E ‵Fuli Ne Te Tusi Tapu A Olaga O Tino

SE A te mea ne fakamalosi atu ki se tino kemupolo kae kaisoa ke ‵fuli tena olaga? Faitau ki ana pati ne fai mai.

“Ne tāua malosi ki a au a te tafaoga ko te fakatau‵tele solofanua.”—RICHARD STEWART

TAUSAGA NE FANAU I EI: 1965

TENA FENUA: JAMAICA

TENA TALA FAKASOLOPITO: SE TINO KEMUPOLO KAE SOLITULAFONO

TOKU OLAGA MUA: Ne tupu aka au i se kogā koga o Kingston, te laumua o Jamaica, telā e ma‵tiva kae tokouke ‵ki a tino i ei. E tokouke a tino e seai ne galuega kae lauiloa a amioga solitulafono i ei. Ne fai ne potukau ma‵sei ke ola a tino mo te ma‵taku. Toeitiiti ko aso katoa e lagona ne au a fanafanaga.

Ne fai ne toku mātua galue malosi a te ‵toe mea e mafai o fai ke tausi mai ki a au, toku taina mo toku tuagane foliki. Ne fakamautinoa ne ia ke a‵koga faka‵lei matou. Ne seki fiafia malosi au ki te akoga kae ne fakatāua malosi ne au a tafaoga fakatau‵tele solofanua. E se ti fano sāle au ki te akoga kae fano o onoono i fakatau‵telega konā. Ne tele foki au i solofanua.

E seki leva, kae ne aofia malosi au i te kemupolo tupe mō te fakatau‵tele solofanua. Ne ola au i se olaga fai valevale, kae gasolo aka o malosi toku matafāfine. Ne ‵pusi maluana au kae kaisoa foki ke maua a tupe mo ‵togi a te vaegā olaga ne ola ei au. E uke aku fana, kae fakafetai me e seai se tino ne mate i taimi e uke ne fano sāle ei au o kaisoa.

Fakamuli ifo, ne ‵poa au ne pulisimani kae ‵pei ki te falepuipui ona ko aku amioga solitulafono. I taku ‵talaga ki tua, ne faka‵soko eiloa toku vaegā olaga tenā. A te ‵tonuga loa, ne sili atu toku masei i lō aso mua. E tiga eiloa ne foliga mata ‵lei atu au, kae ne loto makeke, kaitaua vave, kae ma‵sei oku uiga. E seai se tino e fia saga au ki ei, kae na ko au.

TE AUALA NE ‵FULI EI TOKU OLAGA NE TE TUSI TAPU: I te taimi matagā tenei o toku olaga, ne sukesuke toku mātua ki te Tusi Tapu kae fai mo fai se Molimau a Ieova. Ne lavea ne au a ‵fuliga ‵gali i ana uiga kae ne fia iloa ne au a te pogai. Tenā ne fakaiku aka ei ne au ke sukesuke ki te Tusi Tapu mo te kau Molimau.

Ne iloa aka ne au me ne ‵kese a akoakoga a Molimau a Ieova mo nisi lotu kae ne fakavae a mea katoa ne fai mai ne te kau Molimau ki te Tusi Tapu. Ko latou fua te potukau telā ne talai mai fale ki fale e pelā mo Kelisiano mua. (Mataio 28:19; Galuega 20:20) Ne kamata o talitonu au me ko maua ne au te lotu tonu i te taimi ne lavea atu ne au te lotou fakatau a‵lofa.—Ioane 13:35.

Mai i mea ne tauloto ne au i te Tusi Tapu, ne iloa aka ei me e ‵tau o fai ne au a ‵fuliga ‵lasi i toku olaga. Ne iloa atu me e takalialia a Ieova ki amioga fakatauavaga sē ‵tau, kae kafai e fia fakafiafia atu au ki a ia, e ‵tau o fakagata ne au a faifaiga kolā e fakalailai ei toku foitino. (2 Kolinito 7:1; Epelu 13:4) Ne otia toku loto i te taimi ne iloa ei ne au me e isi ne lagonaga o Ieova kae ko aku faifaiga ne mafai o fakalogo‵mae io me fakafiafia atu ki a ia. (Faataoto 27:11) Ne fakaiku aka ei ne au ke ‵kati taku ‵pusi maluana, se toe fakaaoga aku fana kae taumafai ke momea aka te ‵lei o oku uiga. E aofia i toe ‵fuliga faiga‵ta, ko te fulitua atu ki toku olaga fai valevale mo taku kemupolo.

Muamua la, ne seki manako au ke iloa ne oku taugasoa me ko sukesuke au mo Molimau a Ieova ki te Tusi Tapu. Kae ne ‵fuli taku kilokiloga i te taimi ne faitau au ki te Mataio 10:33, telā e fakamau i ei a pati a Iesu konei: “So se tino e fakafiti ne ia au i mua o tino, ka fakafiti foki ne au a ia i mua o toku Tamana telā i te lagi.” Ne fakamalosi mai a te fuaiupu tenā ke fakailoa atu ki oku taugasoa me ko fai taku akoga ne te kau Molimau. Ne ‵poi malosi latou. Ne seki tali‵tonu latou me ko manako se tino penei mo au ke fai mo fai se Kelisiano. Kae ne fai atu au ki a latou me ko se toe manako lele eiloa au ki toku olaga mua.

TE AUALA NE MAUA EI NE AU A MEA AOGA: Ne fiafia malosi toku mātua i te laveaga ne ia me ko kamata o ola au e ‵tusa mo akoakoga fakavae i te Tusi Tapu. Nei la, ko se toe manavase a ia me ko se toe fai ne au a mea ma‵sei. E sau‵tala māua ki se mea e tasi e ‵pau ei māua—ko te mā a‵lofa ki a Ieova. I nisi taimi, e toe mafaufau au ki oku uiga mua kae se talitonu ki ‵fuliga ne fai ne au ona ko te fesoasoani o te Atua. Ko galo lele atu eiloa toku manako ki se olaga fai valevale mo te fia maumea ne ola ei au.

Moi se saga tonu atu au ki te fekau i te Tusi Tapu, penei kāti ko mate io me e nofo atu au i te falepuipui i te aso nei. Nei la, ko maua ne au se kāiga gali kae fiafia. Ko fiafia malosi au ke tavini atu ki a Ieova te Atua fakatasi mo te ‵lago mai o taku avaga mo taku tama fafine fakalogo. E loto fakafetai au ki a Ieova mō te taliaga ne ia ke aofia au i se kautaina Kelisiano a‵lofa. E loto fiafia au me ne fai ne se tino a taumafaiga e uke ke akoako au ki te munatonu i te Tusi Tapu. Kae e fakatāua ne au avanoaga ke fesoasoani atu ki nisi tino ke tauloto ki mea e akoako mai i te Tusi Tapu. Kae sili atu toku loto fiafia ki a Ieova te Atua mō tena alofa atafai mai te ‵futiatuga ne ia au ki a ia.

[Ata]

“Ne iloa ei ne au me e isi ne lagonaga o Ieova kae ko aku faifaiga ne mafai o fakalogo‵mae io me fakafiafia atu ki a ia”

[Ata]

Fakatasi mo taku avaga mo taku tama fafine

[Ata]

Ne lavea ne au a ‵fuliga ‵gali o uiga o toku mātua