Baibel i Save Senisim i Stap Bilong Man

WANEM samting i kirapim wanpela man bilong pilai laki na brukim haus na stil long lusim dispela pasin na senisim i stap bilong em? Ritim stori bilong em.

“Mi Laikim Tumas Hosres.”​—RICHARD STEWART

YIA MI BON: 1965

KANTRI: JAMEKA

BIPO: RASKOL NA MAN BILONG PILAI LAKI

LAIP BILONG MI LONG BIPO: Mi kamap bikpela long biktaun Kingston, long Jameka we planti manmeri tru i sindaun long en na ol i stap rabis. Planti man i no gat wok mani, na pasin raskol i pulap tru long dispela ples. Ol lain raskol i mekim na ol manmeri i save pret. Klostu olgeta de mi save harim ol gan i pairap.

Mama bilong mi i bin wok strong tru long mekim bikpela long mi na liklik brata na susa bilong mi. Em i strong long mipela i mas kisim gutpela skul. Mi no gat laik long skul, tasol mi laikim tumas hosres. Sampela taim mi save lusim skul na go long pilai graun we ol i save mekim hosres, na sampela taim mi save sindaun long hos na resis.

I no longtaim na mi insait long pasin bilong bet long ol hos. Mi save mekim pasin pamuk na slip nabaut wantaim planti meri. Mi save kisim mariwana, brukim ol stua na stilim mani bilong baim ol drak samting. Mi gat planti gan, tasol i gutpela tru olsem mi no bin kilim wanpela man i dai.

Bihain ol polis i holim mi na mi kalabus long ol pasin raskol mi bin mekim. Taim mi lusim kalabus, mi bihainim gen wankain pasin olsem bipo mi bin mekim, tasol nau pasin bilong mi i nogut moa. Pes bilong mi i luk olsem mi no man bilong mekim rong, tasol mi wanpela strongpela het man, na bel bilong mi i save sikirap hariap, na mi save mekim nogut tru long ol man. Mi save tingim mi yet tasol.

BAIBEL I SENISIM I STAP BILONG MI: Long dispela taim mama i stadi long Baibel na em i kamap wanpela Witnes Bilong Jehova. Mi lukim olsem pasin bilong em i senis na mi laik save long as bilong dispela. Mi tingting long painimaut wanem samting i mekim na pasin bilong mama i senis, olsem na mi kirap toktok wantaim ol Witnes long Baibel.

Mi luksave olsem ol tok bilong ol Witnes Bilong Jehova i narapela kain long tok bilong ol narapela lotu, na mi lukim olsem Baibel i as bilong olgeta tok ol i autim. Dispela lain tasol i save go long ol haus na autim tok, olsem ol Kristen bilong pastaim i bin mekim​—⁠mi no save long narapela lain i mekim olsem. (Matyu 28:19; Aposel 20:20) Mi bilip tru olsem mi painim pinis lotu i tru taim mi lukim olsem ol i gat pasin bilong laikim tru narapela narapela.​—⁠Jon 13:⁠35.

Ol tok mi lainim long Baibel i mekim na mi lukim olsem mi mas mekim sampela bikpela senis long laip bilong mi. Mi kisim save olsem God Jehova i nolaik tru long pasin pamuk, na sapos mi laik mekim ol samting em i laikim, orait mi mas lusim ol pasin i mekim mi i kamap doti. (2 Korin  7:1; Hibru 13:⁠4) Bel bilong mi i pilim tru taim mi kisim save olsem Jehova i save pilim ol samting long bel, na pasin bilong mi inap mekim em i bel hevi o amamas. (Sindaun 27:11) Olsem na mi pasim tok long bel olsem mi bai lusim pasin bilong kisim mariwana, lusim ol gan, na wok strong long mekim pasin bilong mi i kamap gutpela moa. Wanpela pasin mi hatwok tru long senisim, em pasin pamuk na pasin bilong pilai laki.

Pastaim mi no laik bai ol pren bilong mi i save olsem mi stadi long Baibel wantaim ol Witnes Bilong Jehova. Tasol mi senisim tru tingting bilong mi taim mi ritim Matyu 10:​33, we Jisas i tok: “Man i givim baksait long mi long ai bilong ol man, mi tu bai mi givim baksait long em long ai bilong Papa bilong mi long heven.” Dispela tok i kirapim mi long tokim ol pren bilong mi olsem mi save stadi wantaim ol Witnes. Ol i kirap nogut tru. Ol i no inap bilip olsem kain man olsem mi i laik kamap Kristen. Tasol mi tokim ol olsem mi no laik bihainim moa olpela pasin bilong mi.

GUTPELA SAMTING I PAINIM MI: Mama i amamas moa yet taim em i lukim olsem mi kirap long bihainim ol stiatok bilong Baibel. Em i no tingting planti moa long mi bai mekim ol pasin nogut. Mitupela i save toktok long samting i mekim mipela i stap wanbel​—⁠em pasin bilong mipela long laikim tru Jehova. Sampela taim mi save tingim bek pasin bilong mi long bipo, na mi kirap nogut long tingim ol senis em God i bin helpim mi long mekim long laip bilong mi. Mi no gat laik moa long mekim pasin pamuk na kisim planti mani kago olsem bipo mi bin mekim.

Sapos mi no bin putim yau long tok bilong Baibel, ating nau mi dai pinis o mi stap long kalabus. Tasol nau mi gat gutpela famili tru na mipela i stap amamas. Mi kisim bikpela amamas long mekim wok bilong God Jehova wantaim gutpela meri bilong mi na pikinini meri i save bihainim tok bilong mipela. Mi tenkyu long Jehova long em i bin larim mi i kam insait long gutpela lain brata Kristen. Mi tenkyu tru long wanpela Witnes i bin wok strong long skulim mi long tok i tru bilong Baibel. Na mi amamas long mi gat rot long helpim ol narapela long kisim save long ol tok bilong Baibel. Na mi tenkyu moa yet long God Jehova i bin mekim gutpela pasin sori long mi na i bringim mi i go klostu long em.

[Rait long pes 11]

“Mi kisim save olsem Jehova i save pilim ol samting long bel, na pasin bilong mi inap mekim em i bel hevi o amamas”

[Piksa long pes 11]

Mi wantaim meri na pikinini meri bilong mi

[Piksa long pes 11]

Mi lukim olsem pasin bilong mama i senis