu nge ini ndikhumba kuja Mkhristu. Kweni ndinguŵakambiya kuti ndikhumba so kuchita vo ndachitanga kali.

MO NDAYANDULIYA: Ama angukondwa ukongwa ati awona kuti ndayamba kugwiriskiya ntchitu fundu za mu Bayibolu. Sonu afipa mtima cha kuti ndiyambengi kuchita vinthu viheni. Tikambiskana va ubwezi wo tenawu ndi Yehova. Nyengu zinyaki ndikumbuka vo ndachitanga ndipu ndivwana cha kuti Chiuta wakundiwovya kuti ndisinthi. Sonu ndikhumbira so cha jalidu la uleŵi lo ndenga nalu kweniso umoyu wakwanja vinthu vinandi.

Asani ndingukana uthenga wa mu Bayibolu mphanyi ndikufwa pamwenga mphanyi nde mu jeri. Sonu nde ndi banja lamampha ndipuso lalikondwa. Ndikondwa ukongwa kuteŵete Yehova limoza ndi muwolu wangu kweniso mwana widu munthukazi. Nditimuwonga ukongwa Yehova chifukwa chakuti wakundizomereza kuja mu banja la pacharu chosi lo litanjana. Nditimuwonga so ukongwa munthu yo wanguchita phamphu kundisambiza Bayibolu. Mwaŵi wo ndenawu wa kovya ŵanthu kuti aziŵi vo Bayibolu lisambiza nditiwuwona kuti ngwakuzirwa ukongwa. Nditimuwonga ukongwa Yehova Chiuta, chifukwa cha chanju chaki wakundikuguziya kwaku iyu.

[Fundu yikulu]

“Ndingukwaskika ukongwa ndati ndaziŵa kuti vo ndichita vingamukondwesa pamwenga vingamukwiyisa Yehova”

[Fundu yikulu]

Nde ndi muwolu wangu kweniso mwana wangu

[Fundu yikulu]

Ndinguwona kuti ama asintha ukongwa nkharu yawu